10 ¹ Пелиштликлар Исроилга қарши уруш қилдилар, исроилликлар пелиштликлардан қочиб кетдилар ва Гилбоаҳ тоғида қуладилар. ² Пелиштликлар Шоул ва унинг ўғиллари ортидан таъқиб қилиб, Шоулнинг ўғиллари Йўнатанни, Абинадабни, Малхкишуани ўлдирдилар. ³ Шоулга қарши бўлган уруш кучайди, камончилар унга ташландилар ва уни камончилар яраладилар. ⁴ Шунда Шоул ўзининг қурол ташувчисига: “Ўз қиличингни яланғочлагин. Бу хатна қилинмаганлар келиб, мени ҳақоратламасликлари учун қиличингни менга санчгин”,- деди. Аммо қурол ташувчининг бундай қилишга ҳадди сиғмади, чунки у жуда қўрқиб қолган эди. Шунда Шоул қилични олиб, унинг устига йиқилди. ⁵ Унинг қурол ташувчиси Шоулнинг ўлганини кўрганида, ўзи ҳам қилич устига йиқилди ва ўлди. ⁶ Шундай қилиб, Шоул ва унинг уч нафар ўғли ҳам ўлди. У билан бирга унинг бутун хонадони ҳалок бўлди. ⁷ Водийда бўлган исроилликлар ҳамманинг қочиб кетаётганини, Шоул ва унинг ўғиллари ўлганини кўрганларида, ўз шаҳарларини қолдириб, қочиб кетдилар. Пелиштликлар эса келиб, уларга жойлашдилар. ⁸ Пелиштликлар эртаси куни ўлдирилганларни талон-тарож қилиш учун келганларида, Гилбоаҳ тоғида қулаган Шоулни ҳамда унинг ўғилларини топдилар. ⁹ Улар уни ечинтириб, бошини ва унинг қуролини олдилар. Бу ҳақида бутлари қаршисида ва халқ олдида эълон қилиш учун Пелишт ери бўйлаб элчиларни юбордилар. ¹⁰ Улар унинг қуролини ўз худоларининг уйига жойлаштирдилар ва унинг бошини Дагон бутхонасига санчиб қўйдилар. ¹¹ Гилъаддаги бутун Йобешнинг аҳолиси пелиштликлар Шоулни нима қилганларининг барчасини эшитди. ¹² Шунда барча жасур кишилар кўтарилиб, Шоул ва унинг ўғилларининг таналарини олдилар, уларни Йобешга келтирдилар. Шунда уларнинг суякларини Йобешдаги эман дарахти остига кўмиб, етти кун рўза тутдилар. ¹³ Шундай қилиб, Шоул Раббий қаршисида қилган ўзининг қонунбузарлиги туфайли ўлди, чунки у Раббийнинг сўзларига амал қилмай, ўликларнинг руҳини чақирувчига саволлар билан мурожат қилди, ¹⁴ Раббийдан эса сўрамади. Шунинг учун ҳам У уни ўлдирди ва шоҳликни Йишийнинг ўғли Довудга топширди.