¹ Cho hathimbu ikwabo, Nambati uje ka Njezilelite wakele na lihya mu Njezilete, kuyehi na nganda ya bumwene bwa Ahabu, mwene wamu Samaliya. ² Ahabu wendekele kuli Nambati, ngwendi, " Njane lihya lyobe, mangana njikale nakulimamo maputa, mwafwa lili kuyehi na njubo yange. Mukulitambathana, njikwana lihya lyeka lya libwa, nambe, oshe unashaka, njikufweta ndando yalyo mu bimbongo." ³ Nambati wakumbulwile Ahabu ngwendi, "Echela Yehoba abindike kwana buthswana bwange kutunda ku bakulu bange kuli yobe." ⁴ Cho Ahabu waile munganda yendi yabu mwene nashulila na kulubala hamulonga wa mukumbu ba mwanene kuli Namboti uje ka Njezilelite omu endekele ngwendi, "Kunjikwana buthswana bwa kutunda ku bakulu bange." Walalele ha mwela wendi, kutundithako cchihanga hendi, nakubyana kulya chili choshe. ⁵ Munakathzi wendi Njezembele wethzile kuli ikeye nakwendeka kuli ikeye ngwendi, "Bika mbunge yobe washulila na buthiwa, mukulinga wilike kulya chili choshe? ⁶ Wamukumbulwile ngwendi, "Njinendekele na Nambati ka Njezilelite nakwendeke kuli ikeye ngwange, 'Njane lihya lyobe ha bimbongo, nambe oshe chikubwaheletha, njikwana lihya lyeka kupwa lyobe.' Cho nanjikumbulwile ngendi, 'Kunjikwana lihya lyange." ⁷ Cho munakathzi wendi Njezembele wamukumbulwile ngwendi, "Nkuma kuwatwalelelele kuyula bu mwene bwa Isalela ndi? Induka ulye; echela mbunge yobe ibwahelele. Njikutambwila lihya lya Nambati ka Njezilelite. ⁸ Cho Njezembele wathonekele mukanda mulithzina lya Ahabu, nakuithata na kathatetho kendi, nakuituma ku bakulunu nakuli baka kufuka baje baka tumbama nendi mu biwano, na kuli baje bayoyela kuyehi na Namboti. ⁹ Wathonekele mu mikanda, ngwendi, "Thzimbula kulikela kulya nakutumbika Nambati helu lya banu. ¹⁰ Lalo aka banu babali bakwilika buthunga hamo nendi nakubechela bambulule hali ikeye, ngwabo, 'Unathingile Njambi na mwene," Cho mumutuhule nakumwasha mamanya athse. ¹¹ Cho banalume bamu nganda yendi, bakulunu na babufuko baje bayoyela mu nganda ya Nambati, balingile ngwe muje wabalumbununwine Njezembele, ngwe omu wathonene mu mikanda ije atumine kuli bakebo. ¹² Bathzimbwile kulibindika kulya na kutumbika Nambati hakamwa ya banu. ¹³ Banalume babali bakwilika buthunga bakobelele nakutumbama kumesho a Nambati; bambulwile mukubangela Nambati kumesho a banu, ngwabo, "Nambati nathingile boshe Njambi na mwene." Cho bamwambatele hanja lya nganda nakumwasha mamanya kweta ku kuthsa. ¹⁴ Cho baje bakulunu batumine lijwi kuli Njezembele, ngwabo, "Nambati banamwasha mamanya cho nathsi." ¹⁵ Cho omu Njezembele wathzibile ngwabo Nambati banamwasha mamanya nathsi, wendekele kuli Ahabu ngwendi, "Katuka wambate lihya lya Nambati ka Njezilelite, eli abyanene kukwana ha bimbongo, mwafwa Nambati kethi nakuyoya, oloni nathsi. ¹⁶ Omu Ahabu wathzibile ngwabo Nambati nathsi, wendukile athikumuke ku lihya lya Nambati ka Njezilelite nakwambata lihya kupwa lyendi. ¹⁷ Cho lijwi lya Yehoba lyethzile kuli Eliya ka Tishimbite, ngwabo, ¹⁸ "Katuka uye uliwane na Ahabu mwene wa Isalela, ou akayoyela mu Samaliya. Ali mu lihya lya Nambati, oku nai nakulitambula kupwa lyendi. ¹⁹ Watela kwendeka nendi ngwobe Yehoba ngwendi, 'Unathsiyi nakutambula kupwa lyobe ndi? Cho ukamuleka ngwobe Yehoba ngwendi, 'Mumwela omu tutali banalyathelele maninga a Nambati, mukemo balyathela tutali maninga obe, eyo, maninga obe." ²⁰ Ahabu wendekele kuli Eliya ngwendi, "Unanjiwana tahi,, mukwang'ole yange? Eliya wamukumbulwile ngwendi, "Njinakuwana, mwafwa unalilandetha yobe ibenya kulinga echi chachibi ku mesho a Yehoba. ²¹ Yehoba nendeka echi kuli yobe; 'Kenga, Njikanena bukalu hali yobe cho bukanyongetha nakubatula mwana woshe wa munalume wakutunda kuli Ahabu na ndungo na munu wakwilika mulonga mu Isalela. ²² Njikapwitha nanga yobe ngwe nanga ya Yelomboamu muna Nambatai wa munalume, cho ngwe nanga ya Mbasha muna Ahiya wa munalume, mwafwa unanjishangumuna nakunenetha Isalela kubulumuna.' ²³ Yehoba nendeka lalo hali Njezembele ngwendi, Tutali bakalila Njezembele kuyehi na mbango ya Njezilale.' ²⁴ Ou woshe alikundama na Ahabu akathsila mu nganda, bakamulya ku tutali; na thuthzila ba mwilu bakalya ou woshe akathsila mushwata. ²⁵ Kukwakele umo ngwe Ahabu, ou walilandethele ibenya kulinga chachibi ku mesho a Yehoba, ou munakathzi wendi Njezembele watwamenene kubulumuna. ²⁶ Ahabu walingile bilinga byabunyengwe mukukabangeya tumponya, ngwe muje bene balingile ba Amolite, baje Yehoba watundithile ku mesho a banu ba Isalela. ²⁷ Omu Ahabu wathzibile majwi awa, watambwile buthzalo bwendi nakuthzala mashaka hamubila wendi na kulibindika kulya, nakulala mu buthzalo bwa mashaka nakushula na buthiwa. ²⁸ Cho lijwi lya Yehoba lyethzile kuli Eliya ka Tishibite, ngwabo, ²⁹ "Unamono omu Ahabu akalikehetha kuli yange? Mwafwa akalikehetha kuli yange, Kunjikanene bukalu buli nakwija mu matangwa endi embwe' chikapwa mu matangwa a munendi mukemo njikanena bukalu ku nanga yendi."