MA ME PAJALUK JKOT'ANTIK SOK TE MACH'ATIK AYIK TA BALUMILALE. ¹ ¿Banti ya xtal awalik te k'op te ya atsak abaik yu'une? ¿Ma ba jauk ta sbik'tal awot'anik te ya atsak abaik sok spisil te abak'etalike? ² Te ja'exe ya ak'anik te beluk mayuk awu'unike. Te ja'exe ya xmilwanex sok ja ya at'unik te beluk ma xju' awu'unik staele. Ya atsak abaik sok ya awut abaik, ma ataik te beluk ya ak'anike melel ma jauk ya ak'anbeyik te Diose. ³ Te ja'exe ya ak'anik jauk me to ma x-ak'botex, melel ma ana'ik sk'anel, ja ya ak'anik te beluk ya sk'an te abak'etalike. ⁴ ¡Ja'ex te mulawilexe! ¿Ma ba ana'ik teme jun awot'anik sok te balumilale ja la akontroinik te Dios abi? jich yu'un, te mach'a la snop sjoin sba sok te balumilale ja me la skontroin te Dios abi. ⁵ ¿Yu'un ba akuyojik te mayuk swentail te beluk ts'ibubil te k'alal la yal te la yak'botik te Ch'ul Espíritu ta jtojoltik, te ja la sk'anotik ta k'axem to xane? ⁶ Jauk me to te Diose ya yak' xan bayal yutsil yot'an, ja yu'un te jich ts'ibubil jilele: "TE DIOSE MA SK'AN TE MACH'A YA STOY SBAE, YAN TE MACH'A PEK'EL YAK'OJ SBAE YA STA UTSILAL." ⁷ Jich yu'un, k'axel xa awak' abaik ta stojol te Diose. Pasaik ta kontro te pukuje jich me ya xlok' bael ta anel ta atojolik. ⁸ Noptsajanik tel ta stojol te Diose, jich me ya x-oxtaj tel ta atojolik uuk. Sapaik te ak'abik, ja'ex te mulawilexe, lekuk me ay te awot'anik, ja'ex te chalam awot'anike. ⁹ ¡Mel-awot'anik, sut awot'anik sok ok'anik yu'un! Te atseejike aka k'atbujuk ta ok'el, te sbujts' awot'anike aka k'atbujuk ta mel-ot'an. ¹⁰ Bik'tajanik ta stojol te Diose, jich me ya awich'ik toyesbel ak'oplalik yu'un. ¹¹ Kermanotak ma me alebey aba amulik. Te mach'a ya slebey smul te yermanoe sok teme la slikbey smule, ja la skontro-k'optayix a te mantalile, sok ja la slikix mulil ta stojol Dios abi. Teme ja'at kajal la awak' aba yu'un te mantalile, ma me yakat ta xch'uunel te mantalile, ja me yakat ta slikel mulik abi . ¹² Jauk me to janax ay tul te mach'a ya slik te mulile sok te yak'oj te mantalile, ja te Diose, ja ay yu'el yu'un te ya xkoltaywane sok te ya xjinwane. ¿Mach'a ya akuy aba te ja'at te ya alikbey smul te awermanoe? ¹³ Aya awaiyik stojol, te ja'ex te jich ya awalike: "Ta ora to sok te pajele ya me xbootik ta banti jun muk'ul pam lum, sok ya me xjalajotik junuk ja'wil le'a, ya me jkaiytik chombajel, sok ya me jtatik tak'in le'a. ¹⁴ ¿Mach'a ya sna te beluk ya xk'ot ta pasel te pajele, jalbal k'aal ya akuyik te ya xkuxinexe? Melel te ja'ate jich k'oemat te bit'il te sabul te balumilale te ajk'nax ya xtup' baele. ¹⁵ Jauk me to jich me ya sk'an ya awalik: "Teme jich sk'anjel yot'an te Kajwaltike, ya me xkuxinotik sok ya me jpastik in to." ¹⁶ Jauk me to te ja'exe janax ya atoy abaik yu'un te beluk ya achapike. Spisil te toybajele malekuk. ¹⁷ Jich yu'un te mach'a ya sna' spasel te beluk leke, jauk me to teme ma la spase; la staix smul abi.