¹ Mbeni Handandi mwene wamu Alamu wakungulwile bakathzita bendi boshe hamo. Kwakele bimwene babandondo makumi atatu nababali hamo nendi, na tubalu na makalu. Wakandukile helu, nakuthzenguluka Samaliya nakubalwitha. ² Watumine tunganda kuli Ahabu mwene wa Isalela, nakwendeka kuli ikeye ngwendi, "Mbeni Handandi nendeka ngechi: ³ Siliba yobe na ngolinde yobe byapwa byange. Lalo banakathzi bobe na bana, baje bababwa, banapu oni bange. ⁴ Mwene wa Isalela wakumbulwile nakwendeka ngwendi, "Chinapu ngwe omu unendeka, Shukulu wange, mwene. Yange na byoshe njli nabyo binapu byobe." ⁵ Tunganda bethzile lalo nakendeka ngwabo, "Mbeni Handandi nendeka ebi, 'Njinatumine majwi kuli yobe, ngolinde yobe, banakathzi bobe, na bana bobe. ⁶ Oloni njikatuma bingamba bange kuli yobe imene hathimbu ino bene, cho bakabatondotonda mu njubo yobe namu binjubo bya bingamba bobe, Bakanyeka namaboko abo obyo byoshe bikabwahela mu mesho abo." ⁷ Cho mwene wa Isalela wathanene bakulunu boshe hamo nakwendeka ngwendi, "Njalombo muthzibuke na kumona omu ou munalume athetela bukalu. Natumu majwi kuli yange mangana ambate bankathzi bange, bana, na siliba, na ngolinde, cho kunjamubyanethele." ⁸ Bakulunu boshe na banu boshe bendekele kuli Ahabu ngwabo, "Kethi umuthzikilile nambe kutabela obyo ashaka" ⁹ Cho Mbene Handandi wendekele kuli baje tunganda twa Mbeni Handandi ngwendi, "Lekeni Shukulu yange mwene ngweni, 'Njinatabela ku byuma byoshe ebi unatumine ngamba yobe kulinga hakulibanga, oloni kunjitabela echi chamuchibali," Cho baje tunganda baile nakutunda baile nakutwala kukumbulula echi kuli Mbeni Handandi. ¹⁰ Cho Mbeni Handandi watumine mukumbu kuli Ahabu, nakwendeka ngwendi, "Echela tulunga bachilinge ku;i yange nakutubakanethaho lalo, oshe nambe lito lya Samaliya litamo ku banu bishe aba bakanjikabangeya bakale na liboko lyakushula hamunu hamunu." ¹¹ Mwene wa Isalela wakumbulwile na kwendeka ngwendi, "Lekeni Mbeni Hnadandi ngweni, 'Kikwethi nambe umo ou anakuthzala mwiba lika, alithziba ngwe ngwabo nakala nakuushulula." ¹² Mbeni Handandi wathzibile ou muthzimbu hathimbu akele nakunwa, ikeye hamo na bimyene bamwithi yendi aba bakele mu bitende byabo. Mbeni Handandi wa kambeyeye banu bendi ngwendi, "Kaleni mundando mukulibwahethela nthzita." Cho balibwahethele nakuya mu byela bya nthzita balukuke ije nganda. ¹³ Cho kengenioni, kapolofita wethzile kuli Ahabu mwene wa Isalela nakwendeka ngwendi, "Yehoba nendeka ngwendi, 'Unamono kutuma chabaka nthzita echi ndi? Kenga, Njibaka mumaboko obe lelo, cho uthzibuka ngwobe yange Yehoba bene." ¹⁴ Ahabu wakumbulwile ngwendi, "Kuli iya? Yehoba wakumbulwile nakwendeka ngwendi, "Kuli bakabipangi ba chikwenje aba bakapangela bi ngubulu babi mbongi." Cho Ahabu ngwendi, "Iya akushangumuka echi kulwa?" Yehoba wakumbulwile ngwendi, "Yobe." ¹⁵ Cho Ahabu wanyungile bakwenje bakabipangi aba bakapangela bingubulu