¹ Lijwi lya Yehoba lyethzile kuli Njehu muna Hanani kutengulukila Mbasha, ngwalyo, ² "Nambe njakujundwile kutunda ku lukungu nakukupwitha ntwama ha banu bange ba Isalela, unende mungila imolika ya Njelomboamu na kunenetha banu bange ba Isalela kubulumuna, mangana unji shangumuke kunjinenetha kubalaba na bubi bwabo. ³ Kenga, njikakomba nakunyongetha Mbasha na nanga yendi nakunenetha nanga yobe kupwa ngwe nanga ya Njeromboamu muna Nembati. ⁴ Cho tutali bakalya munu woshe wakunanga ya Mbasha ou akathsa mu nganda, natuthzila twa mwilu bakalya munu woshe akathsila mushwata." ⁵ Olojo hamulonga wa bing'anda bikwabo bya hali Mbasha, ebi alingile, nabukama bwendi, nkuma kubabithonene mu mikanda ya bilika bya bimyene ba Isalela? ⁶ Mbasha walalele na bukalu bendi cho bamuthsindile mu Tileza, na Ela munendi wa munalume wethzile na kupwa mwene kwinga mwela wendi. ⁷ Cho kwitila muli kapolofita Njehu muna Mbasha na na lijwi lya Yehoba lyethzile nakutengulukila Mbashe na nanga yendi, boshe hamulonga wa bubi bwoshe walingile ku mesho a Yehoba, mangana athe kumushangumuka amulubalethe na chipangi cha mumaboko endi, ngwe nanga ya Njelemboamu, cho lalo mwafwa wathsiile nanga ya Njelomboamu yoshe. ⁸ Mu mwaka wabu makumi abali na itanu naumo wa Asa mwene wa Yunda, Ela muna Mbasha washangumukile kuyula ba Isalela mu Tileza, wayulile ha myaka ibali. ⁹ Ngamba yendi Zimuli, mukulunu wa mbathzubwila ya makalu endi, wamukwatelele ng'ole. Cho Ela wakele mu Tileza, kulinwitha ibenya na kupenda mu njubo ya Aleza, ou wapwile mukakutala byuma byamu Tileza. ¹⁰ Zimuli wakobelelemo, wamulukukile na kumuthsiya, mu mwaka wamu makumi abali naitanu naibali ya Asa mwene wa Yunda, cho wethzile nakumwinga kupwa mwene. ¹¹ Omu Zimuli washanumukile kuyula nakutumbika halitanda lyendi, wathsiile nanga yoshe ya Mbashe. Kathethzeleko nambe umo munalume wakubushoko bwa Mbashe nambe bauthamba bendi. ¹² Cho Zimuli wanyongethele nanga yoshe ya Mbasha, kwetheketha na lijwi lya Yehoba eli wendekele byaku tengulukila Mbasha kwitila muli kapolofita Njehu, ¹³ mwafwa bubi bwoshe bwa Mbasha na bubi bwoshe bwa munendi Ela obu babulumwine, nakunenetha Isalela kubulumuna, mangana bashangumuke Yehoba, ou Njambi wa Isalela, kulubala na tumponya twabo. ¹⁴ Olojo hamulonga wa bing'anda bikwabo bya kutala hali Ela, byoshe bije walingile, nkuma kubabithonene mu mukanda wa bilika bya mwene wa Isalela? ¹⁵ Mumwaka wabu makumi abali naitanu naibali ya Asa mwene wa Yunda, Zimuli wayulile matangwa atanu na abali lika mu Tileza. Cho baka nthzita babatungilile chilombo ku Ngimbethoni, echi chakele chaba Filisite. ¹⁶ Baka nthzita kuje ku chilombo bachithzibile ba chendeka ngwabo, "Zimuli natenguluka kuthsiya mwene." Cho lije litangwa mu chilombo, ba isalela boshe bathwanethele Omuli, uje mukulunu wabaka thzita, mwene wa Isalela. ¹⁷ Omuli wakandukile kutunda ku Ngimbethoni hamo na ba Isalela boshe, nakuthzenguluka Tileza. ¹⁸ Cho omu Zimuli wamwene ngwendi nganda banaitambula, waile kubipatanga byakwata ku nganda naku lyenyekela mu njubo; mungilei wathsilile mu milangu ya tuhya. ¹⁹ Echi chakele ha mulonga wa bubi buje wabulumwine mu kulinga chije cha bubi ku mesho a Yehoba, kwitila mu kwendela mungila ya Njelomboamu na mububi buje wabulumwine, mukunenetha ba Isalela kubulumuna. ²⁰ Hamulonga wa bing'anda bikwabo bya hali Zimuli, na kufumbukila chije wambatele, nkuma kubabithonene mumukanda wa bilika bya mwene wa Isalela ndi? ^{21 22} Cho banu ba Isalela babapangele mubi mbathzubwila bibali. Mbathzubwila imo ya banu bakabangeyeye Timbini muna Nginathi, bakamupwithe mwene, mbathzubwila ikwabo bakabangeyeye Omuli. Oloni banu bakabangeyeye Omuli bakele bakutakama kuhyana banu bakabangeyeye Timbini muna Njinathi. Cho Timbini wathsile, cho Omuli wethzile na kupwa mwene. ²³ Omuli waputukile kuyula hali ba Isalela mu mwaka wamu makumi atatu na umo ya Asa mwene wa Yunda, cho wayulile myaka likumi naibali. Kutunda ku Tileza wayulile myaka itanu naumo. ²⁴ Walandele lilundu lya Samaliya kutunda kuli Shema nama talenda abali a siliva. Watungile nganda halilundu nakuliluka ngwendi Samaliya, kutethana lithzina lya Shama, ou akele ibenya walije lilundu. ²⁵ Omuli wapangele chachibi kumesho a Yehoba nakupanga mwamubi manene kutubakana boshe baje bakeloho thimbu kanda ikeye. ²⁶ Mwafwa wendele mu bingila byoshe bya Njelomboamu muna Nembati namukubulumuna chendi chanenethele Isalela kubulumuna, kushangumuka Yehoba, Njambi wa Isalela, alubalele na tumponya twabo twakwilika kulema. ²⁷ Olojo hamulonga wa bing'anda bikwabo bya kutetha na Omuli ebi walingile, nabukama buje washolwele, nkuma kubabithonene mu mukanda wa bilika bya bimyene ba Isalela ndi? ²⁸ Cho Omuli walalele na bakulu bendi cho bamuthsindile mu Samaliya cho Ahabu munendi wethzile na kupwa mwene mu kumuthswana, ²⁹ Mu mwaka wabu makumi atatu na atanu na itatu ya myaka ya Asa mwene wa Yunda, Ahabu muna Omuli washangumukile kuyula hali Isalela Ahabu muna Omuli wayulile Isalela mu Samaliya myaka makumi abali naibali. ³⁰ Ahabu muna Omuli wapangele chachibi kumesho aYehoba, kutubakana na boshe bajw bakeleho thimbu kanda ikeye. ³¹ Chakele kuli Ahabu ngwe chuma cha chathi kwenda mu bubi bwa Njelomboamu muna Nembati, cho wambatele Njezembelo muna Ethimbao wa munakathzi kupwa munakathzi wendi, mwene wamu Sindonia; cho waile nakumule Mbale na kumuthsikamena. ³² Watungilile Mbale mutula munjubo ya Mbale, ou watungilile mu Samaliya. ³³ Ahabu watungile kamponya Ashala Mpole. Ahabu walingile byabingi bya kushangumuka Yehoba, Njambi wa Isalela, kulubaletha kulyana bi myene boshe, ba Isalela bakeleko thimbu kanda ikeye. ³⁴ Muthimbu ya chiyulo cha Ahabu, Hiyeo waku Mbetele watungulwile Yeliko. Hiyeo wajalele lubula lwa nganda handando ya mwonyo wa Abilamu, munendi wakulibanga wa munalume; na Sengabu, munendi wamunalume wa mwanike, wathzimbalethele mwonyo wendi thimbu wakele na kutunga bikolo bya nganda, mukunyunga lijwi lya Yehoba eli endekele kwitila muli Yoshuwa muna Nuni.