16 ¹ Бааша ҳақида Йеҳу ўғли Ҳананига Раббийнинг сўзи келди: ² “Мен сени тупроқдан кўтардим ва Менинг халқим Исроилга ҳукмдор қилиб қўйдим. Сен эса Йеробоамнинг йўлидан бординг ва Мени ўз гуноҳлари билан ғазаблантириши учун Менинг халқим Исроилни гуноҳга ботирдинг. ³ Шунинг учун Мен Баашанинг ва унинг уруғининг хонадонини қириб ташлайман, Небат ўғли Йеробоамнинг хонадонини қирғин қилганим каби, сенинг хонадонингни ҳам худди шундай қиламан. ⁴ Баашанинг хонадонидан ким шаҳарда ўлса, уни итлар ейди, унинг хонадонидан ким далада ўлса, уни само қушлари ейдилар”. ⁵ Баашанинг қолган фаолияти, унинг қилган ишлари ва унинг қудрати Исроил подшоҳлари китобида ёзилган. ⁶ Бааша кўз юмиб, оталарига қўшилди ва Тирзаҳда дафн этилди. Унинг ўрнига ўғли Элаҳ подшоҳ бўлди. ⁷ Аммо Ҳанани ўғли Йеҳу орқали Баашага ва унинг хонадонига қарши аллақачон Раббийнинг сўзи айтилган эди, чунки у Йеробоамнинг хонадонига тақлид қилиб, ўз қўлларининг ишлари билан Раббийни ғазаблантириб, Унинг нигоҳида ҳар қандай ёвузликни қилган эди. Айни шунинг учун Йеробоам ўлдирилган эди. ⁸ Яҳудиянинг подшоҳи Осо ҳукмронлигининг йигирма олтинчи йилида, Исроил устидан Баашанинг ўғли Элаҳ Тирзаҳда подшоҳ бўлди ва икки йил ҳукмронлик қилди. ⁹ Жанг араваларининг ярмининг устидан бошлиқ бўлган унинг хизматкори Зимри унга қарши фитна уюштирди. Элаҳ Тирзаҳда, Тирзаҳдаги қаср устидан бошлиқ Арзанинг уйида маст бўлгунича ичганида, ¹⁰ Зимри кириб, уни яралади ва Яҳудия подшоҳи Осо ҳукмронлигининг йигирма еттинчи йилида уни ўлдирди ҳамда унинг ўрнига подшоҳ бўлди. ¹¹ У подшоҳ бўлганида ва Башаанинг тахтига ўтирганида, шунда Баашанинг бутун хонадонини қириб ташлади ва у бирорта деворга сиядиган кишини: унинг қариндошларини ҳам, ошналарини ҳам қолдирмади. ¹² Шундай қилиб, Раббий пайғамбар Йеҳу орқали Бааша ҳақида айтилган Унинг сўзи бўйича Зимри Баашанинг бутун хонадонини қириб ташлади. ¹³ Уларнинг ўзлари қилган ва ўз бутлари билан Исроилнинг Раббий Худосини ғазаблантириб, Исроилни гуноҳга ботирган Баашанинг барча гуноҳлари ва унинг ўғли Элаҳнинг барча гуноҳлари учун бу содир бўлди. ¹⁴ Элаҳнинг қолган фаолияти ва унинг барча қилган ишлари Исроил подшоҳлари китобида ёзилган. ¹⁵ Яҳудиянинг подшоҳи Осо ҳукмронлигининг йигирма еттинчи йилида, Зимри Тирзаҳда етти кун подшоҳ бўлди. Бу вақтда халқ пелиштликларнинг Гиббетон шаҳрини қамал қилаётган эди. ¹⁶ Қамал қилаётган халқ эса Зимри фитна уюштириб, подшоҳни ўлдирганини эшитганларида, исроилликларнинг ҳаммаси шу куни лашкарбоши Омрини қароргоҳда Исроил устидан подшоҳ қилиб қўйди. ¹⁷ Омри ва