¹ Mwetile myaka itatu yakwilika ntzhita mukati kaba Alame naba Isalela. ² Cho chasholokele ngechi mu mwaka wa butatu Yehoshafati mwene waba Yunda waile kuli mwene wa Isalela. ³ Cho uje mwene wa Isalela walekeleko bingamba bendi ngwendi, "Munathzibuka ngwe Lamoti Ngileyandi lifuti lyetu, oloni kutwethi nakulingaho chimo mangana tulitambule kutunda kumaboko a mwene wa Alame?" ⁴ Cho wendekele kuli Yehoshafati ngwendi, "Uya nange ku nthzita ku Lamati Ngileyandi ndi? Cho Yehoshafati wakumbulwile mwene wa Isalela ngwendi, "Njili ngwe yobe, banu bange ngwe banu bobe, na tubalu twange tunapu ngwe tubalu twobe." ⁵ Yehoshafati wendekele kuli mwene wa Isalela ngwendi, "Njalombo thetela ngila kutunda ku lijwi lya Yehoba ha byuma unapande kulibanga kulinga." ⁶ Cho uje mwene wa Isalela wakungulwile hamo tupolofita, banalume bakweta bita biwana, nakwendeka kuli bakebo ngwendi, "Munjitabetha njiye na kulwa ku Lamoti Ngileyandi, indi njilikele?" Bendekele ngwabo, "Mulukuke, mwafwa Shukulu alyana mu maboko a mwene" ⁷ Oloni Yehoshafati wendekele ngwendi, "Nkuma kukwethi kapolofita wa Yehoba kuno oku twapande kuthetela bukwathi? ⁸ Mwene wa Isalela wendekele kuli Yehoshafati ngwendi, 'Kuchili munalume umo ou tunatha kwihula bukwathi bwa Yehoba atukwathe, Mikaya muna Imula, oloni njamuthzinda mwafwa kethi kupolofita bya bibwa hali yange, oloni mabukalu lika." Oloni Yehoshafati wendekele ngwendi, "Echeleni mwene elike kwendeka ngocho." ⁹ Cho mwene wa Isalela wathanene bakabipangi nakubakambeya ngwendi, "Neneni Mikaya muna Imula, ino bene thimbu" ¹⁰ Ahoni Ahabu mwene wa Isalela na Yehoshafati mwene wa Yunda batumbamene munu ha munu halitanda lyendi, banathzala mikanjo yabo, ha mwela wa kujela ku bikolo bya Samaliya, bya kukobelela, cho na tupolfita boshe bakele na kupolofita ku mesho abo. ¹¹ Zendekiya muna Kenana walipangelele bimbinga bya bikubo nakwendeka ngwendi, "Yehoba nendeka ngechi: 'Ukathindika baka Alame kupangetha ebi kweta nomu bakanyonga." ¹² Cho tupolofita boshe bapolofetele bimo lika, ngwabo," Lukuka Lamoti Ngileyendi ulihyane, mwafwa Yehoba nalyana mumaboko a mwene." i ¹³ Baje tunganda baile nakuthana Mikaya bendekele kuli ikeye, ngwendi, "Ahoni Kenga, majwi a tupolofita anendeka byabibwa kuli mwene na kanwa kamo lika. Njalombo echela lijwi lyobe lipwe ngwe umo wabo nakwendeka byuma byabibwa." ¹⁴ Mikaya wakumbulwile ngwendi, "Omu Yehoba ayoya, echi endeka Yehoba kuli yange chikecho njikendeka." ¹⁵ Omu ethzile kuli mwene, mwene wendekele kuli ikeye ngwendi, "Mikaya, tuya ku Lamoti Ngileyandi kunthzita indi embwe?" Mikaya wamukumbulwile ngwendi, "Lwitha na kuhyana. Yehoba alyana mu maboko a mwene." ¹⁶ Cho mwene wendekele kuli ikeye ngwendi, "Kangahi kanjikwihula kulithinga kwonowa kunjileka chimo oloni buthunga mulithzina lya Yehoba?" ¹⁷ Cho Mikaya ngwendi, "Njinamwene Isalela yoshe kulishandoka kuya ku minkinda, ngwe bimaanga aba kubethi na