¹ Cho Solomoni washangumukile kutunga tembele ya Yehoba. Ebi byasholokele mu mwaka wakwetetha 480 kutunda hathimbu banu ba Isalela kutunda mu lifuti lya Ingitu, mu mwaka wabuwana wa kuyula cha Solomoni kuba Isalela, mungonde ya Zibu, ei inapu ngonde ya muchibali. ² Tembele yatungilile Yehoba mwene Solomoni yakele nama kyubiti makumi atatu mukwimana. ³ Chimbimbi cha kulutwe ya tembele ibenya chakele nama kyubiti makumi abali mubulaja, kwetheka hamo na bukama bwa tembele, nama kyubiti likumi mukukunama kulutwe lwa mbalaka. ⁴ Hakupwa ije njubo wayakele binjanena bya bipamba bije bya ipwithile kukeha hanja kutubakana mukati. ⁵ Kubimbango bya mulili wakma watungileko tumilili tukwabo twakuthzenguluka, mwoshe hanja ya mulili na mukati kamulili. Watungile milili kubimbango byoshe kuthzengulwitha. ⁶ Chibatulo cha mwithi manene chakele nama kyubiti atanu mukwama, chahakati chakele nama kyubiti atanu na imo mukwama, cho cha muchitatu chakele nama kyubiti atanu na abali mukwama. Mwafwa hanja watungileko tubibatulo twakutubakanetha mangana bonowe kwakamo bimanda mubi mbango bya njubo. ⁷ Ije njubo baitungithile mamanya ababwabethele ku makina. Kukwakele hamala, ngimbu, naambe chikubo chakuthzatetha echi bathzibike mukutunga kwa njubo. ⁸ Cho kushango ya tembele kwakele chikolo cha mwithi ya mabu, cho chikwabo chaile helu ya chibatulo cha hakati, na chikwabo chakutunda ha kati kuya ha chibatulo cha helu. ⁹ Cho Solomoniwatungile tembele nakuimanetha; cho wajambelele ije njubo na myalango hamo na mapulanga a kendele. ¹⁰ Watungile milili ya kubimbango bya mukati ka mulili wakama wamu tembele, mumbango imo mwakele ma kyubiti atanu mukwimana; bainungile ku njubo kupangetha biti bya kendele. ¹¹ Cho lijwi lya Yehoba lyethzile kuli Solomoni, ngwalyo, ¹² "Kutetha nei tembele uli nakutunga, oshe ngwe ukenda mwaya mashiko ange nakupanga mwakuthungama, nyunga kukambeya chacho choshe na kwendamo, cho njikatabetha kushika change kuli yobe chije njalingile kuli isho Ndabiti." ¹³ Njikayoyela mukati kabana ba Isalela cho kunjikabaliula embwe" ¹⁴ Cho Solomoni watungile njubo na kuimanetha. ¹⁵ Cho watungile bibatulo byoshe bya mukati ka njubo kupangetha bibala bya kendele. Kutunda hathi ya njubo na kweta mu chiluli, wabifwikile na biti mukati, cho wafwikile hathi ya njubo na bibala bya sipulasi. ¹⁷ Watungile kunima ya njubo na ma kyubiti makumi abali a biti bya kendale kutunda hathi kweta ku chiluli. Cho watungile ou mulili kupwa mulili wamukati, wakuthzila manene. ¹⁶ Mulili ubenya wakama, ou, wakele mwela wakuthzila uje wakele kulutwe lwa mwela wakuthzila manene, wakele na makyubiti makumi awana mubulaja. ¹⁸ Cho mukati ka njubo mwakele kendale, ei bashongele ngwe biti binachamuna. Byoshe byakele bya kendale. Kukwakele mamanya aje bapangethele akele nakusholoka mukati. ¹⁹ Solomoni wabwahethele uno milili wamukati ku njubo mangana bakatambikemo chikasha cha chithzibathano cha Yehoba. ²⁰ Uno mulili wamukati wakele na makyubiti makumi abali mubulaja, makyubiti makumi abali mubukama, na makyubiti makumi abali mu kwimana. Solomoni wajalele ha bimbango na ngolinde yakukupuka nakufwika mutula na biti bya kendale ²¹ Solomoni wajalele mukati ka tembele na ngolinde yakukupuka, na kwaka malenge a ngolinde kubathana halutwe lwa mulili wamukati, nakujala kulutwe na ngolinde. ²² Wajalele mukati mwoshe na ngolinde kweta nomu tembele yoshe yahwile. Wajalele lalo ngolinde ha mutula woshe uje wakele wamu mulili wa mukati. ²³ Cho Solomoni watungile makelube babali ba biti bya olibe, umo naumo wakele nama kyubiti likumi mukwimana, bamu mulili wamukati. ²⁴ Limbaba lya mukelube umo wabubanga lyakele na makyubiti atanu mubulaja nalikwabo lalo makyubiti atanu. Cho kutunda kushongo ya limbaba kweta kushongo ikwabo wakele na makyubiti likumi. ²⁵ Nauje likelube mukwabo lalo wakele na ma kyubiti likumi mubulaja bwa mambaba. ²⁶ Cho makelube boshe bakele ba chifwa chimo mukwimana namukusholoka. ²⁷ Cho kulaha cha likelube umo mukwimana wakele nama kyubiti likumi na mukwabo chimolika. Solomoni wakele baje makelube mu milili wahakati manene. Mambaba a makelube akele akutandubula kulingitha limbaba limo lyaumo kukwata ku mbango imo neli lya mukwabo kukwata ku mbango ikwabo. Mambaba abo aliwanene mukati ka mwela wa kuthzila manene. ²⁸ Solomoni wafwikile baje makelube na ngolinde. ²⁹ Washongele bimbango byoshe bya njubo kuthzengulwitha na bimwetho bya makelubi, biti bya mashakabale, na shani inashamwina, hanja na mukati ka milili. ³⁰ Cho Solomoni wajalele hathi ya njubo na ngolinde, mwoshe hanja na mukati ka milili. ³¹ Cho Solomoni washongele bikolo bya miti ya olibe bya kuchikolo aha mulili wamukati. Lintu na chipamba cha chikolo chakele na mapulanga akulifwa atanu. ³² Cho washongele bikolo bibali bya biti bya olibe, nakushongelaho makelube bakutenga, miti yamakelube, na shani yakushamuna. Wabijalele na ngolinde nakushamwina ngolinde ha makelube na mishakabale. ³³ Mungilei, Solomoni washongelele lalo bipamba bya bikolo byaku tembele na biti bya olibe ebi byakele na mapulanga akulifwa wana ³⁴ na bikolo bibali bya biti bya sipulasi. Maputa abali a chikolo chimo akele nakulikoneka na maputa abali a chikolo chikwabo akele nakulikonekela. ³⁵ Watengeleho makelube, miti ya mashakabale, na shani ya kushamuna, cho wajaleleho ngolinde haje habyakutenga. ³⁶ Watungile chioango chamukati na mihanga itatu ya mamanya akuteta na muhanga wa mwalango wa kendale. ³⁷ Lubula lwa njubo ya Yehoba balujalele mu mwaka wabuwana, mungonde ya Zibi. ³⁸ Mumwaka wabu likumi na umo, mu ngonde ya Bulu, ei inapu ngonde yamu chitanu nabitatu, ije njubo baimanethele mwoshe muje baithinanyekelele. Cho Solomoni wambatele myaka itanu naibali kutunga ije tembele.