YA YICH'IK AK'BEL SNA'IK STOJOL TE K'ULEJETIKE. ¹ Laik me ta ora, ja'ex te k'ulejexe, awunanik me ta ok'el yu'un te wokolil te kechel ya xtal ta atojolike. ² Te ja k'ulejalike k'aemix stukel sok lajemix ta joch' te ak'u'-apak'ike. ³ Te oro sok te plata awu'unike mayukix stuul, sok te bit'il tsaek'ubenixe ja me ya yak'ex ta k'abal sok ya me slajimbeyex abak'etalik jich te bit'il k'ajk'e. Te ja'exe ja la atsobik te ak'ulejalik manchuk me slajibalix k'aal. ⁴ Ilawilik, te yakik ta ok'el te mach'atik at'ejik ta ak'inalik te la yaiyik k'ajoje, melel ma ba la atojik, tulan yakik ta ok'el. Te yok'elik te mach'a la sk'ajik te awlile k'otix ta xchikin te Kajwaltik te spisil ya xju' yu'une. ⁵ Te ja'exe kuxulatik ta lek ta sba te balumilale sok te bit'il ja la apasik te beluk la sk'an awot'anike. Te ja'exe jich k'oemex te bit'il wakax te neel ya yich' jujbtesel, te nopol ya xbajt' ta milele. ⁶ Te ja'exe la alebeyikix smulik sok ja la amilikix te mach'atik toj yat'elike, ja te mach'a ma la sk'an skoltay sbaik ta k'ope. ⁷ Jauk me to ayuk me smalib awu'unik, jkermanotak, ja to te bin ora ya xcha' tal te Jkajwaltike, jichukex me te bit'il mach'a yat'elinoj sk'alteyel te sk'inale, jun me yot'an yak ta smaliyel te bin ora ya sk'ajbey te sit te awlil te la sts'une sok ay me bayal smalib yu'un, te bin ora ya xtal te ja'ale. ⁸ Jichukex me uuk, ayuk me bayal smalib awu'unik; Chajp'anameik ta lek te awot'anike, melel nopol ya xcha' sujt' tel te Jkajwaltike. ⁹ Jkermanotak ma me xa aleuley abaik ta k'op, jich me ma xk'axex ta chajp'anel a. Ilawilik, tek'el meix ta ti'nail te mach'a ya slik te mulile. ¹⁰ Jauk me ya anopik jkermanotak, te bit'il k'ax swokolik sok te bayal smalib yu'unik te alwanejetik te k'opojik ta sbiil te Jkajwaltik ta namey k'inale. ¹¹ Ilawilik, te jo'otike jich me ya jkalbeytik te mach'atik ma xlujp'ike, "ch'ultesbilik me." Te ja'exe ay la awaiyikix stojol sk'oplal te Job te bit'il la sts'ik spisil te swokole sok nix ya ana'ik te Jkajwaltik te ay beluk xchajp'anojbeyix a te Jobe, melel te Jkajwaltike nojel ta xk'uxul yot'an sok ya sna' yolil jbatik stukel. ¹² Bayal me sk'oplal in to, jkermanotak, ma me xa wak'ik ta testigo te ch'ulchan-balumilale, sok ma me ayuk yan te beluk ya awak'ik ta testigoe. Te k'alal ya xk'opojexe, "Yak" xaex me teme jiche, teme majichuke "jooj", xiex me, jich me ma awich'ik kastigo abi. ¹³ ¿Ay bal mach'a yak k'axel swokol? aka me sk'opon te Diose. ¿Ay bal mach'a binax yot'an? aka me sk'ajintey te Diose. ¹⁴ ¿Ay bal mach'a ay ta chamel? aka me yik' tel te ancianoetik yu'un te sna te Diose, sok yakuk me sk'oponbeyex Dios, sok te yakuk yak'beyex aceite ta swenta sbiil te Kajwaltike. ¹⁵ Teme ay xch'uunjel yot'anik te k'alal ya sk'oponik te Diose, jich me ya xkol te mach'a ay ta chamele, sok ya me xjajch'esot yu'un te Jkajwaltike. Teme ay staoj smule, ya me spasbot perdón yu'un te Diose. ¹⁶ Jich yu'un, albey abaik teme ay amulike, sok jech k'oponbeya me abaik Dios, jich me ya awich'ik poxtayel a. Te k'alal ya sk'opon Dios te mach'a toj yot'ane bayal yip ya xk'ot. ¹⁷ Te Elíase ch'ich'-bak'et uuk jich te bit'ilotike. La sk'opon Dios te manchuk ya yak' te ja'ale, jich ma la yak' ja'al oxeb ja'wil sok olil ta bay lum k'inal. ¹⁸ Janix jich te Elíase la xcha' sk'opon te Diose jich cha' tal te ja'al ta balumilale sok te awal ts'unubile sitin yu'un. ¹⁹ Jkermanotak, teme ay mach'a la yijk'tay xch'uunel te Diose, jauk me to, teme ay mach'a la xcha' yik' tel sujt'ele, ²⁰ na'aik me stojol, teme la awik'ik lok'el tel tul mulawil ta ba ay te ch'ayele, la me akoltaybeyix te xch'ulel abi sok la me yich' pasbel perdón spisil te smule.