kanyungi, cho Yehoba wendekele ngwendi, 'Aba kubethi na kanyungi, Echela munu woshe eluke kunjubo yendi mu kwoloka." ¹⁸ Cho mwene wendekele kuli Yehoshafati ngwendi, "Nkuma kunjakulekele ngwange katha kupolofita bya bibwa hali yange, oloni bukalu lika ndi? ¹⁹ Cho Mikaya ngwendi, "Ngachije oni thziba lijwi lya Yehoba: Njinamwene Yehoba natumbama ha litanda lyendi, nabaje boshe bakuthzila bakwilu bemanenene kuyehi nendi kuliboko lyendi lya chilyo neli lya chimoshwe. ²⁰ Yehoba wendekele ngwendi, 'Iya atha kuthindiya Ahabu, mangana athe kukanduka nakuyula ku Lamoti Ngileyandi?" Umo wabo wendekele echi namukwabo chije. ²¹ Cho kwethzile munthzinthzime kulutwe, nakwimana kumesho a Yehoba, nakwendeka ngwabo, 'Njikamuthzembeleka: Yehoba wendekele kuli ikeye ngwendi, 'Mungila muka?" ²² Uje munthzinthzime wakumbulwile ngwabo, 'Njiyako nakupwa munthzinthzime wa makuli mutunwa twa tupolofita bendi boshe.' Yehoba wamukumbulwile ngwendi, 'Ukamuthzembeleka, cho ukamwatha lalo. Yoni na kulinga ngocho.' ²³ Cho kenga, Yehoba naka munthzinthzime wa makuli mu tunwa twaba tupolofita bobe boshe, cho Yehoba nashiki bukalu hali yobe." ²⁴ Cho Zendekiya muna Kenana, wethzile, wapupile mbanda Mikaya ku manana, nakwendeka ngwendi, "Ngila muka eyi munthzinthzime wa Yehoba unambatele nakuya kutunda muli yange kwija nakwendeka kuli yobe?" ²⁵ Mikaya ngwendi, "Kenga, hali lije litangwa ukanena omu ukaya nakubanda muchibatulo chamukati." ²⁶ Cho mwene wa Isalela wendekele kuli ngamba yendi ngwendi, "Ambata Mikaya na kumutwala ku Amoni, ngubulu wa nganda , nakuli munange, Yoashi. ²⁷ Endeka kuli ikeye ngwobe, 'mwene ngwendi, Aka ou munalume mu kamenga nakumulitha nalikende lyalindondo na tumema twatundondo lika, kweta nomu njikaya bwino." ²⁸ Cho Mikaya ngwendi, "Oshe ukeluka bwino, cho Yehoba kendekele muli yange." Cho wabwethzeleleko ngwendi, "Tolilileni kuli echi, eni banu boshe." ²⁹ Cho Ahabu mwene wa Isalela, na Yehoshafati, mwene wa Yunda, bakandukile ku Lamoti Ngileyandi. ³⁰ Mwene wa Isalela wendekele kuli Yehoshabati ngwendi, "Njilitengulula yange ibenya na kuya na kulwa, oloni thzala mukanjo wobe wabu mwene." Cho mwene wa Isalela walitengulwile ibenya nakuya na kulwa. ³¹ Cho uje mwene wa Alame wakambeyeye baje bantwama ba makalu endi makumi atatu nababali, ngwendi,"Kethi mulukuke mashwalale bakwilika kulema nambe bakulema. Olojo, lukukeni lika mwene wa Isalela. ³² Chasholokele ngwabo omu bantwama ba makalu bamwene Yehoshafati bendekele ngwabo, "Buthunga bene uje ikeye mwene wa Isalela." Batengulukile mangana bamulukuke, cho Yehoshafati watambekele nakulila. ³³ Chasholokele ngwabo omu bakulunu ba makalu bamwene ngwabo kethi ikeye mwene wa Isalela, batengulukile kutunda kukumusheka. ³⁴ Oloni munalume umo wakokele mukili wendi mukukathumwitha na kwasha uje mwene wa Isalela mukati mwalinungilile chikubo chendi. Cho Ahabu wendekele kuli mukakwendetha likalu lyendi