¹ Choni mwene Solomoni wathzemene banakathzi babengi aba bapwile babungethzi kwakelako na muna Falo wamunakathzi - banakathzi bachi Moabu, Amonite, Endomite, Sindon, naba Hitite. ² Batundile ku mafuti awa Njambi wendekele kuli bana ba Isalela ngwendi, "Kumukai mukati kabo nakwambatelamo, nameme bakebo kwija muli yeni, mwafwa bakatha kutengulwila bimbunge byeni ku tulunga twabo." Nambe kwakele eli lishiko, Solomoni chamukwatele kumbunge hali aba banakathzi mukubathzema. ³ Solomoni wambatele mashano bita bitanu na bibali nakupwa na mapangala bita bitatu. Cho banakathzi bendi bamutengulwilile mbunge yendi kweka. ⁴ Mwafwa omu akolele Solomoni, banakathzi bendi batengululwile mbunge yendi ku tulunga beka; mbunge yendi kayanene yosh kuli Yehoba Njambi yendi mukushula, ngwe omu yakele mbunge ya ishe Ndabiti. ⁵ Mwafwa Solomoni wakabangeyeye Ashitolethi, kalunga kabaka Sindoni, na kukabangeya Moleki, uje kamponya wabubi wabaka Amonite. ⁶ Solomoni wapangele chije chakele chachibi kumesho a Yehoba; kakabangeyeye Njambi mukushula ngwe omu alingile ishe Ndabiti. ⁷ Cho Solomoni watungilile Chemoshi mwela wa helu, uje kaponya wa kushawitha waba Moabu, ha lilundu kuje ku ngangela ya Yelusalema, naya Moleki lalo, baje tumponya bakushawitha babanu baba Amoni. ⁸ Watungile lalo myela ya helu ya banakathzi bendi babungenthzi, aba benyekele isense na kulambula tulunga twabo haje bene. ⁹ Cho Njambi walubalele na Solomoni, mwafwa mbunge yendi yatengulukile kutunda kuli ikeye uje Njambi wa Isalela, nambe walisholwele kuli likeye kabali ¹⁰ na kumukambeya hali ebibene byuma, ngwabo kethi akaye ku tulunga tweka. Oloni Solomoni katabelele kukambeya cha Njambi. ¹¹ Ngachije oni Njambi wendekele kuli Solomoni ngwendi, "Mwafwa unalingi echi na kwilika kunyunga chithzibathano na mashiko aje njakukambeyeye, chili bene njikatabula nganda kutunda kuli yobe na kuyana kuli ngamba yobe. ¹² Nambe ngocho, hamulonga wa isho Ndabiti, Kunjikachilingi mu thimbu ya kuyoya chobe, oloni njikaitabwilila mu liboko lya munobe wa munalume. ¹³ Ngocho kunjikatabula nganda yoshe embwe; njikana lilimi limo kuli munobe wa munalume hamulonga wa ngamba yange Ndabiti, na hamulonga wa Yelusalema, ei njinashakula." ¹⁴ Cho Yehoba wendwile bukalu kuli Solomoni, Handandi ka Endomite. Watundile ku nanga yabu mwene bwamu Endoni. ¹⁵ Omu Ndabiti wakele mu Endomu, Njoabu uje mukulunu wabaka nthzita wakundukile na kuthsinda bathsi, munalume woshe uje wathsile mu Endomu. ¹⁶ Njoabu naba Isalela boshe bathalele muje bingonde bitanu naimo kweta nomu athsiile munalume woshe mu Endomu. ¹⁷ Oloni Handandi bamwambatelele hamo na bakwabo ba Endomite kuli ngamba ya ishe kuya mu Ingitu, hakupwa Handandi wachikele mwana wamundondo. ¹⁸ Bathethzele Mindiyani nakwija ku Palani, kutunda kuje bambateleko hamo nabo banalume kuya ku Ingitu, kuli Falo mwene wa Ingitu, ou wamwanene njubo na libu na kulya. ¹⁹ Handandi wawanene kutetela chakama kumesho a Falo, ngachije Falo wamwanene munakathzi, ou apwile shongo ya munakathzi wendi ibenya, ndokathzi ya inamwene Tahapenesi. ²⁰ Ndokathzi ya Tahapenesi wakitilile Handandi mwana wa munalume. Bamulukile ikeye Ngenubethi. Tahapenasi wamukolethelele mu nganda ya Falo. Cho Ngenubethi wayoyelelele mu nganda ya Falo hakati ka bana ba Falo. ²¹ Thimbu akele mu Ingitu, Handandi wathzibile ngwabo Ndabiti walalele hathi hamo nabakulu bendi cho ngwabo Njoabu uje mukulunu wabaka nthzita wathsile, cho Handandi wendekele kuli Falo ngwendi, " Echela njiye, mangana njiye kulifuti lyange." ²² Cho Falo wendekele kuli ikeye ngwendi, "Choni bikoni munonowa kuli yange, nambe oni mushaka kuya