18 ¹ Шундан сўнг Довуд пелиштликларни тор-мор келтириб, уларни бўйсундирди. У Гатни ҳамда унга тегишли шаҳарларни пелиштликларнинг қўлидан тортиб олди. ² У мўабликларни ҳам тор-мор келтирди ва мўабликлар Довудга товон тўлайдиган унинг қуллари бўлдилар. ³ Зўбаҳ подшоҳи Ҳадарезер ўз ҳокимиятини Фурот дарёси бўйида ўрнатиш учун кетаётганида, Довуд уни Ҳаматда тор-мор келтирди. ⁴ Довуд ундан мингта жанговар аравани, етти минг нафар отлиқ ва йигирма минг нафар пиёдани олди. Довуд барча араваларнинг отларининг пайини кесиб, улардан фақат юзтасини қолдирди. ⁵ Дамашқдаги сурияликлар ёрдам бериш учун Зўбаҳ подшоҳи Ҳададезернинг олдига келганларида, Довуд йигирма икки минг нафар сурияликни қириб ташлади. ⁶ Сўнг Довуд Дамашқнинг Суриясига қўриқчи қўшинни қўйди ва сурияликлар Довудга товон тўлаб, унинг қулларига айландилар. Довуд қаерга бормасин, ҳамма ерда Раббий унга ёрдам берар эди. ⁷ Довуд Ҳадарезернинг қулларида бўлган олтин қалқонларни олиб, уларни Йерусалимга олиб келди. ⁸ Довуд Ҳададезернинг шаҳарлари Тибҳаф ва Кундан ҳам жуда кўп мисларни олиб келди. Сулаймон улардан мис денгиз, устунлар ва мис идишлар ясади. ⁹ Ҳаматнинг подшоҳи Фой эса Зўбаҳ подшоҳи Ҳадарезернинг бутун қўшинини Довуд қириб ташлаганини эшитганида, ¹⁰ ўз ўғли Ҳадорамни Довуднинг олдига, уни қутлашга юборди. Довуд Ҳадарезер билан жанг қилиб, уни қириб ташлагани учун Фой миннадорчилик билдирмоқчи эди, чунки Фой Ҳадарезер билан урушиб турар эди. У Ҳадорам билан бирга ҳар хил олтин, кумуш ва мис идишлар юборди. ¹¹ Подшоҳ Довуд барча халқлардан: эдўмликлардан, мўабликлардан, аммўнликлардан, пелиштликлардан, амолеқликлардан олган кумуш ва олтинлари билан бирга буларни ҳам Раббийга бағишлади. ¹² Боз устига, Зеруйаҳнинг ўғли Абишай Туз водийсида ўн саккиз мингта эдўмликни қириб ташлади. ¹³ У Эдўмда қўриқчи қўшинни қўйди ва барча эдўмликлар Довуднинг қулларига айландилар. Довуд қаерга бормасин, ҳамма ерда Раббий унга ёрдам берар эди. ¹⁴ Шундай қилиб, Довуд бутун Исроил устидан ҳукмронлик қилар ва ўзининг бутун халқи устидан ҳукмни ҳамда ҳақиқатни амалга оширар эди. ¹⁵ Зеруйаҳнинг ўғли Йўаб лашкарбоши, Аҳилуднинг ўғли Йеҳошафат эса тарихчи эди. ¹⁶ Аҳитубнинг ўғли Садок ва Абиатарнинг ўғли Абумалек руҳонийлар эдилар, Шавша эса котиб эди. ¹⁷ Йеҳойаданинг ўғли Бенайаҳ қерайтиликлар ва пелетликларнинг устидан бошлиқ эди, Довуднинг ўғиллари эса подшоҳнинг қошида биринчилар эдилар.