BIT'IL AY SK'OPLAL TE JK'OP JKAYEJTIKE. ¹ Kermanotak ma me apisilik ya akuy abaik te ya stak' ya xbijup'teswanexe, ya me ana'ik te ja me tulan xan ya yich'ik ich'el ta k'op te mach'atik ya xbijup'teswane. ² Melel jpisiltik bayal buelta ya xch'ayotik. Teme ay tuluk te ma xch'ay sok te sk'ope. Ja in to ja tul winik te mero toje, te ya xju' stsajtebel sba sok te sbak'etale. ³ Jich yu'un teme ya jkak'beytik xchujk'il yej te kaballoetike ya me xch'uunbotik te jmantaltike, sok ya me stak' jtojtestik skojt'ol te sbak'etale. ⁴ Ilawilik uuk te barkoetike, manchuk me mero muk'ik sok manchuk me tembil yu'un tulan ik', ja tojtesbil yu'un te tsael nax te stijibale (timón), chikan te banti ya sk'an ya stij bael te mach'a yak ta stijele. ⁵ Janix jich uuk, te jkak'tike ch'in xut'il ta bay te jbak'etaltike, jauk me to ya stuy sba ta k'op. ¡Ilawilik te te bit'il ya xk'ajk' te te'eltike ja me ya xk'ajk' yu'un te ch'in snich k'ajk'e! ⁶ Janix jich te jkak'tike jich k'oem te bit'il k'ajk'e, te nojel ta mulil te ak'bil ta jbak'etaltike, te ya sk'exlaltes spisil te jbak'etaltik sok te ya xjajch' sboltes spisil te jkuxineltike, sok nix te k'ajk' te tilem tel ta bay te k'atinbake. ⁷ Spisil ta chajp' ja'mal chambalametik, te'eltik mutetik, chambalametik te ya stas sbaik ta lum sok te xchambalamul te muk'ul ja'etik te pasbilikix ta mantale sok te spasojix ta mantal te ants-winiketike, ⁸ Jauk me to mayuk tuluk winik te ya xju' ya spas ta mantal te yak'e; te ma xju' ta pasel ta mantale, te bayal sbolile sok te ya xmilwan baele. ⁹ Ta jkak'tik ya jkalbeytik yutsil sk'oplal te Jkajwaltike sok te Jtatik Diose, sok janix ya jbol k'optaytik a te ants-winiketike, te mach'a jich yilelik te bit'il te Diose. ¹⁰ Ta junax jketik ya xlok' tel te lekil k'ope sok te bolk'ope. Jkermanotak ma me jichuk ya sk'an ya jpastik. ¹¹ ¿Ya ba xju' ya xlok' lekil ja' sok ch'aal ja' ta bay slok'ib te ja'e? ¹² Jkermanotak, ¿ya ba xju' te ya yak' aceituna te higo te'e, sok ya ba xju' ya yak' higo te ts'usubil te'e? janix jich uuk ma stak' te slok'ib ja' te yich'oj atsame te ya slok'es tel te lekil ja'e. ¹³ ¿Mach'a te ay sbijil yot'an ta awolilik sok te ya xk'ot ta yot'ane? aka yak' ta ilel te lekil kuxinel te bit'il ay sbijil yot'an ta stojol te ants-winiketike. ¹⁴ Jauk me to teme ay mach'a janax baem ta yot'an te paechale sok teme ay mach'a ay sbik'tal yot'ane, ma me awich' abaik ta muk' yu'un sok ma me awaiyik lot ta skontroinel te beluk smelelile. ¹⁵ Ja in to ma jauk te bijil ot'anil te talem ta ch'ulchane, ja yu'un te balumilale, ma jauk yu'un te Ch'ul Espíritue, ja yu'un te pukuje. ¹⁶ Te banti ay te paechale, sok te sbik'tal ot'anile, ay me jinel le'a sok ja me ya spasik spisil te beluk amene. ¹⁷ Jauk me to te sbijil ot'anil te talem ta chulchane, ma kapbil ta mulil stukel, lamal me k'inal yu'un, lek me yot'an, ay yutsil yot'an, ya sna' yolil jbatik, sok lek te yat'ele, ma tsabiluk nax yu'un te ants-winike, sok smelelil ya xk'opoj. ¹⁸ Te mach'a ay lamal k'inal ta stojole, jaik me te mach'atik ya spas te beluk toj ta pasele, ja te beluk albilik yu'un te Diose.