9 ¹ Мен ҳаворий эмасманми? Мен эркин эмасманми? Раббимиз Исо Масиҳни кўрган эмасманми? Сизлар Раббимда қилган меҳнатим эмасмисизлар? ² Агар бошқалар учун мен ҳаворий бўлмасам, сизлар учун ҳаворийдирман, чунки менинг ҳаворийлигимнинг муҳри – Раббийда бўлган сизларсиз. ³ Мени синаётганларга қарши менинг ҳимоям шундайдир! ⁴ Наҳотки бизнинг еб-ичишга ҳуқуқимиз бўлмаса? ⁵ Наҳотки бизнинг ҳам бошқа ҳаворийлар, Раббий Исонинг укалари ва Кифага ўхшаб, имонли бир хотинни ўзимизга умр йўлдош қилиб олишга ҳуқуқимиз бўлмаса? ⁶ Ёки фақат мен ва Барнабо ишламаслик ҳуқуқидан маҳруммизми? ⁷ Ким ўз ҳисобидан аскарлик қилади? Ким ток ўтқазиб, унинг мевасидан емайди? Ким пода боқиб, поданинг сутини ичмайди? ⁸ Мен буни фақат инсонларга оид айтяпманми? Қонун ҳам шуни айтмаяптими? ⁹ Зеро Мусонинг Қонунида ёзилган: “Ғалла янчаётган ҳўкизнинг оғзини тўсма”. Худо ҳўкизлар ҳақида ғамхўрлик қиляптими ¹⁰ ёки У буни шахсан биз учун айтяптими? Шубҳасиз, булар биз учун ёзилган, чунки ер ҳайдаётган умид билан ҳайдаши керак ва ғалла янчаётган ўз улушини олиш умиди билан ишлаши керак. ¹¹ Агар биз сизларнинг ҳаётингизга руҳий нарса экиб, сизлардан моддий нарсани ўриб олсак, бу катта ишми? ¹² Агар бошқалар сизларнинг устингиздан ҳокимиятга эга бўлсалар, биз кўпроқ эга эмасмизми? Бироқ биз бу ҳокимиятдан фойдаланмадик. Аксинча, Масиҳнинг Хушхабарига тўсиқ қўймаслик учун ҳаммасига бардош бериб чидамоқдамиз. ¹³ Билмайсизларми, руҳонийлик қилувчилар маъбаддан озиқланадилар ва қурбонгоҳ олдида хизмат қилувчилар қурбонгоҳдан улуш оладилар. ¹⁴ Худди шундай, Раббий ҳам Хушхабарни воизлик қилувчиларга бу меҳнатдан кун кечиришларини буюрган. ¹⁵ Лекин мен шу нарсаларнинг ҳеч биридан фойдаланмадим. Менга шундай қилишлари учун буларни ёзаётганим йўқ, чунки кимдир мени бу мақтовимдан маҳрум қилишидан кўра, мен учун ўлишим афзалроқдир. ¹⁶ Агарда мен Хушхабарни воизлик қилсам ҳам, бу билан мақтанишимга асос йўқ, чунки бу менинг зиммамга юкланган мажбуриятдир. Аммо Хушхабарни воизлик қилмасам, менинг ҳолимга вой! ¹⁷ Чунки агар мен буни ихтиёрий равишда қилсам, шунда мукофотга эга бўламан. Лекин буни ўз иродамга қарши қилаётган бўлсам, унда менга топширилганини бажараётган бўламан, холос. ¹⁸ Бу ҳолда менга қандай мукофот бўлади? Мукофотим эса шундай: Хушхабарни воизлик қилаётганимда, Масиҳнинг Хушхабарини маошсиз тарқатиб, Хушхабарда эга бўлган ҳуқуқларимдан фойдаланмаяпман. ¹⁹ Мен ҳамма одамлардан озод бўлсам ҳам, кўпроқ одамга эришиш учун ўзимни ҳаммага қул қилдим. ²⁰ Мен яҳудийларга эришиш учун яҳудийларга яҳудийдек бўлдим. Мен Қонун остида бўлганларга эришиш учун уларга Қонун остида бўлгандек бўлдим. ²¹ Мен қонунсизларга эришиш учун уларга қонунсиздек бўлдим, лекин мен Худо олдида қонунсиз эмасман, аксинча, Масиҳнинг Қонунига бўйсунаман. ²² Мен заиф бўлганларга эришиш учун заифларга заифдек бўлдим. Шундай қилиб, мен баъзиларни қутқарай, деб ҳамма учун ҳамма нарса бўлдим. ²³ Буни мен Хушхабар учун қиляпман, токи унинг шериги бўлайин. ²⁴ Наҳотки билмасангизлар, масофага югураётганларнинг ҳаммаси югуради-ю, аммо бир киши мукофот олади. Сизлар ҳам мукофот олиш учун югуринглар. ²⁵ Мусобақада курашадиган ҳар бир одам ўзини ҳамма нарсадан тияди. Улар буни чирийдиган тож олиш учун, биз эса чиримайдиган тож олиш учун қиламиз. ²⁶ Шунинг учун мен ҳам мақсадсиз югураётгандай югурмаяпман, ҳавони ураётгандай муштламаяпман, ²⁷ лекин ўз танамни бўйсундириб, ўзимга қул қиляпман, токи бошқаларга воизлик қилиб, ўзим нолойиқ, деб топилмайин.