исроилликларнинг барчаси у билан бирга Гиббетондан чиқиб бориб, Тирзаҳни қамал қилдилар. ¹⁸ Зимри шаҳар қўлга олинганини кўриб, подшоҳ уйининг ичкари хонасига кирди-да, ўзининг ортидан подшоҳнинг уйига ўт қўйди ва ҳалок бўлди. ¹⁹ У Йеробоамнинг йўлидан ва Исроилни гуноҳга ботириш учун қилган гуноҳларида юриб Раббийнинг нигоҳида ёвуз ишларни қилгани ҳамда қилган гуноҳлари учун бу содир бўлди. ²⁰ Зимрининг қолган фаолияти ва у уюштирган унинг фитнаси Исроил подшоҳлари китобида ёзилган. ²¹ Шунда Исроил халқи иккига бўлинди: халқнинг ярми Гинафнинг ўғли Тибнини подшоҳ қилиш учун унинг ортидан эргашди, ярми эса Омрига эргашди. ²² Бироқ Омрига эргашган халқ Гинаф ўғли Тибнига эргашган халқдан устун келди: Тибни ўлди ва Омри подшоҳ бўлди. ²³ Яҳудиянинг подшоҳи Осо ҳукмронлигининг ўттиз биринчи йилида Омри Исроил устидан подшоҳ бўлди ва ўн икки йил ҳукмронлик қилди. У Тирзаҳда олти йил ҳукмронлик қилди. ²⁴ Омри Семердан Самария тоғини икки талант кумушга сотиб олди. У тоғда шаҳар қурди ва қурган шаҳрини тоғнинг эгаси Семернинг исми бўйича Самария, деб атади. ²⁵ Бироқ Омри Раббий нигоҳида ёвуз ишларни, ундан олдин бўлганларнинг барчасидан баттар ҳам ишларни қилар эди. ²⁶ Зеро у Небат ўғли Йеробоамнинг барча йўлларидан бориб, ўз бутлари билан Исроилнинг Раббий Худосини ғазаблантирар ва Исроилни гуноҳга ботирган унинг гуноҳларида юрар эди. ²⁷ Омрининг қилган бошқа ишлари ва кўрсатган унинг жасорати Исроил подшоҳлари йилномаси китобида ёзилган. ²⁸ Омри кўз юмиб, оталарига қўшилди ва Самарияда дафн этилди. Унинг ўрнига ўғли Ахаб подшоҳ бўлди. ²⁹ Яҳудиянинг подшоҳи Осо ҳукмронлигининг ўттиз саккизинчи йилида Омрининг ўғли Ахаб Исроил устидан подшоҳ бўлди ва Омрининг ўғли Ахаб Самарияда Исроил устидан йигирма икки йил ҳукмронлик қилди. ³⁰ Омрининг ўғли Ахаб Раббий нигоҳида ундан олдин бўлганларнинг барчасидан ортиқроқ ёвуз ишларни қилар эди. ³¹ Небат ўғли Йеробоамнинг гуноҳларида юриш у учун камлик қилганидек, у ўзига Сидўн подшоҳи Этбаалнинг қизи Йезебелни хотинликка олди. Шунинг учун у Баалга хизмат қилиб, унга сажда қила бошлади. ³² У Самарияда қурган Баалнинг бутхонасида Баалга қурбонгоҳ қўйди. ³³ Шунингдек, Ахаб Аштаротга эманзор қилди. Шу тарзда, Ахаб ундан олдин бўлган барча Исроил подшоҳларидан ортиқроқ Исроилнинг Раббий Худосини ғазаблантирадиган ишларни қилди. ³⁴ Унинг кунларида бейт-эллик Ҳиэл Йерихони қурди. Раббий Нўн ўғли Йешуа орқали айтган сўзи бўйича, у ўз тўнғичи Абирамни йўқотиб, Йериҳоннинг пойдеворини қўйди ва ўзининг кенжа ўғли Сегубни йўқотиб, унинг дарвозасини қўйди.