4 ¹ Шунинг учун Худонинг раҳм-шафқати бўйича шундай хизматга эга бўлиб, биз тушкунликка тушмаймиз. ² Лекин яширин уятли ишларни рад этамиз, ҳийлакорлик қилмаймиз, Худонинг Сўзини бузмаймиз, балки ҳақиқатни аён қилиб, Худонинг ҳузурида ўзимизни ҳар бир инсоннинг виждонига тақдим этамиз. ³ Агарда Хушхабаримиз ёпиқ бўлса, у ҳалок бўлаётганлар учун ёпиқдир. ⁴ Худо тасвири бўлган Масиҳнинг шуҳрати ҳақидаги Хушхабарнинг нури имонсизларга порламаслиги учун бу дунёнинг худоси уларнинг онгини кўр қилиб қўйган. ⁵ Чунки биз ўзимизни эмас, балки Масиҳ Исони, яъни Раббийни воизлик қилмоқдамиз, биз эса Исо ҳақи сизларнинг қулларингизмиз. ⁶ Зеро қоронғиликдан нур порлашига буюрган Худо бизнинг юракларимизда порлади, токи Исо Масиҳнинг юзидаги Унинг шуҳратини билиш учун бизни ёритсин. ⁷ Куч-қудратнинг беҳад кўплиги эса бизники эмас, балки Худоники бўлиши учун, биз бу хазинани лой идишларда олиб юрибмиз. ⁸ Биз ҳар томондан сиқилмоқдамиз, лекин эзилмаймиз. Биз жуда оғир шароитлардамиз, лекин умидимизни йўқотмаймиз. ⁹ Биз қувғиндамиз, лекин тарк этилган эмасмиз. Биз қулатилмоқдамиз, лекин яксон бўлган эмасмиз. ¹⁰ Исонинг ҳаёти бизнинг танамизда намоён бўлиши учун, Раббий Исонинг ўликлигини ҳамиша танамизда олиб юрибмиз. ¹¹ Чунки биз, тирик бўлганлар Исо ҳақи доимо ўлимга топширилмоқдамиз, токи Исонинг ҳаёти ҳам ўлимли танамизда намоён бўлсин. ¹² Шундай қилиб, ўлим бизда, ҳаёт эса сизларда амал қилмоқда. ¹³ Энди: “Мен ишонар эдим, шунинг учун гапирар эдим”,- деб ёзилганидек, биз ҳам ўша имон руҳига эга бўлиб, ишонмоқдамиз, шунинг учун ҳам гапирмоқдамиз. ¹⁴ Зеро биламизки, Раббий Исони тирилтирган Худо бизни ҳам Исо орқали тирилтиради ва сизлар билан бирга Ўзининг ҳузурида турғизиб қўяди. ¹⁵ Чунки ҳамма нарса сизлар учундир, токи иноятнинг мўл-кўлчилиги кўпларда Худонинг шуҳрати шаънига миннатдорчиликларни кўпайтирсин. ¹⁶ Шунинг учун биз тушкунликка тушмаяпмиз, чунки ташқи инсонимиз барбод бўлиб бораётган бўлса ҳам, бизнинг ички инсонимиз кундан кунга янгиланмоқда. ¹⁷ Зеро бу қисқа муддатли енгил қайғуларимиз бизга абадий шуҳратнинг беҳад чексиз вазминлигини келтиради, ¹⁸ фақатгина биз кўринадиган нарсаларга эмас, кўринмайдиган нарсаларга қарасак. Чунки кўринадиган нарсалар ўткинчи, кўринмайдиганлари эса абадийдир.