¹ Yango ekomaki mokolo moko Yesu azalaki kosambela na esika moko. Moko ya bayekoli na ye alobi: «Mokonzi lakisa biso ndenge ya kobondela lolenge Yoane alakisaki bayekoli na ye.» ² Yesu alobi na bango:«Ntango bazali kobondela, bolobaka: Tata , tika nkombo na yo ezwa lokumu, bokonzi na yo eya. ³ Pesa biso bilei ya mokolo na mokolo. ⁴ Limbisa masumu na biso, lolenge biso tolimbisaka baninga, kamba biso na komekama te.» ⁵ Yesu alobi na bango: «Soki moto moko akei epai na moninga na ye na butu mpe alobi na ye: «Moninga, defisa ngai mapa misato. ⁶ Mpo ete moninga moko ayei epai na ngai oyo azali na mobembo, kasi nazali na eloko ya kopesa ye te: ⁷ "Boye soki ye akozongisa maloba kati na ndako ete: Kotungisa ngai te, ekuke na ndako esili kokangama, ngai elongo na bana tosili kolala. Nakoki kotelema te mpo na kopesa yo mapa. ⁸ Nalobi na bino ata akobima te kopesa ye mapa mpo azali moninga na ye, akotelema kaka mpo na molende na ye mpe akopesa ye mapa oyo ye azali na bosenga na yango.» ⁹ Nalobi na bino lisusu: «Bosenga mpe bakopesa bino; boluka mpe bokozwa; bobeta ekuke mpe bakofungola. ¹⁰ Pamba te, moto nyoso oyo akosenga bakopesa ye, mpe oyo akoluka akozwa, mpe oyo akobeta bakofungolela ye. ¹¹ Tata nani kati na bino, akoki kopesa mwana na ye nyoka soki akolomba ye mbisi? ¹² To soki akolomba ye likei bongo akopesa koto? ¹³ Boye bino bato mabe bokopesa bana na bino biloko malamu, boni boni Tata na bino na likolo akopesa te Molimo Mosanto na baoyo bakosenga ye?» ¹⁴ Sima na ntango, Yesu abenganaki molimo mabe oyo ezalaki na baba. Ntango molimo yango ebimi, baba alobaki. Bituluku ya bato bakamwi. ¹⁵ Kasi basusu balobi: «Ezali na nguya ya Beelzebul, mokonzi ya milimo mabe nde abengani milimo mabe.» ¹⁶ Basusu bamekaki ye mpe basengaki ye kosala elembo moko kouta na lola. ¹⁷ Kasi Yesu lokola ayebaki makanisi na bango alobi: «Bokonzi nyoso oyo akabwani kati na yango ezali ya kokufa, mpe ndako nyoso oyo ekabwani kati na yango ekokweya. ¹⁸ Soki Satana akabwani kati na ye moko, ndenge nini bokonzi na ye ekoumela? Mpo bolobi ete nazali kobengana milimo mabe na nguya ya Beelzebul. ¹⁹ Soki nazali kobengana milimo mabe na nguya ya Beelzebul, na nguya ya nani bayekoli na bino bazali kobengana yango? Na ntina na yango, bango bakozala basambisi na bino. ²⁰ Kasi soki nazali kobengana milimo mabe na nguya ya Nzambe, boye bokonzi na Nzambe eyei epai na bino. ²¹ Ntango elombe mobali azali na bibundeli ya kokengele ndako na ye, biloko na ye ebatelami. ²² Kasi soki elombe mobali mosusu oyo aleki ye na makasi alongi ye, oyo alaki makasi akozwa bibundeli na ye mpe akobotolo biloko na ye. ²³ Oyo azali na ngai elongo te, azali moyini na ngai, mpe oyo nyoso azali lisanga na ngai te akolimwa. ²⁴ Ntango molimo na mbindo ebimi na moto, ekendaka na bisika bikauka mpo na kopema. Soki ezwi yango te, akoloba: "nazonga na ndako oyo nautaki." ²⁵ Ntango azongi, akuti ndako yango ekombami mpe etiami molongo. Boye, akokenda kozwa milimo mosusu sambo mabe koleka ye moko mpe bakoya kofanda kati na ye. ²⁶ Boye efandeli ya moto oyo ekokoma mabe koleka oyo ya libiso.» ²⁷ Ntango asilisaki koloba boye, mwasi moko kati na etuluku ya bato alobi: «Esengo na libumu oyo ememaki yo, mpe mabele oyo masungisaki yo.» ²⁸ Kasi alobi: «Bapambolama nde baoyo bazali koyoka liloba na Nzambe mpe bazali kotosa yango.» ²⁹ Lokola bituluku na bato bazalaki