kulifuti lyeni yeni babenya?" Handandi wakumbulwile ngwendi, "Byahi, njalombo echela njiye." ²³ Cho Njambi wendwile lalo kulitengulukila kukwabo kuli Solomoni, Lezone muna Eliyanda, ou watewele kutunda kuli Shukuku yendi Handandezele mwene waku Zomba. ²⁴ Lezone walikungulwilile banalume nakupwa mukulunu hali munga yaindondo, omu Ndabiti wafungulwile banu baka Zomba, banu ban Lezone baile ku Ndamasika nakuyoyelako, cho Lezone watengulwile Ndamasika. ²⁵ Wapwile chitothzi wa Isalela mumatangwa oshe a Solomoni, hamo na bukalu buje wanenethele Handandi. Lezone washulithile Isalela na kuyula hali Alame. ²⁶ Cho Njelomboamu muna Nembati, ka Efulemu waku Zelenda, muka chipangi wa Solomoni, ou lithzina lyaba ina lyakele Zehiya, mfwile, wajundwile lalo liboko lyendi hali mwene. ²⁷ Wajundwile liboko lyendi hali mwene mwafwa Solomoni watungile uje mwela wakele ku Milo nakubwahetha bwina buje bwakele mu chibumbe cha nganda ya ishe Ndabiti. ²⁸ Njelomoamu wakele munalume wathzili na kunyanyama. Solomoni wachimwene ngwe uje mukwenje wa kuhundangana, cho wamwanene kutwamenena biangi byoshe bya njubo ya Yosefa. ²⁹ Hathimbu oyo, omu Njelomboamu watundile mu Yelusalema, uje kapolofita Ahinja ka Shilonite wamuwanenen ha ngila. Cho Ahinja wathzalele buthzalo bwabuha cho nabaje banalume babali bakele likalyabo mu shwata. ³⁰ Cho Ahinja washulwile buje buthzalo bwabuha bwakele hamubila wendi nakutambula mubihanda likumi na bibali. ³¹ Wendekele kuli Njeomboamu ngwendi, "Ambata bimbathzubwila likumi, kupwa bya Yehoba, Njambi wa Isalela, ngwendi, 'Kenga, njikatabula buje bumwene kutunda muliboko lya Solomoni cho njikana malimi likumi kuli yobe ³² (oloni Solomoni kakala na lilimi limo hamulonga wa ngamba yange Ndabiti hamo na Yelusalema - nganda ei njinashakwile kutunda ku malimi oshe a Isalela), ³³ mwafwa bananjithembulula nakulemetha Ashitolethi ka kalunga kabaka Sindoni, Chemoshi kalunga kaba Moabu, na Moleki kalunga kabanu ba Amoni. Kubendele mubingila byange, kupanga ebi byabibwa mu mesho ange, nakunyunga bilongetha na mashiko ange, ngwe omu alingile ishe Ndabiti. ³⁴ Nambe ngocho, kunjitunditha bumwene bwoshe naliboko lya Solomoni. Olojo njamupwithile muka kuyula mumatangwa oshe a kuyoya chendi, hamulonga wa Ndabiti ngamba yange ou njangwile, umo ou wanyungile kukambeya change na mashiko ange. ³⁵ Oloni njikatambula bumwene kutunda muliboko lya munedni nakubwana kuli yobe, malimi likumi. ³⁶ Njikana lilimi limo kuli muna Solomoni mangana ngamba yange Ndabiti akakale na ndeya ku mesho ange mu Yelusalema, nganda ei njashakwile kwaka lithzina lyange. ³⁷ Njikakwambata, cho ukayula mangana ukashulithe bije byoshe unashaka, cho ukapwa mwene hali Isalela. ³⁸ Oshe nga utolilila kuli byoshe ebi njikambeya, nambe ngwe wenda mubingila byange nakupanga bya bibwa mu mesho ange, kunyunga mashiko ange na kukambeya change, ngwe omu apangele ngamba yange Ndabiti cho njikakala nobe na kukutungila njuboyabuthunga, ngwe omu njatungile ya Ndabiti, cho njikana Isalela kuli yobe. ³⁹ Njikashitika chithemunwina cha Ndabiti, oloni kethi myaka yoshe embwe." ⁴⁰ Cho Solomoni wethekele kuthsiya Njelomboamu. Oloni Njelomboamu wakatukile nakutewela mu Ingitu, kuli Shishaki mwene wa Ingitu, cho watumbamene mu Ingitu kweta na kukuthsa cha Solomoni. ⁴¹ Hamulonga wa bing'anda bikwabo bya kwetheka na Solomoni, byoshe bije alingile na maana endi, nkuma kubabithonene mu libulu lya bilika bya Solomoni? ⁴² Solomoni wayulile hali ba Isalela mu Yelusalema ha myaka makumi awana. ⁴³ Walalele nabakulu bendi cho bamuthsindile mu nganda ya ishe Ndabiti. Munendi Lehomboamu wapwile mwene mukumwinga.