¹ Mwene Solomoni wapwile mwene hali Isalela yoshe. ² Aba bakebo bapwile bakabipangi bendi: Azaliya muna Zandoki wapwile kapilisitu. ³ Eliholefi na Ahinja bana ba Shisha, bapwile bakakuthona. Jehoshefati muna Ahihundi wakele mukakutulika mikanda. ⁴ Mbenaya muna Yehoyanda wapwile na kutala mashwalale. Zandoki na Abiyata bapwile tupilisitu. ⁵ Azaliya muna Natani watalele baka bipangi. Zambundi muna Natani wapwile kapilisitu cho kabuthamba ka mwene. ⁶ Ahisha watalele ha byuma byaku njubo. Andonilamu muna Abunda watalele ha banalume baje banene kwendetha bipangi bya mulifuti. ⁷ Solomoni wakele na baka bipangi babakulunu likumi naba bali mu Isalela yoshe, aba bapwile nakunena kulya cha mwene nabaka njubo yendi yoshe. Munalume woshe wanenele kulya cha ngonde ya mutunu mu mwaka umo. ⁸ Mathzina abo apwile awa: Mbeni -Hule, kutunda mulifuti lya malundu lya Efulemu; ⁹ Mbeni - Ndeka mu Akalazi, Shalambime, na Eloni Mbeti Hanani; ¹⁰ Mbeni - Hesenali, mu Alumboti ( kukeko kwakele Soko na mafuti oshe a Hefale); ¹¹ Mbeni - Ambinandabu, mu Nafoti Ndole (washombwele Tafati muna Solomoni); ¹² Mbaana muna Ahilundi, mu Tanachi na Mengindo, na Mbeti Shani yoshe kuyehi na Zaletani mwithi ya Njezileo, kutundaku Mbeti Shani kuya ku Ambele Mehola nakweta kuthambwela ya Njokimeyamu; ¹³ Mbeni - Ngemba, mu Lamati Ngileyandi (kukeko kwakele binganda bya Njaile muna Manase, bije byakala mu Ngileyandi, na mitambela ya Alengobu bya pwile byendi, eli lyakele mu Mbashani, binganda byakama makumi atanu na imo byakele na bimpaka byakele na bikolo bya bunengu); ¹⁴ Ahinabu muna Indo, mu Mahanaimu; ¹⁵ Ahimaazi mu Nafutali (washombwele lalo muna Mbesemati muna Solomoni kupwa munakathzi); ¹⁶ Mbaana muna Hushai, mu Asha na Mbeyaloti; ¹⁷ Yekoshafati muna Paluya, mu Isakale; ¹⁸ Shimei muna Ela, mu Mbenjamini; ¹⁹ na Ngemba muna Uli, mu mutambela wa Ngileyandi, lifuti lya Sihoni mwene wa ba Aolite na Ongi mwene wa Mbashani, cho ikeye lika muka bipangi wakele muje mumutambela. ²⁰ Yunda na Isalela batumine ngwe mushekemusheke waku kalunga ndonga. Bakele na kulya nakunwa na kubwahelela. ²¹ Cho Solomoni wayulile ha binganda byoshe kutunda kundonga na kweta kumutambeka yaba Filisitina kweta kubinginga bya Ingitu. Banenele lithimu nakumupangela Solomoni mumatangwa amwonyo wendi woshe. ²² Kulya cha Solomoni chalitangwa chakele mitonga ya bunga bwakutheneta makumi atatu na bunga bwa mundele mitonga makumi atanu na limo, bingombe bakulelela mu litanga likumi, ²³ bingombe bakwambata ku mwila washwata makumi abali, bimanga chita chimo, hamo na binaba, bimbambi, mabonge na tuthumbi, ²⁴ Hamulonga wakupwa nanthzili ha mitambela yoshe yakele kuthambwela lino lya ndonga, kutunda ku Tifisa kweta shwi ku Ngaza, ha bi myene boshe ba thambwela lino lya ndonga, cho wakele na kwooloka ku mitambela yoshe yamuthzengulukile. ²⁵ Yunda na Isalela ba yoyelele mu bimpaka, munalume woshe mwithi ya mibinyu wendi na mwithi ya mukuyu wendi, kutunda kuli Ndani kweta kuli Mbeyashemba, mu matangwa a Solomoni oshe. ²⁶ Cho Solomoni wapwile na matanga a tubalu makumi awana amakulakathzi baku makalu end, na banalume ba tubalu makulakathzi likumi na abali. ²⁷ Baje bakabipangi banenele nenele kulya kuli mwene Solomoni na boshe bethzile ku metha ya mwene Solomoni, munalume woshe mu ngonde yendi. Kubechelele chuma chihwililile embwe. ²⁸ Cho lalo banenele mbale na mwila ku tubalu ba makalu naba bakulonda, munu woshe kunena ngwe omu nathela ²⁹ Cho Njambi wanene Solomoni maana manene na kuthzibithitha, na bukama wakuthzibuka ngwe mushekesheke wakumukulo wa kalunga ndonga. ³⁰ Maana a Solomoni a hyanene maana a banu boshe baka mbwela na maana abaka Ingitu. ³¹ Wakele wa chiningi kutubakana banalume boshe - kutabakana Etani uje ka Ezilahite, Hamani, Kalikoli, na Ndalenda, bana babanalume ba Mahole - cho na nthzili yendi yoshe yetele nakumafuti amuthzengulukile. ³² Wendekele bithimo byakweta makulukathzi atatu cho myatho yendi yakele 1,005 mukuitanda. ³³ Walumbunwine miti, kushangumukila ku Kendale ije yakala mu Lembanoni kweta ku Hisope ije ikamene ha bimbango. Walimbunwine lalo ha tuthitu, tuhzila, byuma bya kulyalanga, na bithi. ³⁴ Cho banu bethzile kutunda mu mafuti na kuthzibilila ku maana a Solomoni. Batundile kubi myene boshe bahathi baje bathzibile ha maana endi.