6 ¹ Биз эса Унинг ҳамкорлари бўлиб, сизлардан ўтинамизки, Худонинг иноятини беҳуда қабул қилган бўлманглар. ² Чунки шундай дейилган: “Маъқул вақтда Мен сени эшитдим ва нажот кунида сенга ёрдам бердим”. Мана энди маъқул вақтдир! Мана энди нажот кунидир! ³ Хизматимиз қораланмаслиги учун биз ҳеч кимга ҳеч нарсада қоқинишга йўл қўймаяпмиз. ⁴ Аксинча, биз ўзимизни ҳамма нарсада Худонинг хизматкорлари сифатида тақдим этмоқдамиз: узоқ сабр-тоқатда, ғам-қайғуларда, муҳтожликларда, қийин аҳволларда, ⁵ калтаклар остида, зиндонларда, тўполонларда, меҳнатларда, уйқусизликда, рўза тутишда, ⁶ покликда, билимда, бардошда, меҳрибонликда, Муқаддас Руҳда, самимий севгида, ⁷ ҳақиқат Сўзида, Худонинг қудратида, ўнг ва чап қўлда ҳақлик қуроли билан, ⁸ ҳурмат ва бадномликда, ҳақорат ва мақтовларда! Биз гўё алдамчилармиз, лекин биз ҳақиқатгўймиз; ⁹ биз гўё номаълуммиз, лекин бизни яхши танимоқдалар; биз гўё ҳалок бўлганмиз, лекин мана тирикмиз; биз гўё жазоланганмиз, лекин ўлдирилмаганмиз; ¹⁰ биз гўё хафа қилинганмиз, лекин доимо хурсандмиз; биз гўё камбағалмиз, лекин кўпларни бойитмоқдамиз; биз гўё ҳеч нарсага эга эмасмиз, лекин ҳамма нарсага эгамиз. ¹¹ Эй, Коринфликлар, оғзимиз сизлар учун очилган, юрагимиз эса кенгайтирилган. ¹² Сизлар бизнинг ичимизда сиқилган эмассизлар, аммо сизлар ўз ичингизда сиқилгансизлар. ¹³ Энди эса сизлар ҳам бунга жавобан ўзингизни кенгайтиринглар, деб мен фарзандларимга айтгандек сизларга айтяпман. ¹⁴ Имонсизлар билан бирга ўзга бўйинтуруққа қўшилманглар. Зеро ҳақлик ва қонунсизлик орасида қандай мулоқот бор? Нур билан зулмат орасида қандай умумийлик бор? ¹⁵ Масиҳ билан Белиар орасида қандай мувофиқлик бўлиши мумкин? Ёки имонли билан имонсиз орасида қандай шериклик бор? ¹⁶ Худонинг маъбади билан бутлар орасида қандай келишув бор? Сизлар эса барҳаёт Худонинг маъбадисизлар-ку, худди Худо айтганидек: “Мен уларнинг ичида жо бўлиб, уларда юраман. Уларнинг Худоси бўламан, улар эса Менинг халқим бўладилар. ¹⁷ Шунинг учун уларнинг орасидан чиқинглар ва улардан ажралинглар,- дейди Раббий,- нопокка қўл тегизманглар, шунда Мен сизларни қабул қиламан. ¹⁸ Мен сизларга Ота бўламан, сизлар эса Менинг ўғиллару қизларим бўласизлар,- дейди Раббий Қодир Худо”.