ngwendi, "Tenguluka nakunjitunditha munthzita ei, mwafwa njinabulumika mwamubi." ³⁵ Nthzita yakoleleleleko hali lije litangwa na mwene kathele kutunda mulikalu lyendi alitale naba Alame. ³⁶ Cho kuchingwethzi wathsile. Maninga endi etile kutunda ha mbandu yendi kuya mwithi ya likalu lyendi. Cho kuthimbu lyakele nakukobela lithathe, mwetile muteto muli baka nthzita, ngwabo, "Munalume woshe eluke kulifuti lyendi! ³⁷ Cho mwene Ahabu wathsile cho bamunenele ku Samaliya, nakumuthsinda mu Samaliya. ³⁸ Bakushilile lije likalu ku lishali lya Samaliya, cho tutali balyathele maninga endi (oku kukeko bakele nakujwelela bikwithzi), ngwe omu bene lyendekele lijwi lya Yehoba. ³⁹ Kutetha na mithzimbu ikwabo yakutala hali Ahabu, byoshe bije alingile, njubo ya mayo ije watungile, na binganda byoshe bije watungile, nkuma kubabithonene mu mukanda wa bilika bya bimyene ba Isalela ndi? ⁴⁰ Cho Ahabu walalele na bakulu bendi, cho munendi Ahaziya wapwile mwene mu mwela wendi. ⁴¹ Cho Yehoshafati muna Asa waputukile kuyula ba Yunda mu mwaka wabuwana wa mwene waba Isalela Ahabu. ⁴² Yehoshafati wakele na myaka makumi atatu naitanu mukukola omu waputukile kuyula, cho wayulille mu Yelusalema ha myaka makumi abali na itanu. Lithzina lyaba ina lyekele Azumba, muna Shili wa munakathzi. ⁴³ Wendele mubingila bya Asa, ou akele ishe; cho katundile kuli bakebo; wapangele byabibwa ku mesho a Yehoba. Olojo ije myela ya helu kubayambateleho kutunda kuli bakebo. Banu batwaleleleleho kwana milambu na kwenyeka isense ha myela ya helu. ⁴⁴ Yehoshafati wanenele kwoloka na mwene wa Isalela. ⁴⁵ Kwetheka na mithzimbu ikwabo yakutala hali Yehoshafati, na bukama buje washolwele, nomu washelele nthzita, nkuma kubabithonene mu mukanda wa bilika bya bimyene ba Yunda tahi ndi? ⁴⁶ Watundithile baje banalume bikwithzi mu lifuti baje bathalele mu matangwa a ishe Asa. ⁴⁷ Kumwakele mwene mu Endomu, oloni mwayulilile muhato wendi. ⁴⁸ Yehoshafati watungile ma mbopolo yakuya ha kalunga mema; bashakele kuya ku Ofiya nakwambata ngolinde, oloni kabaile mwafwa aje mambopolo athsililile ku Eziyoni Ngemba. ⁴⁹ Cho Ahaziya muna Ahabu wamunalume wendekele kuli Yehoshafati ngwendi, "Echela bingamba bange bajabukile hamo na bingamba bobe mu mbopolo." Oloni Yehoshafati kachitabethele echi. ⁵⁰ Yehoshafati walalele nabakulu bendi cho bamuthsindile nabo mu nganda ya Ndabiti, bakulu bendi, munendi Yeholamu wethzile nakupwa mwene mu mwela wendi. ⁵¹ Ahaziya muna Ahabu waputukile kuyula Isalela mu Samaliya mu mwaka wabulikumi naitanu naibali ya Yehoshafati mwene wa Yunda, cho wayulile myaka ibali hali ba Isalela. ⁵² Wapangele byuma byakujeneka kutela ku mesho a Yehoba nakwendela mubingila bya ishe, mubingila bya ina, na mubungila bya Yelomboamu muna Nembati; omu atwamenenene ba Isalela ku bubi. ⁵³ Wapangelele Mbale nakumulemetha cho washangumukile Yehoba, Njambi wa Isalela, kunena kutenuka ngwe muje bene alingile ishe.