11
1
Мен Масиҳга тақлид қилганимдай, сизлар ҳам менга тақлид қилинглар.
2
Биродарларим, мен сизларни мақтаяпман, чунки сизлар ҳамма нарсада мени эслаяпсизлар ва мен сизларга анъаналарни топширганимдай, худди шундай буларга риоя қиляпсизлар.
3
Яна шуни билишингизни истайманки, ҳар бир эркакнинг боши – Масиҳ, хотиннинг боши – эркак, Масиҳнинг боши эса Худодир.
4
Бошини ёпиб ибодат қилаётган ёки пайғамбарчилик қилаётган ҳар бир эркак ўз бошини шарманда қилади.
5
Бошини ёпмасдан ибодат қилаётган ёки пайғамбарчилик қилаётган ҳар бир хотин ўз бошини шарманда қилади, чунки шу тариқа у ўз сочларини қириб ташлаганга ўхшаб қолади.
6
Чунки агар хотин бошини ёпмаса, унда сочларини ҳам қирқиб ташласин. Лекин агар хотинга сочларини қирқиб ташлаш ёки қириб ташлаш уят бўлса, унда бошини ёпсин.
7
Шундай қилиб, эркак бошини ёпмаслиги керак, чунки у Худонинг тасвири ва шуҳратидир. Хотин эса эркакнинг шуҳратидир.
8
Чунки эркак хотиндан эмас, балки хотин эркакдандир,
9
ҳамда эркак хотин учун эмас, балки хотин эркак учун яратилгандир.
10
Шунинг учун хотин фаришталар ҳақи ўз боши устида ҳокимликка эга бўлиши керак.
11
Бироқ Раббийда эркак хотиндан мустақил эмас, хотин эса эркакдан мустақил эмас.
12
Чунки хотин эркакдан бўлганидай, худди шундай эркак ҳам хотин орқалидир. Лекин ҳаммаси Худодандир.
13
Ўзларингиз ўйлаб кўринглар: хотин бошини ёпмасдан, Худога ибодат қилиши одобданми?
14
Агар эркак сочини ўстирса, бу эркак учун уят эканлигини табиатнинг ўзи ҳам сизларга уқтирмаяптими?
15
Лекин хотин сочларини ўстирса, бу унинг шуҳратидир, чунки соч унга ёпинчиқ сифатида берилган.
16
Агар бирор киши баҳслашмоқчи бўлса, билсинки, бизда ҳам, Худонинг Жамоатида ҳам бундай одат йўқ.
17
Энди, қуйидаги кўрсатмаларимда сизларни мақтамайман, чунки сизлар яхшироқ нарса учун эмас, лекин ёмонроқ нарса учун йиғиляпсизлар.
18
Чунки, биринчидан, сизлар Жамоатда йиғилганингизда, орангизда бўлаётган бўлинишлар ҳақида эшитяпман. Мен бунга қисман ишонаман.
19
Сизларнинг орангизда бидъатлар ҳам бўлиши керак, шу орқали орангизда асллари намоён бўлади.
20
Кейин, сизлар бир жойда йиғилганингизда, Раббийнинг кечлигига йиғилганга ўхшамаяпсизлар.
21
Чунки ҳар бир киши бошқалардан олдин кечликдаги ўз овқатини тезроқ еб қўймоқда. Шунинг учун бири оч қолади, бошқаси эса маст бўлади.
22
Наҳотки ейиш ва ичиш учун уйларингиз бўлмаса? Ёки сизлар Худонинг Жамоатини менсимай, камбағалларни камситяпсизларми? Сизларга нима десам экан? Сизларни мақтайми? Йўқ, мақтамайман.
23
Зеро мен сизларга топширганимни Раббийдан олганман: Раббий Исо хоинона тутиб берилган тунда нонни олди
24
ва шукрона айтиб, уни синдириб, деди: “Олиб енглар, бу Менинг сизлар учун синдирилаётган танамдир. Мени эслаб туриш учун буни қилинглар”.
25
Шунингдек, кечликдан кейин косани ҳам олиб: “Бу коса – Менинг қонимдаги Янги Аҳддир. Ундан ҳар сафар ичаётганингизда, Мени эслаб туриш учун буни қилинглар”,- деди.
26
Шундай қилиб, сизлар ҳар доим бу нонни еганингизда ва бу косадан ичганингизда, Раббий келгунига қадар Унинг ўлимини эълон қилган бўласизлар.
27
Шунинг учун, кимки номуносиб тарзда бу нонни еса ёки Раббийнинг косасидан ичса, Раббийнинг танаси ва қонига қарши гуноҳ қилган бўлади.
28
Ҳар бир инсон ўзини текширсин, шундагина бу нондан есин ва бу косадан ичсин.
29
Чунки кимки номуносиб тарзда еб-ичса, у Раббийнинг танаси ҳақида мулоҳаза қилмасдан, ўзига маҳкумликни еб-ичади.
30
Шу сабабдан сизларнинг кўпларингиз заиф ва касалсизлар, ҳатто ўлганлар ҳам оз эмас.
31
Зеро агар биз ўз-ўзимизни ҳукм қилганимизда эди, маҳкум бўлмас эдик.
32
Биз бу дунё билан бирга маҳкум бўлмаслигимиз учун ҳозирги вақтда ҳукм қилиниб, Раббий томонидан жазоланмоқдамиз.
33
Шунинг учун, биродарлар, овқатланишга йиғилганларингизда, бир-бирингизни кутиб туринглар.
34
Агар кимдир оч бўлса, ўз уйида есин, токи сизларнинг йиғилишларингиз маҳкум бўлишингизга сабаб бўлмасин. Қолган нарсаларни эса мен олдингизга келганимда, тартибга соламан.