¹ Mpe ayebisi bango lisese esengeli babondela na kolemba te. ² Alobi: «Ezalaki na engumba moko, Juzi moko azalaki kobanga Nzambe te mpe kotosa moto te. ³ O kati ya engumba ena, mwasi yoko akufela mobali, azalaki koya mbala ike, akata likambo na moyini na ye. ⁴ Juzi azalaki na mposa ya kosunga ye te. Kasi amilobeli: "Atako nabangaka Nzambe te mpe natosaka moto te, ⁵ lokola natungisami na mwasi oyo, nakokata likambo na ye, mpo atungisa ngai lisusu te.» ⁶ Bongo, Mokonzi alobi: «Boyaka maloba ya juzi mabe oyo. ⁷ Sasaipi Nzambe akoumela kokata likambo ya baponami na ye oyo bazali kolela butu na moi te? Akozilisa bango? ⁸ Nayebisi bino, akokata likambo ya bango na lombangu. Lolenge moko, tango ekozonga mwana na moto, akokuta lisusu kondima na mokili?» ⁹ Boye, alobi lisusu lisese oyo na basusu bazali komimona lokola bazali sembo koleka basusu: ¹⁰ «Bato babale bakoti o tempelo mpo na mabondeli (moko mofalisai mpe mosusu mokongoli mpako) ¹¹ Mofalisai atelemi kobondela na mambi ma ye mei: "Nzambe, natondi yo, mpo nakokani na batu mabe oyo te, ya lokuta, ya bikobo, mpe bakongoli mpako. ¹² Nakilaka bilei mbala mibale na mposo, mpe napesaka eteni na zomi na nyoso nazali na yango." ¹³ Kasi mokongoli mpako, atelemi mosika, akokaki ata kotala likolo te, kasi aleli koloba: "Nzambe, nazali mosumuki, yokela ngai mawa. ¹⁴ Nayebisi bino, moto oyo alimbisamaki koleka mosusu, oyo nyoso akomitombola, akokita, kasi oyo akomikitisa akotombolama.» ¹⁵ Bato bamemeli ye bana mpo amama bango, kasi bayekoli bapekisaki bango. ¹⁶ Kasi Yesu alobi na bango: «Botika bana mike baya epai na ngai, bopekisa bango te; pamba te bokonzi ya Nzambe ezali lolenge na bango. ¹⁷ Ya solo, nayebisi bino, oyo azali koyamba bokonzi na Nzambe lokola mwana moke te, akokota te.» ¹⁸ Mokambi moko atuni ye: «Molakisi malamu, Nasala nini mpo ete nasangola bomoi ya libela?» ¹⁹ Yesu azongisi:«Mpo nini azali kobenga ngai moto malamu?» Moto moko te azali malamu, bobele Nzambe ye Mei. ²⁰ Oyebi mibeko: Kosala ekobo te, koboma te, koyiba te, kotatola lokuta te, tosa tata mpe mama na yo.» ²¹ Mokambi alobi: «Natosaka maye manso uta bolenge na ngai.» ²² Ntango Yesu ayoki yango, alobi: «Ezangi yo eloko moko. Teka bozwi na yo, nyoso, kabola yango na babola, mpe nde okozwa oyo eleki motuya na likolo. Yaka, landa ngai.» ²³ Kasi ntango mozwi ayoki yango, mawa etondi ye motema na ntina na bozwi na ye. ²⁴ Yesu, amoni ye kotonda na mawa, alobi: «Ezali kpokoso na baye bazali na bozwi koyingela na bokonzi na Nzambe! ²⁵ Pamba te ezali pete na kamela koleka na lidusu ya tonga, na esika ete mozwi akota na bokonzi na Nzambe.» ²⁶ Baoyo bayokaki yango balobi: «Boye, nani akobika?» ²⁷ Yesu azongisi: «Biloko biye bizali kposo na bato, bizali mpete na Nzambe.» ²⁸ Petelo alobi: «Biso totiki nyoso ya biso mpe tobili yo.» ²⁹ Bongo Yesu azongiseli bango: «Ya solo, nalobi na bino, ezali na moto moko te oyo atiki ndako na ye, mwasi na ye, bandeko na ye, baboti na ye to bana na ye na ntina na ngai, ³⁰ akozanga te kozwa ebele na mokili oyo, mpe bomoi ya seko na bokonzi na Nzambe.» ³¹ Sima ya koyanganisa bazomi na mibale pene na ye, alobi na bango: «Botala, tozali kokende na Yelusaleme, maye manso basakoli bakomaka na ntina na mwana na moto, ekokokisama. ³² Zambi akokabama na bapagano, bakotuka ye, bakoyokisa ye nsoni mpe bakobwakela ye nsoi. ³³ Sima ya kobeta ye fimbo, bakoboma ye mpe mokolo mwa misato, akosekwa.» ³⁴ Basosolaki ata eloko moko te mpe liloba yango ebombamaki, mpe basosolaki makambo mango te. ³⁵ Esalamaki ete , lokola Yesu abelemaki na Yeliko, mokufi miso moko afandaka pembeni na balabala mpo na kosenga, ³⁶ mpe eyokaki ye etuluku koleka, atunaki nini ezaki koleka. ³⁷ Bayebisi ye ete Yesu na Nazarete azali koleka. ³⁸ Bongo mokufi miso agangaki, koloba: «Yesu, mwana na Dawidi, yokela ngai mawa.» ³⁹ Baye bazalaki liboso bapekisaki ye ete akanga monoko. Kasi ye agangaki lisusu makasi: « Mwana na Dawidi, yokela ngai mawa.» ⁴⁰ Yesu atelemaki, mpe apesaki mitindo ete bamema mokufi miso epai na ye. Mpe ntango mokufi miso akomaki pene, Yesu atuni ye: ⁴¹ «Olingi nasalela yo nini?» Ayebisi ye: «Mokonzi, nalingi namona lisusu.» ⁴² Yesu ayebisi ye: «Mona. kondima na yo ebikisi yo.» ⁴³ Na mbala moko, amoni mpe abili Yesu na kosanzola Nzambe. Bato banso na komona boye, bakumisi Nzambe.