9 ¹ Сулаймон Раббийнинг маъбадини, подшоҳнинг уйини ва Сулаймон қилишни истаган барча ниятини қилиб бўлганида, ² Раббий Сулаймонга Гибъўнда намоён бўлганидан кейин яна иккинчи марта намоён бўлди. ³ Раббий унга деди: “Мен сенинг ибодатингни ва сен Менинг қаршимда қилган илтижонгни эшитдим. Менинг номим абадий у жойда бўлиши учун сен қурган шу маъбадни Мен муқаддасладим. Менинг кўзларим ва Менинг юрагим ҳар куни ўша жойда бўлади. ⁴ Агар сен ҳам Менинг юзим олдида отанг Довуд каби пок юрак билан тўғриликда юрсанг, Мен сенга амр этганларнинг барчасини бажарсанг, Менинг низомлару қонунларимни сақласанг, ⁵ шунда, Мен отанг Довудга: Сенинг наслингдан Исроил тахтида ўтирадиган одам йўқ бўлмайди, деб айтганимдек, Мен сенинг шоҳона тахтингни Исроил устидан абадий мустаҳкам ўрнатаман. ⁶ Лекин агар сизлар ва сизларнинг ўғилларингиз Мени тарк этсангизлар, Мен сизларга берган Менинг амрларимга ва Менинг низомларимга амал қилмасангизлар, ҳамда бориб, ўзга худоларга хизмат қилиб, сажда қилсангизлар, ⁷ шунда Мен Исроилга берган ер юзидан Исроилни қириб ташлайман ва Мен Ўз номимга муқаддаслаган ушбу маъбадни Ўз юзим қаршисидан рад қиламан. Шунда Исроил халқи барча халқларда масал ва масхара бўлади. ⁸ Мана шу баланд маъбад ҳақида, унинг ёнидан ўтаётган ҳар бир кимса даҳшатга тушиб, ҳуштак чалади ва дейди: Нима учун Раббий бу ерни ва бу маъбадни бундай қилди? ⁹ Улар: Чунки улар оталарини Миср еридан олиб чиққан ўз Раббий Худосини тарк этдилар ва бошқа худоларни қабул қилдилар, уларга хизмат қилиб, сажда қилдилар? Шунинг учун Раббий уларга ушбу барча кулфатларни юборди,- дейдилар”. ¹⁰ Сулаймон иккита уй: Раббийнинг ва подшоҳнинг уйини қурган йигирма йил ўтганидан сўнг, ¹¹ Тир подшоҳи Хирам Сулаймонга кедр, сарв дарахтларини ҳамда олтинни унинг кўнгли истаганича етказиб тургани учун подшоҳ Сулаймон Хирамга Галиле еридан йигирмата шаҳарни берди. ¹² Сулаймон берган шаҳарларни кўриш учун Хирам Тирдан чиқиб келди ва улар унга ёқмади. ¹³ У: “Биродарим менинг, сен менга берган бу шаҳарлар қанақа шаҳарлар?”- деди. У уларни Кэбул (“Чекланган”), деб атади. Улар ҳозирги кунга қадар шундай аталади. ¹⁴ Хирам подшоҳга бир юз йигирма талант олтин юборди. ¹⁵ Подшоҳ Сулаймоннинг солиқ солишининг сабаби мана шудир: Раббийнинг маъбадини, ўзининг уйини, Миллони, Йерусалимнинг деворларини, Ҳазорни, Мегиддо ва Гезерни қуриш учун у солиқ солди. ¹⁶ Миср подшоҳи фиръавн келиб, Гезерни қўлга киритди, уни оловда ёндирди ва шаҳарда яшаётган канъанликларни қириб ташлаб, шаҳарни ўзининг қизи, Сулаймоннинг хотинига совға қилди. ¹⁷ Шунда Сулаймон Гезерни ва пастги Бейт-Хўронни, ¹⁸ Баалатни ва саҳродаги Тадморни, ¹⁹ барча ғамлаш шаҳарларини, жанг аравалари учун шаҳарларни, отлиқлар учун шаҳарларни қурди. Шундай қилиб, Сулаймон Йерусалимда, Лебанонда ҳамда ўзининг шоҳлигидаги барча ерда қуришни истаган барча нарсани қурди. ²⁰ Исроил ўғилларидан бўлмаган, амўрликлардан, хетликлардан, перизликлардан, ҳивликлар ва ябусликлардан қолган бутун халқни, ²¹ шунингдек, улардан кейин ерда қолган, Исроил ўғиллари қириб ташламаган уларнинг фарзандларини Сулаймон ҳозирги кунгача товон тўловчи хизматкорлар қилди. ²² Исроил ўғилларини эса Сулаймон қул қилмади, лекин улар унинг жангчилари, хизматкорлари, амалдорлари, лашкарбошилари ва унинг жанговар араваларининг ҳамда отлиқларининг бошлиқлари бўлдилар. ²³ Мана булар Сулаймоннинг ишларининг устидан бош назоратчилар: ишларни амалга ошираётган халқни бошқарадиганлар беш юз эллик нафар киши эди. ²⁴ Фиръавннинг қизи Довуднинг шаҳридан Сулаймон унга қуриб берган уйга кўчиб ўтди. Сўнгра Сулаймон Миллони қурди. ²⁵ Сулаймон Раббийга қурган қурбонгоҳда бир йилда уч марта тамоман ёндириш қурбонлиги ва тинчлик қурбонлиги келтириб, Раббийнинг қаршисида қурбонгоҳда тутатқилар тутатар эди. Шундай қилиб, у уйнинг қурилишини тугатди. ²⁶ Подшоҳ Сулаймон Эдўм ерида, Қизил денгиз қирғоғида, Элат ёнидаги Эзион‑Габерда кема ясади. ²⁷ Хирам денгизни биладиган ўзининг кемачи хизматкорларини кемада Сулаймоннинг хизматкорлари билан бирга юборди. ²⁸ Улар Офирга жўнадилар ва у ердан тўрт юз йигирма талант олтинни олиб, подшоҳ Сулаймонга олиб келдилар.