4 ¹ Подшоҳ Сулаймон бутун Исроил устидан подшоҳ эди. ² Мана булар – унинг қўл остидаги бошлиқлар эдилар: руҳоний Садокнинг ўғли Азарийаҳ, ³ Шибанинг ўғиллари Элиҳореф ва Ахийаҳ котиблар, Аҳилуднинг ўғли Йеҳошафат тарихчи, ⁴ Йеҳойаданинг ўғли Бенайаҳ лашкарбоши, Садок ва Абиатар эса руҳонийлар, ⁵ Натаннинг ўғли Азарийаҳ назоратчиларга бошлиқ, Натаннинг ўғли руҳоний Забут подшоҳнинг дўсти, ⁶ Аҳишар подшоҳнинг хонадони устидан бошлиқ, Абданинг ўғли Адонирам эса солиқларнинг устидан бошлиқ. ⁷ Сулаймоннинг Исроил устидан ўн иккита назоратчиси бор эди. Улар подшоҳга ва унинг хонадонига озиқ‑овқат етказиб турар эдилар. Ҳар бир назоратчи йилнинг бир ойида озиқ‑овқат етказиб туриши керак эди. ⁸ Мана уларнинг исмлари: Эфрайим тоғида Бен-Хур эди. ⁹ Маказда, Шаалбимда, Бейт-Шемешда, Элон ва Бейт-Хананда Бен-Декар эди. ¹⁰ Арубофда Бен-Ҳесед эди. У яна Сўкоҳ ва Ҳефер устида ҳам бўлган. ¹¹ Бутун Новоҳ-Дор ҳудуди устида Бен‑Абинадаб эди. Сулаймонинг қизи Тават унинг хотини эди. ¹² Таанаҳ ва Мегиддода Аҳилуднинг ўғли Баанаҳ эди. У яна Йезреэл остидаги Заретан олдидаги Бейт-Шеандан то Абел-Мехолаҳгача, ҳатто Йокмеҳамдан наригача бутун юрт устида ҳам бўлган. ¹³ Гилъаддаги Рамўтда Бен‑Гебер эди. У яна Гилъаддаги Манашеҳ ўғли Йаирнинг шаҳарлари, шунингдек, Башандаги Аргоб вилояти, деворли ва мис дарвозали олтмишта катта шаҳар устида ҳам бўлган. ¹⁴ Маханайимда Иддонинг ўғли Аҳинадаб эди. ¹⁵ Нафтали ерида Охимаас эди. У ўзига Сулаймоннинг қизи Босиматни хотинликка олган эди. ¹⁶ Ашернинг ери ва Беалотда Хушайнинг ўғли Баана эди. ¹⁷ Иссохор ерида Паруйахнинг ўғли Йеҳошафат эди. ¹⁸ Бенямин ерида Элаҳнинг ўғли Шимей. ¹⁹ Гилъад ерида, яъни Амўрлик подшоҳи Сихоннинг ерида ва Башан подшоҳи Огнинг ерида Урийнинг ўғли Гебер эди. У Гилъадда назоратчи эди. ²⁰ Денгиз бўйидаги қум каби кўп сонли Яҳудо ҳамда Исроил еб‑ичар ва шодланар эди. ²¹ Сулаймон Фурот дарёсидан Пелишт еригача ва Мисрнинг чегарасигача барча шоҳликлар устидан ҳукмронлик қилар эди. ²² Сулаймоннинг ҳар кунги озуқаси қуйидагилардан иборат эди: ўттиз кор буғдой уни ва олтмиш кор бошқа унлар; ²³ ўнта семиртирилган ҳўкиз, йигирмата яйловдан келтирилган ҳўкиз, буғу, кийик, оққуйруқ ва семиртирилган қушлардан ташқари юзта қўй эди. ²⁴ Зеро дарёнинг у томонидаги Типсаҳдан Газагача бутун ер устидан ва дарёнинг бу томонидаги барча подшоҳлар устидан Сулаймон ҳукмронлик қилар эди. У атрофидаги барча мамлакатлар билан тинчликда эди. ²⁵ Шундай қилиб, Сулаймоннинг барча кунларида Дандан то Беир-Шебагача Яҳудо ва Исроилнинг ҳар бир одами ўзининг узумзори остида ва анжир дарахти остида хотиржам яшар эди. ²⁶ Сулаймонинг отхоналарида аравалар учун қирқ мингта ва отлиқлар учун ўн икки мингта от бор эди. ²⁷ Ўша назоратчилар подшоҳ Сулаймонга, шоҳнинг дастурхонига керакли барча нарсаларни ҳар бири ўзининг ойида келтириб берар ва ҳеч нарсанинг камчилигига йўл қўймас эдилар. ²⁸ Ҳар бири ўз навбатида, подшоҳ яшайдиган жойга от ва хачирлар учун арпа ҳамда сомонни ҳам етказиб берар эди. ²⁹ Худо Сулаймонга донолик, ўта буюк идрок ва денгиз қирғоғидаги қум каби кенг ақл берди. ³⁰ Сулаймоннинг донолиги барча шарқ ўғилларининг ҳамда Мисрнинг бор донолигидан юқори эди. ³¹ У барча одамлардан доно эди. У эзраҳлик Эйтандан, Маҳолнинг ўғиллари Ҳейман, Калкол ва Дардадан ҳам донороқ эди. Атрофидаги барча халқлар орасида унинг исми шарафда эди. ³² У уч мингта ҳикмат айтди ва унинг бир минг бешта қўшиғи бор эди. ³³ У Лебанондаги кедрдан то девордан ўсиб чиқадиган ҳиссопгача дарахтлар ҳақида сўзлади. У ҳайвонлар, қушлар, судралиб юрувчилар ва балиқлар ҳақида ҳам сўзлади. ³⁴ Сулаймоннинг донолиги ҳақида эшитиб, унинг донолигини эшитиш учун барча халқлардан ва барча подшоҳликлардан келар эдилар.