12 ¹ Биродарларим, сизларни руҳий инъомлар ҳақида билимсиз қолишингизни хоҳламайман. ² Биласизларки, мажусий бўлганингизда, сизларни худди етаклаб олиб боришганидай, гунг бутларга борар эдингизлар. ³ Шунинг учун сизларга шундай тушунча бераман: Худонинг Руҳи билан гапираётган ҳеч ким Исога лаънат айтмайди ва ҳеч ким Муқаддас Руҳсиз Исони Раббим, деб атай олмайди. ⁴ Инъомлар ҳар хил, лекин Руҳ ўша-ўшадир. ⁵ Хизматлар ҳам ҳар хил, лекин Раббий ўша-ўшадир. ⁶ Фаолиятлар ҳам ҳар хил, лекин ҳаммада ҳамма нарсани ҳаракатга келтирадиган Худо ўша-ўшадир. ⁷ Аммо Руҳнинг намоён бўлиши ҳар бирига манфаат учун берилади. ⁸ Кимгадир Руҳ томонидан донолик сўзи берилади, бошқага эса худди ўша Руҳ томонидан билим сўзи берилади. ⁹ Яна кимгадир худди ўша Руҳ томонидан имон, бошқага эса худди ўша Руҳ томонидан шифокорлик инъомлари берилади. ¹⁰ Кимгадир мўъжизакорлик куч-қудрати, бошқага эса пайғамбарчилик берилади. Кимгадир руҳларни фарқлаш, бошқага ҳар хил тиллар, яна бошқага тилларни талқин қилиш инъомлари берилади. ¹¹ Бироқ буларнинг ҳаммасини ўша битта Руҳ келтириб чиқаради. У Ўзи хоҳлагани бўйича буларни ҳар кимга алоҳида тақсимлайди. ¹² Бир танада кўп аъзолар бор. Тананинг аъзолари кўп бўлса ҳам, улар бир танани ташкил қилади. Масиҳ ҳам худди шундайдир. ¹³ Биз эса – яҳудийми, юнонми, қулми, эркинми – ҳаммамиз ўша битта Руҳ билан ягона Масиҳнинг Танасига чўмганмиз ва ҳаммамиз ўша битта Руҳдан суғорилганмиз. ¹⁴ Тана эса битта аъзодан эмас, балки кўп аъзолардан иборатдир. ¹⁵ Агар оёқ: “Мен қўл бўлмаганим учун танага тегишли эмасман”,- деб айтса, унда наҳотки у танага тегишли бўлмай қолса? ¹⁶ Агар қулоқ: “Мен кўз бўлмаганим учун танага тегишли эмасман”,- деб айтса, унда наҳотки у танага тегишли бўлмай қолса? ¹⁷ Агар бутун тана кўз бўлганида эди, эшитиш қаерда бўлар эди? Агар бутун тана қулоқ бўлганида эди, ҳид сезиш қаерда бўлар эди? ¹⁸ Лекин Худо аъзоларнинг ҳар бирини танада Ўзи хоҳлаганидек жойлаштирди. ¹⁹ Агарда ҳаммаси битта аъзо бўлганида эди, тана қаерда бўлар эди? ²⁰ Аммо энди аъзолар кўп, тана эса биттадир. ²¹ Кўз қўлга: “Сен менга керак эмассан”, ёки бош оёқларга: “Сизлар менга керак эмассизлар”,- деб айта олмайди. ²² Аксинча, тананинг энг заиф бўлиб кўринадиган аъзолари жуда кераклидир. ²³ Танамизнинг иззатсиз туюлган аъзоларини кўп иззат билан буркаймиз. Хунук аъзоларимизга эса янада кўпроқ кўрк берамиз. ²⁴ Лекин кўркам аъзоларимизнинг бунга муҳтожлиги йўқ. Аммо камчиликка эга бўлган аъзоларга кўпроқ иззат бериб, Худо бутун танани мувофиқлаштирди, ²⁵ токи танада бўлиниш бўлмасин, аксинча, ҳамма аъзолар бир-бирига бир хил ғамхўрлик қилсинлар. ²⁶ Агар бир аъзо азоб чекса, барча аъзолар у билан бирга азоб чекадилар. Агар бир аъзо улуғланса, барча аъзолар у билан бирга қувонадилар. ²⁷ Шундай қилиб, сизлар – Масиҳнинг Танасисизлар, ҳар бирингиз алоҳида – аъзосизлар. ²⁸ Худо эса баъзиларни Жамоатда биринчидан ҳаворийлар, иккинчидан пайғамбарлар, учинчидан муаллимлар қилиб қўйди. Яна баъзиларга мўъжизакорликни, бошқаларга эса шифокорлик, ёрдам бериш, бошқариш, турли тиллар инъомларини берди. ²⁹ Ҳамма ҳам ҳаворийми? Ҳамма ҳам пайғамбарми? Ҳамма ҳам муаллимми? Ҳамма ҳам мўъжизакорми? ³⁰ Ҳамма ҳам шифокорлик инъомларига эгами? Ҳамма ҳам номаълум тилларда гапирадими? Ҳамма ҳам талқин қиладими? ³¹ Лекин каттароқ инъомлар учун рашк қилинглар. Мен эса сизларга янада афзалроқ йўлни кўрсатаман: