¹ Cho omu mwene wa munakathzi waku Shemba wathzibile ha kukoletha cha Solomoni hamulonga wa lithzina lya Yehoba, wethzile naku mwetheka na kwihula chachikalu. ² Wethzile ku Yelusalama na litemba lya lilaha, na byuma bya bweko bwabubwa, na ngolinde yaingi, na mamanya amangi a ndando yakama. Omu wetele, walekele Solomoni byoshe ebi byakele mu mbunge yendi. ³ Solomoni wakumbulwile malwihu endi oshe. Cho kukwakele chumo echi wehwile echi mwene wonowele kumukumbulula. ⁴ Omu mwene wa munakathzi waku Shemba wamwene chiningi cha Solomoni choshe, na nganda ije watungile, ⁵ kulya chakele ha metha yendi, kutumbama chabingamba bendi, bipangi byabo na buthzalo bwabo, nabakakunyunga nganja yendi lalo, na mungila wakele nakwanena milambu ya kulumba mu njubo ya Yehoba, cho kumwakele lalo kuhwima muli ikeye. ⁶ Wendekele kuli mwene ngwendi, "Mwabuthunga bene, muthzimbu ou njathzibile mulifuti lyange ha majwi obe na chiningi chobe. ⁷ Kunjatabelele byuma njathzibile embwe kweta nomu njethzile kuno, choni mesho ange analimwena. Kethi ngwe mbathzubwila eyi banjilekele ha chiningi na bufuko bwobe! Unatubakanetha hakukoletha chije njathzibile. ⁸ Bakabethzika banakathzi bobe, cho bakubethzika bingamba bobe aba bakemana thimbu yoshe kumesho obe, mwafwa bakathzibi chiningi chobe. ⁹ Echela Yehoba Shukulu yobe apwe wakulemetha, ou nawana kubwahelela muli yobe, ou wakwakele ha litanda lya Isalela. Mwafwa Yehoba wathzemene Isalela myaka yoshe, nakukupwitha kupwa mwene, mangana ukapwe wakukabangeya na buthunga. ¹⁰ Cho wanene mwene chita na makumi abali (120) a matalenda a ngolonde na bya bweko bwabubwa byabingi na mamanya a ndando. Kukwakele kutuma cha bya bweko ngwe bije mwene wa munakathzi wanene Solomoni biba mwanene lalo embwe. ¹¹ Mato akama aku Hilamu anenele ngolinde kutunda ku Ofile, banenele lalo biti bya alumangi bya bingi hamo na mamanya andando kutunda ku Ofile. ¹² Cho mwene wapangethele bije biti bya alumangi kupwa bingunthzi bya tembele ya Yehoba na nganda ya mwene, na tulyalya na bisathzi bya baka kwimba. Kukwethi kutuma cha biti bya alumangi byaijaho laja nambe bibanamonoho laja kweta ku lelo. ¹³ Mwene Solomoni wanene mwene wa munakathzi waku Shemba byuma byoshe wakele nakushaka, obyo byoshe wehwile, mukwakela kuli obyo ba mwanene kuli Solomoni bya kujeneka kumulomba byaha lwendi. Cho welukile kulifuti lyendi na bingamba bendi. ^{14 15} Cho kulema cha ngolinde ije yethzile kuli Solomoni mu mwaka umo yapwile 666 ma talenda a ngolinde, kumutambela wa ngolinde ei baka kulandetha banenele . Bimwene baku Alembia naba ngubulu mu lifuti banenele ngolinde na siliba kuli Solomoni. ¹⁶ Mwene Solomoni wapangele bintelo byakama bya kweta bita bibali bya ngolinde. Bita bitanu na chimo bya ma shekele a ngolinde byaile muli chimo na chimo. ¹⁷ Cho wapangele lalo bintelo bita bitatu bya ngolinde yakufula. Makilo atatu bapangethele mukufula imo na imo; cho mwene wabitumbikile mu njubo ya kushwata ya Lembanone. ¹⁸ Cho mwene washongele litanda lyakama na mayo abi njamba nakubifwika na ngolinde yakutheneta. ¹⁹ Kwakele bindendelo bitanu naimo kweta ha litanda, cho nima yakele yakulithzenguluka helu. Cho kwakele bithatelo kumathambwela oshe a chitwamo, na bindumba bibali ba nemana ku yehi na bithatelo. ²⁰ Bindumba likumi nababali bemanene ha bindendelo, umo kutambelalou mukwabo ku ukwabo. Cho kukwakele litanda likwabo lya chifwa chije mubi nganda bikwabo. ²¹ Binganja byoshe byakunwina bya mwene Solomoni byakele bya ngolinde, na binganja byakunwina byoshe bya nu njubo ya kushwata ya Lembanone byakele bya ngolinde. Naimo yahi yakele ya siliba, mwafwa siliba kuyakele na ndando muthimbu ya Solomoni. ²² Mwene wakele na bwato ku kalunga ndonga akele na kwenda hamo na mato aku Hilamu. Mato anenele ngolinde, siliba, na mayo abi njamba, hamo na banamaundu na bing'ima kamo mu myaka itatu. ²³ Cho mwene Solomoni watubakanene bimyene boshe bamu kaye mu bufuko na chiningi. ²⁴ Kaye koshe bashakele kupwe kuyehi na Solomoni mangana bathzibe ku chiningi chendi, echi Yehoba wakele mu mbunge yendi. ²⁵ Baje boshe ba mwendelelele banene bwana, bibala bya siliba na ngolinde, na buthzalo, bitwa, na ng'undu, hamolika na tubalu na tumelu, ha mwaka ha mwaka. ²⁶ Cho Solomoni wakungulwile makalu a thzita na baka tubalu. Wakele na likulakathzi na bita biwana (1400) bya makalu anthzita na baka tubalu makulukathzi likumi na abali aba akele mu nganda ya makabi anthzita hamo na ikeye kuje ku Yelusalema. ²⁷ Mwene wakele na siliba ku Yelusalema, yatumine ngwe mamanya angocho ahathi. Walingithile biti bya kendale kutuma ngwe bya manonga bije bili mu lifuti lya mwithi. ²⁸ Cho tubalu tuje twakele na Solomoni batutundithile ku Ingitu, naku Kuwe cho bakakulandulula bu mwene babulandele kutunda ku Kuwe. ²⁹ Makalu bawalandele kutunda ku Ingitu handando ya bita bitanu na chimo (600) bya mashekele a siliba ha limo, na chita na makumi atanu (150) a mashekele ha kabalu umo. Cho byabingi babi landulwile kuli bimyene baba Hitite na Alamu.