5 ¹ Зотан биз биламизки, агар бизнинг ердаги уйимиз, шу кулбамиз хароб бўлса, биз осмонда Худодан бинога, яъни қўл билан қурилмаган абадий уйга эгамиз. ² Биз самовий масканимизга бурканишни хоҳлаб, оҳ-нола чекиб юрибмиз: ³ фақатгина биз кийинган ҳолда ҳам яланғоч бўлиб қолмайлик. ⁴ Биз бу кулбада бўлиб, машаққат остида оҳ-нола қилмоқдамиз. Чунки биз кийимсиз бўлиб қолишни эмас, балки бурканишни истаймиз, токи ўлимли бўлган нарса ҳаёт томонидан ютиб юборилсин. ⁵ Зотан Худо бизни айнан шу учун яратди ва бизга Руҳнинг гаровини ато қилди. ⁶ Шунинг учун биз доимо дадилмиз ва биламизки, биз бу танада истиқомат қилиб, Раббимиздан йироқдамиз – ⁷ (зеро биз кўриш билан эмас, балки имон билан юрибмиз) – ⁸ биз дадил бўлиб, бу танадан йироқлашиш ва Раббийда жойлашишни хоҳламоқдамиз. ⁹ Шундай қилиб, хоҳ жойлашаётган, хоҳ йироқлашаётган бўлсак ҳам, Унга маъқул бўлиш учун жонбозлик қилмоқдамиз. ¹⁰ Чунки ҳаммамиз танада яшаган пайтда қилган яхшиликларимизга ёки ёмонликларимизга ярашасини олишимиз учун, Масиҳнинг ҳукм курсиси олдида ҳозир бўлишимиз керак. ¹¹ Шунинг учун, Худонинг қўрқувини билиб, биз одамларни ишонтирмоқдамиз. Худога эса биз аёнмиз ва умид қиламанки, сизларнинг виждонингизга ҳам аёнмиз. ¹² Ўзимизни сизларга яна тавсия этмаяпмиз. Балки сизларга биз билан мақтаниш имкониятини бермоқдамиз, токи сизлар юраги билан эмас, ташқи қиёфаси билан мақтанаётганларга жавоб бера олинглар. ¹³ Агар биз ақлимизни йўқотсак, бу Худо учундир. Агар биз соғлом онгда бўлсак, бу сизлар учундир. ¹⁴ Чунки Масиҳнинг севгиси бизни қамраб олмоқда! Биз эса шундай фикр юритамиз: агар Биттаси ҳамма учун ўлган бўлса, унда ҳамма ўлгандир. ¹⁵ Масиҳ эса ҳамма учун ўлди, токи яшаётганлар энди ўзлари учун эмас, балки улар ҳақи ўлган ва тирилган Масиҳ учун яшасинлар. ¹⁶ Шунинг учун энди биз тана изми бўйича ҳеч кимни билмаймиз. Агарда аввал Масиҳни тана изми бўйича билган бўлсак ҳам, энди эса билмаймиз. ¹⁷ Шундай қилиб, ким Масиҳда бўлса, у янги ижоддир. Эскиси ўтиб кетди, энди ҳаммаси янгидир. ¹⁸ Бунинг ҳаммаси эса Худодандир. У Масиҳ орқали бизни Ўзи билан яраштирди ва бизга яраштириш хизматини берди. ¹⁹ Чунки Худо одамларнинг гуноҳларини Масиҳда ҳисобга олмасдан, дунёни Ўзи билан яраштирди ва бизга яраштириш Сўзини топширди. ²⁰ Шундай қилиб, биз Масиҳнинг юзидан бўлган элчилармиз ва гўё Худонинг Ўзи биз орқали инсонлардан ўтиниб сўраяпти. Биз Масиҳнинг юзидан ёлворяпмиз: Худо билан ярашинглар! ²¹ Чунки биз Масиҳда Худонинг ҳақлиги бўлишимиз учун, Худо гуноҳни билмаган Масиҳни биз учун гуноҳга айлантирди.