¹ Sima na mwa tango Yesu akendaki kati na bingumba mpe mboka, koteya mpe kosakola sango malamu ya bokonzi na Nzambe. Bazomi na mibale bazalaki na ye elongo. ² Mpe lisusu basi oyo babikisamaki na milimo mabe mpe bokono: Malia, oyo abiangami Madelene, oyo milimo sambo ebimaki kati na ye, ³ Janni, mwasi ya Kuza, mobombi biloko ya Helode, Suzanni mpe ebele ya basi basusu oyo bazalaki kokokisa mposa na bango na biloko na bango. ⁴ Ntango etuluku monene ya bato bazalaki koyangana nzinga-nzinga na ye, bautaki bingumba ndenge na ndenge, ayebisaki bango lisese moko: ⁵ «Moloni moko akendaki kolona. Ntango azalaki kolona, ndambu ya mbuma mosusu ekweaki pembeni na nzela, banyati yango mpe ndeke ilei nyoso. ⁶ Ndambu mosusu ekweaki na mabanga mpe ikoli noki, ikauki zambi na kozanga mayi. ⁷ Ndambu mosusu ekweaki kati na nzube, nzube ekolaki elongo na yango mpe ezingaki yango. ⁸ Kasi ndambu mosusu ya mbuma ekweaki na mabele kitoko mpe eboti mbuma nkama na na nkama.» Sima na Yesu koloba boye, angangaki: «Oyo azali na matoyi ya koyoka, ayoka.» ⁹ Bongo bayekoli na ye batunaki ye lisese yango elakisi nini? ¹⁰ Alobi na bango: «Epesameli bino koyeba mabombami ya bokonzi na Nzambe, kasi mpo na bato mosusu, ezali na masese; mpo ete soki bazali kotala, bamona te mpe soki bazali koyoka, basosola eloko te. ¹¹ Tala ndimbola ya lisese: nkona ezali liloba ya Nzambe. ¹² Mbuma oyo ekweaki pembeni na nzela, ezali bato oyo bayoki liloba na Nzambe, mpe zabolo alongoli yango o mitema mia bango, mpo ete bakoka kondima te mpe babika te. ¹³ Oyo ekweaki na mabanga, ezali baoyo bayambi liloba na esengo, kasi bazangi misisa; bandimeli na tango moko, kasi tango na komekama, bakweisi kondima na bango. ¹⁴ Oyo ekweaki na kati na nzube, ezali baoyo bayoki liloba na Nzambe mpe na kotambola na bango, mikakatano, bomengo mpe mposa ya mokili ekangi bango mpe mbuma na bango ekomeli te. ¹⁵ Kasi oyo ekweaki na mabele kitoko, ezali baoyo bayoki liloba na motema malamu, basimbi yango makasi mpe eboti mbuma na kokanga motema.» ¹⁶ Tala , moto moko te apelisaka mwinda mpo azipa yango na mbeki to atia yango na nse ya mbeto. Kasi atiaka yango likolo mpo ete baoyo nyoso bazali kokota bamona yango. ¹⁷ Pamba te, eloko moko te ya kobombama ekozanga koyebana, mpe ya nkuku ekozanga komonana polele. ¹⁸ Boyoka na bokebi, mpo ete bakopesa oyo azali na ebele, kasi oyo azangi, bakobotola ata oyo akanisi kozwa.» ¹⁹ Na sima, mama mpe bandeko na ye bayaki koluka ye, kasi bakokaki komana ye te na ntina na etuluku ya bato. ²⁰ Bayebisi ye: «Mama na ngai mpe bandeko na yo bazali libanda, balingi komona yo.» ²¹ Yesu ayanoli bango: «Mama na ngai mpe bandeko na ngai, ezali baoyo bazali koyoka liloba na Nzambe mpe bazali kotosa yango.» ²² Mokolo moko, Yesu amataki na bwato na bayekoli naye, alobi na bango: «Toleka ngambo mosusu ya ebale.» Babandi kokenda. ²³ Ntango nazalaki kokenda, Yesu alali. Mbonge makasi ekomaki na ebale mpe bwato ebandaki kotonda mayi pene na kozinda. ²⁴ Boye bayekoli bapusanaki pene na ye mpe balamusi ye na koloba: «Molakisi! Molakisi! Tozali kokufa!» Alamuki, angangeli mopepe mpe mbonge mpe nyoso ekomi kimia. ²⁵ Mpe alobi na bango: «Wapi kondima na bino?» Batondaki na bobangi mpe kokamwa, balobani kati na bango na basusu: «Oyo azali nani, apesi mitindo na mipepe na mayi mpe yango etosi ye.» ²⁶ Bakomaki na mboka ya bageraseniens oyo etalani na Galileya. ²⁷ Ntango bakiti na bwato, mobali moko azalaki na milimo mabe o engumba yango, ayei kokutana na ye. Elekaki tango molayi, azalaki kolata bilamba te mpe azalaki kofanda na ndako te kasi na nkunda. ²⁸ Ntango