kotondana, abandi koloba: «Ekeko oyo ezali eleko ya bato mabe. Bazali koluka elembo, ata ko elombo ekopesamela bango te, kolongola bobele elembo ya Yona. ³⁰ Pamba te, lolenge Yona azalaki elembo mpo na bana ya Ninive, bobele boye mwana na moto akozala elembo mpo na eleko oyo. ³¹ Mokolo na kosambisama na eleko oyo, mokonzi mwasi ya etuka ya ngele akosekwa mpo na kokata likambo ya bato ya eleko oyo mpo ye ayei koyoka maloba ya mayele ya Salomo, mpe tala, oyo azali awa aleki Salomo. ³² Na mokolo ya kosambisa, bato ya Ninive bakofunda bato ya eleko oyo mpe bakopesa bango etumbu, zambi bango babongolaki mitema na mateya ya Yona, mpe awa ezali na oyo aleki Yona. ³³ Moto moko te apelisaka mwinda mpo abomba yango na esika ya nkuku to na nse ya ekolo, kasi likolo ya mesa mpo engengisa ndako mobimba. ³⁴ Liso na yo ezali mwinda ya nzoto. Soki liso na yo ezali malamu, okomona polele. Kasi soki liso na yo ezali malamu te, okozala na molili. ³⁵ Keba, pole oyo ezali kati na yo ekoma molili. ³⁶ Soki nzoto na yo mobimba ezali pole, ata eteni moko te ezali kati na molili, boye nzoto na yo mobimba ekozala lokola mwinda ekongenga makasi kati na yo.» ³⁷ Ntango asilisi koloba, mofalisayi moko abiangi ye kolia na ndako na ye. Boye Yesu akotaki mpe afandaki na mesa. ³⁸ Mpe mofalisayi akamwaki komona ete ye asukolaki maboko te liboso ya kolia. ³⁹ Kasi Mokonzi alobi na ye: «Bino bafalisayi, bosukolaka libanda ya kopo mpe sani, kasi kati na bino etonda na lokoso mpe misala mabe. ⁴⁰ Bino bilema! Ezali oyo te asalaki libanda mpe ye asalaki kati? ⁴¹ Bopesa babola yango ezali na kati, mpe boye biloko nyoso mpeto ekozala ya bino. ⁴² Kasi mawa na bino bafalisayi, mpo ete bofutaka moko na zomi na ndambu ya nyoso, kasi bozali kotika boyengebene mpe bolingo ya Nzambe. Ebongi malamu kotambola sembo mpe kolinga Nzambe, mpe kobosana te kosala makambo mosusu. ⁴³ Mawa na bino bafalisayi, zambi bolingaka kozwa bisika ya liboso kati na biyanganelo mpe losako ya bato ebele. ⁴⁴ Mawa na bino, zambi bozali lokola nkunda oyo emonani te mpe bato batamboli likolo na yango kozanga koyeba.» ⁴⁵ Mpe moko ya balakisi mibeko ya bayuda alobi na ye: «Molakisi, oyo olobi ezali kotuka biso mpe.» ⁴⁶ Yesu alobi: «Mawa na bino, balakisi ya mibeko! Zambi botiaka mikumba ya kilo likolo na bato, kasi bokoki kosimba yango ata na mosapi. ⁴⁷ Mawa na bino, mpo ete bozali kotonga nkunda mpo na kokanisa basakoli, nzokande bankoko na bino nde babomaki bango! ⁴⁸ Boye, bozali banzeneneke mpe bozali kondima misala ya bankoko na bino, pamba te ezali solo ete babomaki basakoli yango nde bozali kotongela bango nkunda ya kokanisa. ⁴⁹ Mpo na yango mpe, bwanya ya Nzambe elobi: «Nakotindela bango basakoli mpe bantoma, mpe bakonyokolo bango mpe bakoboma basusu kati na bango. ⁵⁰ Boye, bato ya ekeke eye bakozua mokumba ya makila ya basakoli nyoso oyo basopa uta ebandeli ya mokili, ⁵¹ kobanda makila ya Abel kino ya Zakalia, oyo babomaki kati kati ya etumbelo mpe esika esantu. Iyo, nazali koloba na bino, ekeke eye ekomema mokumba wana. ⁵² Mawa na bino balakisi na mibeko ya bayuda, zambi bolongoli fungola ya boyebi; bokokota bino mei te mpe bokangi nzela na baoyo balingi kokota.» ⁵³ Ntango Yesu abimaki wana, bakomi mibeko mpe bafalisayi batelemeli ye mpe baswanaki na ye na ntina na makambo ebele, ⁵⁴ bazalaki kotiela ye mitambo mpo bazwa ye na maloba ma ye penza.