babi mbongi. Betele ku 232. Hanima yabo wanyungile mashwalale boshe, nabaka nthzita boshe ba Isalela; makulukathzi atanu na abali mukutuma. ¹⁶ Batuhukile ha mutanya. Mbeni Handandi wakele na kunwa nakupemnda mu tende yendi, ikeye nabaje bimyene babandondo bakele nakumukwatha ba makumi atatu na abali. ¹⁷ Baje bakwenje bakabipangi bapangelele bingubulu mubi mbongi balibangele kulutwe. Cho Mbeni Handandi bamulekele kuli baka kunenga baje watumine hanja, "Kunakwija banalume kutunds mu Samaliya" ¹⁸ Mbeni Handandi wendekele ngwendi, "Nambe banaija mukwoloka nameme munthzita, bakwateni na mwonyo." ¹⁹ Cho baje bakwenje bakabipangi bapangelele bingubulu babi mbongi batuhukile mu nganda na baka nthzita baba kabangeyeye hanima. ²⁰ Munu woshe wathsiyile ou alitalele nendi. Baka Alame batewele cho baka Isalela babashekele nakubakaba. Mbeni Handandi mwene wa Alamu wathebunukile ha kabalu na banalume batubalu. ²¹ Cho mwene wa Isalela watuhukile nakulukuka tubalu na makalu, nakuthsiya baka Alame mukubatapanga. ²² Cho uje kapolofita wethzile kuli mwenewa Isalela nakwendeka kuli ikeye ngwendi, "Ya ukalitakamethe obe ibenya, ukathzibithithe nakwituluka muli obyo unakulinga, mwafwa ha kwiluka cha mwaka mwene wa Alame akaya nakwimanena lalo. ²³ Bingamba ba mwene wa Alame bendekele kuli ikeye ngwabo, "Kalunga kabo apwa kalunga wamu malundu. Chikecho chibanatakamenene kuhyana yetu. Oloni oni echeleni tulwe nabo mu byana, cho buthunga bene tutakama nakubatubakana. ²⁴ Cho mwatela kulinga ngechi: Tunditheni bimyene boshe ha byela byabo byabuntwama nakwingithaho na bakulunu ba mashwalale. ²⁵ Indula baka nthzita beka ngwe baje wathzimbalethele - cho tubalwithila mu byana. Cho buthunga bene tutakama na kubatubakana." Cho Mbeni Handandi wathzibililile ku bukwathi bwabo nakulinga omu bamulekele. ²⁶ Hanima ya kushangumuka cha mwaka wauhya, Mbeni Handandi wathzibukile baka Alame nakuya nakweta ku Afeki nakulwa naba Isalela. ²⁷ Banu ba Isalela babathzibukile nakubana kulwa nabo. Banu baba Isalela bakele mu chilombo kuli bakebo ngwe mabutanga amandondo abali abimembe, oloni baka Alame bashulithile mbathzubwila ya lifuti. ²⁸ Cho munu wa Njambi wethzile kuyehi na kwendeka kuli mwene wa Isalela ngwendi, "Yehoba nendeka ngwendi: "Mwafwa ba Alame banendeka ngwabo Yehoba apwa ka kalunga kamalundu, oloni kethi njambi wamumingulunga, Njaka aba bakanthzita bakama mu maboko obe, cho ukathzibuka ngwobe yange Yehoba." ²⁹ Cho bakanthzita bakele na bilombo bya kulitalathana ha matangwa atanu na abali. Cho halitangwa lya muchitanu na abali nthzita yashangumukile. Banu ba Isalela bathsiyile 100,000 baka Alame ba hathi mulitangwa limo. ³⁰ Aba bathaleleho batewelele ku Afeki, munganda cho mbango yawililile hali banlume bakweta makumi abali na atanu na abali a makulukathzi aba bathaleleho. Mbeni Handandi watewele nakuya mu nganda, mu chibatulo