amoni Yesu, angangi, akwei liboso na ye. Na mongongo makasi alobi: «Likambo nini ngai na yo Yesu, mwana na Nzambe na likolo? Nalombi na yo, kotungisa ngai te.» ²⁹ Mpo Yesu apesaki mitindo na molimo mabe kobima na moto yango, mpo ete mbala mingi ezalaki kolata ye. Ata ko bazalaki kokanga ye na minyololo mpe nsinga mpe kokengela ye, azalaki kokata minyololo mpe azalaki kotindikama na molimo mabe na bisobe. ³⁰ Bongo Yesu atuni ye: «Nkombo na yo nani» Ayanoli: «Ebele», mpo ete milimo mabe ezalaki ebele kati na ye. ³¹ Babondelaki ye ete atinda bango na libulu te. ³² Tala, etuluku ya ngulu ezalaki wana kolia likolo na ngomba. Milimo mabe ebondelaki ye ete atinda bango na ngulu wana. Mpe ye apesaki bango nzela. ³³ Na mbala moko, milimo mabe ebimaki mpe ekei kokota na ngulu, mpe yango ekimaki mbangu kokweya na ebale mpe ekofaki . ³⁴ Ntango babateli mpate bamoni bongo, bakimi mbango kopesa sango na engumba ya bango mpe na bamboka. ³⁵ Bongo bato babimaki mpo na kotala makambo euti koleka. Mpe ntango bakomi pene a Yesu, bakuti moto oyo milimo ebimaki afandi na makolo na ye,alati bilamba, zaongisi makanisi ya bomoto, Bango banso batondaki na bobangi. ³⁶ Bato oyo bamonaki makambo ndenge elekaki, bayebisaki basusu ndenge moto oyo azalaki na milimo mabe abakaki. ³⁷ Bato nyoso ya etuka ya baGeraseniens basengaki na Yesu ete alongwa na ekuka na bango, pamba te kobanga monene ekangaki bango. Nde amataki na bwato mpe azongaki. ³⁸ Moto oyo milimo mabe abimaki asengaki na ye ete alanda ye. Kasi Yesu aboyaki na koloba: ³⁹ «Zonga na ndako na yo mpe panza sango na makambo minene oyo Nzambe asali kati na yo.» Moto yango akandaki mpe asakoli na engumba mobimba oyo Yesu asalaki mpo na ye. ⁴⁰ Tango Yesu azongaki, etuluku ya bato bayaki koyamba ye, mpo ete bazalaki kozila ye. ⁴¹ Bamoni mobali moko na nkombo Jaïrus; azalaki moko na bakonzi ya eyanganelo. Afukami na makolo na Yesu mpe abondeli ye ete akenda epai na ye, ⁴² mpo ete mwana na ye ya mwasi moko azalaki na mbula pene na zomi na mibale alingaki kokufa. Ntango Yesu azalaki kokenda, etuluku ya bato bazalaki kokangama na ye. ⁴³ Nzoka nde mwasi moko azalaki na mpasi ya kotanga makila mbula zomi na mibale, asilisaki mbongo na ye na minganga, kasi azwaki lobiko te. ⁴⁴ Apusanaki sima na Yesu mpe asimbaki songe ya elamba na ye mpe na ngonga yango, makila ekatani. ⁴⁵ Yesu atuni: «Nani asimbi ngai?» Lokola bango nyoso bandimaki te, Petelo alobi na ye: «Molakisi, etuluku ya bato bakangami na yo mpe bazali kotindika yo.» ⁴⁶ Kasi Yesu alobi: «Moto moko asimbi ngai mpo namoni nguya moko ebimi na ngai.» ⁴⁷ Mwasi amonaki ete akoki komibomba lisusu te, ayei na kolenga nyoso kokweya liboso na ye. Ayebisi na miso na bato nyoso ntina oyo asimbaki ye mpe ndenge abikaki na ngonga wana. ⁴⁸ Nde Yesu alobi na ye: «Mwana na ngai, kondima na yo ebikisi yo. Kenda na kimia.» ⁴⁹ Ntango azalaki naino koloba, moto moko kouta epai ya mokonzi ya eyanganelo alobi: «Mwana na yo akufi, kotungisa lisusu Mokonzi te.» ⁵⁰ Kasi Yesu ayokaki yango mpe ayanoli: « Kobanga te, ndima kaka mpe akobika.» ⁵¹ Ntango bakomi na ndako, aboyaki bato kokota na ye longola nse Petelo na Yoane mpe Jaki elongo na tata mpe mama ya mwana. ⁵² Tala bato banso bazalaki kolela mpe komitungisa mpo na mwana. Kasi alobi: «Bolela te, akufi te, alali.» ⁵³ Kasi bazalaki kotiola ye, bayebaki ete asilaki kokufa. ⁵⁴ Kasi Yesu asimbaki loboko ya mwana mpe abengaki ye na mongongo makasi: «Mwana na ngai lamuka!» ⁵⁵ Molimo na ye ezongaki, mpe bapesi ye mwa eloko ya kolia. ⁵⁶ Baboti na ye bakamwi kasi Yesu apekisaki bango kopanza sango yango.