3 ¹ Сулаймон Миср подшоҳи фиръавни билан қариндош бўлди, у фиръавннинг қизини хотинликка олди. Сулаймон ўзининг уйини, Раббийнинг уйини ва Йерусалимнинг атрофидаги деворларни қуриб битирмагунича, ўз хотинини Довуднинг шаҳрига жойлаштирди. ² Халқ ҳануз тепаликларда қурбонликлар келтирар эди, чунки ўша кунларгача Раббийнинг номига уй қурилмаган эди. ³ Сулаймон отаси Довуднинг низомлари бўйича юриб Раббийни севди, лекин у ҳам тепаликларда қурбонликлар келтирар ва тутатқи тутатар эди. ⁴ Подшоҳ қурбонлик келтириш учун Гибъўнга борди, чунки у ерда бош қурбонгоҳ бор эди. Сулаймон ўша қурбонгоҳда мингта тамоман ёндириш қурбонлиги келтирди. ⁵ Гибъўнда Раббий Сулаймонга тунда тушида намоён бўлди ва Худо: “Сўра, сенга нима берай?”- деди. ⁶ Сулаймон шундай деди: “Ўз қулинг Довуд, менинг отам Сенинг қаршингда ҳақиқатда, ҳақликда ва Сенинг қаршингда софдиллик билан юргани учун Сен унга буюк шафқат кўрсатдинг. Шунингдек, Сен унга бу буюк шафқатни асраб қолиб, унинг тахтида ўтирадиган ўғилни унга ҳадя этдинг, бу эндиликда амалга ошди. ⁷ Энди, менинг Раббий Худойим, Сен отам Довуднинг ўрнига Ўз қулингни шоҳ қилиб қўйдинг, лекин мен ёш боламан ва мен қандай чиқиб киришни билмайман. ⁸ Сенинг қулинг – Сен танлаган халқнинг, сонининг кўплигидан ҳисоблаб ҳам бўлмайдиган, саноғига ҳам етиб бўлмайдиган халқнинг орасидадир. ⁹ Сенинг халқингни ҳукм қилиш ва нима ёмон, нима яхши эканлигини фарқлай олиш учун Ўз қулингга доно юрак ато қилгин, чунки ким Сенинг бу кўп сонли халқингни бошқара олади?” ¹⁰ Сулаймон шуни сўрагани Раббийга маъқул бўлди. ¹¹ Худо унга деди: “Сен шуни сўраганинг, ўзингга узоқ умр, бойлик ва ўз душманларингни жонини сўрамаганинг, балки тўғри ҳукм чиқариш учун донолик сўраганинг учун ¹² мана, Мен сенинг сўзингни амалга ошираман: мана, Мен сенга шундай доно ва идрокли юрак бераманки, сендан олдин сенга ўхшагани бўлмаган ва сендан кейин сенга ўхшагани бўлмайди. ¹³ Яна Мен сенга сен сўрамаган нарсаларни: бойлик ва шуҳратни бераманки, сенинг барча кунларингда подшоҳлар орасида сенга ўхшаши бўлмайди. ¹⁴ Агар сен отанг Довуд каби Менинг низомларимни, Менинг амрларимни сақлаб, Менинг йўлларимдан юрсанг, унда Мен сенинг умрингни ҳам узайтираман”. ¹⁵ Сулаймон уйғониб кетди ва, мана, бу туш эди. У Йерусалимга борди ва Раббийнинг Аҳд Киботи олдида туриб, тамоман ёндириш қурбонликлари ва тинчлик қурбонликлари келтириб, ўзининг барча хизматкорлари учун катта базм уюштирди. ¹⁶ Шунда подшоҳнинг олдига иккита зинокор аёл келиб, унинг қаршисида турди. ¹⁷ Аёллардан бири деди: “Оҳ, менинг ҳукмдорим! Мен ва бу аёл битта уйда яшаймиз. Мен шу уйда унинг олдида бола туғдим. ¹⁸ Мен туққанимдан уч кундан кейин, бу аёл ҳам туғди. Биз уйда бирга эдик ва уйда биз билан бирга ҳеч қандай бошқа одам йўқ эди, уйда фақат иккимиз эдик. ¹⁹ Тунда бу аёлнинг боласи ўлди, чунки у уни босиб олган эди. ²⁰ Шунда у тунда туриб, мен, сизнинг қулингиз ухлаб ётганида, менинг боламни ёнимдан олди ва уни ўзининг кўксига қўйди. Ўзининг ўлик боласини эса менинг кўксимга қўйди. ²¹ Мен эрталаб ўғлимни овқатлантириш учун турдим ва мана, у ўлган эди. Мен унга эрталаб диққат билан қараганимда эса, у мен туққан менинг ўғлим эмас эди”. ²² Бошқа аёл: “Йўқ, менинг ўғлим тирик, сенинг ўғлинг эса ўлган”,- деди. Биринчиси эса: “Йўқ, сенинг ўғлинг ўлган, меники эса тирик!”- деди. Улар шоҳнинг олдида шундай дейишар эди. ²³ Подшоҳ деди: “Буниси: Менинг ўғлим тирик, сенинг ўғлинг эса ўлган, демоқда. Униси эса: Йўқ, сенинг ўғлинг ўлган, менинг ўғлим эса тирик, демоқда”. ²⁴ Шунда подшоҳ: “Менга қилич келтиринглар!”- деди. Подшоҳга қилич келтирдилар. ²⁵ Подшоҳ: “Тирик болани иккига бўлинглар ва ярмини бирига, ярмини бошқасига беринглар!”- деди. ²⁶ Ўғли тирик бўлган аёл подшоҳга сўзлаб: “Оҳ, менинг ҳукмдорим, бу тирик болани унга беринг, уни ўлдирманг!”- деди, чунки у ўз ўғлига раҳми келганидан, бутун ичи ҳаяжонга тўлган эди. Бошқаси эса: “У сенга ҳам, менга ҳам бўлмасин, уни чопинглар!”- деди. ²⁷ Подшоҳ жавоб бериб: “Бу тирик болани бу аёлга беринглар, уни ўлдирманглар. У унинг онасидир!”- деди. ²⁸ Подшоҳ қандай ҳукм қилганини бутун Исроил эшитди ва улар подшоҳдан қўрқа бошладилар, чунки унда суд қилиш учун Худонинг донолиги борлигини кўрдилар.