chamukati. ³¹ Ngamba ya Mbeni Handandi wendekele kuli ikeye ngwendi, "Kengoni, tunathzibi ngwabo bimyene bamu njubo ya Isalela bapwa bimyene bangothzi. Njalombo echela tuthzale buthzalo bwa mashaka mu bimbunda byetu na mikole ku mitwe yetu, nakuya kuli mwene wa Isalela. Pamo atha kwechela mwonyo wobe." ³² Cho bathzalele buthzalo bwa mashaka mu bimbunda byabo na mikole ku mitwe yabo nakuya kuli mwene wa Isalela nakwendeka ngwabo, "Njambi yobe MbeniHandandi nendeka ngwendi, 'Njalombo echela njipwe na mwonyo" Ahabu ngwendi, Achili na mwonyo? Apwa ndolome yange." ³³ Choni baje banlume bakele nakuthzibilila kubandamena kumona chimwetho kutunda kuli Ahabu, cho bwathi bwathi bamukumbulwile ngwabo, " Eyo, ndolome yobe Mbeni Handandi anakuyoya" Cho Ahabu ngwendi, "Yeni mukamunene." Cho Mbeni Handandi wethzile kuli ikeye, na Ahabu wamutabethele kukobela mu likalu lyendi. ³⁴ Mbeni Handandi wendekele kuli Ahabu ngwendi, "Njikwilwithila bingands byoshe bije tate watambwile kuli isho, cho utunga kwakulandethela obe ibenya mu Ndamasiku, ngwe omu alingile tate mu Samaliya." Ahabu wakumbulwile ngwendi, "Njikwechela uye na chithzibathano echi." Cho Ahabu wapangele chithzibathano naikeye nakumwchela aye. ³⁵ Munalume umo, umo wabana bauje kapolofita, wendekele kuli umo kapolofita mukwabo ngwendi kwitila mu lijwi lya Yehoba, "Njalombo njipupe." Oloni uje munalume wabyanene kumupupa. Cho uje kapolofita wendekele kuli tupolofita bakwabo ngwendi, ³⁶ "Mwafwa kuwatabelele lijwi lya Yehoba, hathimbu oyo bene unjithethza, ndumba akuthsiya." Hathimbu bene oyo uje munalume amuthethzele, ndumba wethzile hali ikeye nakumuthsiya. ³⁷ Cho uje kapolofita wawanene munalume mukwabo nakwendeka ngwendi, "Njalombo njipupe." Cho uje munalume amupupile nakumubulumuna. ³⁸ Cho uje kapolofita waile nakubandemena mwene ku mukwakwa; walithzengele ibenya ha mesho na mbandenji. ³⁹ Omu akele nakwita mwene, uje kapolofita watambekele na kwendeka ngwendi, "Ngamba yobe naile mukati ka nthzita, cho lishwalale nemanene na kunena umo munalume nakwendeka ngwendi, 'Nyunga ou munu. Oshe ngwe mungila ili yoshe athzimbala, mwonyo wobe bakawana ha mwonyo wendi, nambe kufweta talenda ya Siliba.' ⁴⁰ Oloni hamulonga wakukala na bipangi cha ndungo yobe kwenda oku na kuje, uje munalume nathebunukile nakutewa." Cho mwene wa Isalela wendekele kuli ikeye ngwendi, "Echi chikecho chipwa kunyanyametha chobe - yobe ibenya unachishakula." ⁴¹ Cho uje kapolofita bwathi bwathi watundithile ije mbandenji ku mesho endi na mwene wethzile nakumuthzibuka ngwe napu umo wa tupolofita. ⁴² Uje kapolofita wendekele kuli mwene ngwendi, "Yehoba nendeka ngwendi, 'Hamulonga wakwechela munu kuya kutunda mu maboko obe ou njatumbwilile kutha, mwonyo wobe winga mu mwonyo wendi, na banu bobe mu banu bendi." ⁴³ Cho mwene wa Isalela waile kunjubo yendi na buthiwa hamo nakulubala, cho wetele ku Samaliya.