12 ¹ Эфрайимнинг эркаклари йиғилиб, Зафондан ўтдилар ва Йефтаҳга: “Нима учун сен Аммўн ўғиллари билан жанг қилгани бординг, бизни эса сен билан боришга чақирмадинг? Биз сенинг уйингни сен билан бирга ёндириб юборамиз”,- дедилар. ² Йефтаҳ уларга деди: “Мен ва менинг халқим аммўнликлар билан қаттиқ баҳслашаётган эдик. Мен сизларни чақирдим, лекин сизлар мени уларнинг қўлидан халос қилмадингизлар. ³ Сизлар мени халос қилмаётганларингизни кўриб, мен ўз ҳаётимни хавф остига қўйдим ва аммўнликларга қарши бордим, шунда Раббий уларни менинг қўлимга топширди. Нима учун энди сизлар мен билан жанг қилгани келдингизлар?” ⁴ Йефтаҳ Гилъаднинг ҳамма аҳолисини йиғди ва эфрайимликлар билан жанг қилди. Гилъаднинг аҳолиси эса: Сизлар – Эфрайимнинг қочқинларисизлар, Гилъад эса Эфрайим ва Манашеҳ орасида, деб эфрайимликларни тор-мор келтирдилар. ⁵ Гилъадликлар Йорданнинг кечувини эфрайимликлардан тортиб олдилар. Омон қолган эфрайимликлардан кимдир: “Менинг кечиб ўтишимга рухсат беринглар”,- деса, Гилъаднинг аҳолиси унга: “Сен эфрайимлик эмасмисан?”- дер эди. У: “Йўқ”,- деб жавоб берса, ⁶ улар унга: “Шибболет дегин,”- дейишар эди, у эса: “Сибболет,”- дер эди ва тўғри талаффуз қила олмас эди. Шунда улар, уни қўлга олиб, Йорданнинг кечувида қатл қилар эдилар. Ўша пайтда эфрайимликлардан қирқ икки минг киши қулади. ⁷ Йефтаҳ Исроилда олти йил ҳакамлик қилди. Сўнг гилъадлик Йефтаҳ вафот этиб, Гилъаднинг шаҳарларидан бирида дафн этилди. ⁸ Ундан кейин бейт-леҳемлик Ибзан Исроилда ҳакам бўлди. ⁹ Унинг ўттиз нафар ўғли бор эди. У ўттиз нафар қизини уйидан турмушга чиқариб юборди, ўттиз нафар қизни эса ташқаридан ўғилларига хотинликка олди. У Исроилда етти йил ҳакам бўлди. ¹⁰ Сўнгра Ибзан вафот этди ва Бейт-Леҳемда дафн этилди. ¹¹ Ундан кейин Забулун қабиласидан бўлган Элон Исроилда ҳакам бўлди ва Исроилни ўн йил ҳукм қилди. ¹² Сўнгра Элон вафот этди ва Забулун еридаги Ойжавлонда дафн этилди. ¹³ Ундан кейин пиратонлик Хиллелнинг ўғли Абдон Исроилда ҳакам бўлди. ¹⁴ Унинг қирқ нафар ўғли ва ўттиз нафар набираси бор эди, улар етмишта ёш эшакда юрар эди. У Исроилни саккиз йил ҳукм қилди. ¹⁵ Сўнг пиратонлик Хиллелнинг ўғли Абдон вафот этди ва Амалеқ тоғидаги, Эфрайимнинг еридаги Пиратонда дафн этилди.