6 ¹ Сизларда бирининг бошқасига даъвоси бўлганида, муқаддаслар ҳузурида эмас, бетавфиқлар ҳузурида суд қилишга қандай ҳаддингиз сиғди? ² Бу дунёни муқаддаслар ҳукм қилишини наҳотки билмасангизлар? Агар сизлар дунёни ҳукм қиладиган бўлсангизлар, наҳотки бундай аҳамиятсиз ишларни ҳукм қилишга муносиб бўлмасангизлар? ³ Биз фаришталарни ҳукм қилишимизни билмайсизларми? Янада кўпроқ, тирикчилик ишларини ҳукм қила олмаймизми? ⁴ Сизлар эса тирикчилик ишлари ҳақида даъволашиб, Жамоат учун ҳеч қандай аҳамиятга эга бўлмаган одамларни ўзларингизга қози қилиб қўймоқдасизлар. ⁵ Буларни сизларнинг уялишингиз учун айтяпман. Наҳотки орангизда бирон бир доно киши бўлмаса? Наҳотки у ўз биродарлари орасида қози бўла олмаса? ⁶ Бироқ биродар ўз биродари билан даъволашмоқда-ю, бунинг устига, имонсизлар олдида! ⁷ Ҳар ҳолда, бир-бирингиз билан даъволашишингизнинг ўзи ҳам сизлар учун тамоман мағлубиятдир. Ноҳақликка чидаб туришингиз сизлар учун яхшироқ эмасми? Бирор нарсангиздан маҳрум бўлиб қолишингиз сизлар учун яхшироқ эмасми? ⁸ Лекин сизлар ўз биродарларингизга ноҳақлик қилиб, улардан тортиб оляпсизлар. ⁹ Ноҳақлар Худонинг Шоҳлигини мерос қилиб олмасликларини билмайсизларми? Алданманглар: на бузуқлар, на бутпарастлар, на зинокорлар, на эркак-фоҳишлар, на баччабозлар, ¹⁰ на ўғрилар, на тамагирлар, на ичкиликбозлар, на ғийбатчилар, на талончилар Худонинг Шоҳлигини мерос қилиб олмайдилар. ¹¹ Сизларнинг баъзиларингиз ҳам шундай эдингизлар, лекин Раббий Исо Масиҳнинг номи ҳамда Худойимизнинг Руҳи билан ювилдингизлар, муқаддасландингизлар ва оқландингизлар. ¹² Менга ҳамма нарса жоиз экан, лекин ҳамма нарса ҳам фойдали эмас. Менга ҳамма нарса жоиз экан, лекин ҳеч бир нарса менинг устимдан ҳукмрон бўлмаслиги керак. ¹³ Овқат қорин учун, қорин ҳам овқат учундир, аммо Худо уни ҳам, буни ҳам йўқ қилади. Тана эса зино учун эмас, лекин Раббий учундир, Раббий эса тана учундир. ¹⁴ Раббийни тирилтирган Худо бизни ҳам Ўз қудрати билан тирилтиради. ¹⁵ Сизларнинг таналарингиз Масиҳнинг аъзолари эканлигини билмайсизларми? Шундай қилиб, Масиҳнинг аъзоларини олиб, фоҳишанинг аъзолари қилар эканманми? Йўқ, асло! ¹⁶ Фоҳиша билан қовушган одам у билан бир тан бўлишини билмайсизларми? Чунки: “Иккови бир тан бўлади”,- деб айтилган. ¹⁷ Раббий билан бирлашган эса У билан бир руҳ бўлади. ¹⁸ Зинодан қочинглар! Инсон қиладиган ҳар қандай гуноҳ танадан ташқарида бўлади, зино қилувчи эса ўз танасига қарши гуноҳ қилади. ¹⁹ Энди нима? Таналарингиз – сизлар Худодан қабул қилган ва ичингизда бўлган Муқаддас Руҳнинг маъбади эканлигини билмайсизларми? Энди сизлар ўзингизники эмассизлар, ²⁰ чунки сизлар қимматбаҳо нарх билан сотиб олингансизлар. Шунинг учун Худоники бўлган танангиз ва руҳингизда Худони улуғланглар.