¹ Ahabu walekele Njezembele byoshe bije alingile Eliya nomu athsiyile tupolofita boshe na mukwale. ² Cho Njezembele watumine kanganda kuli Eliya ngwendi, "Echela tulunga balingemo nakuli yange, nakutubakanethaho lalo, oshe ngwe kunjilingitha mwonyo wobe kupwa ngwe mwonyo waumo wabaje tupolofita bathsiyile mu imene hathimbu ino bene" ³ Omu athzibile ngocho Eliya, wakatukile nakutewetha mwonyo wendi nakuya ku Mbeyashemba lifuti kyakele lya Yunda, kuje athethzele ngamba yendi. ⁴ Oloni ikeye waile bungethzi bwa litangwa limo kukobela mu mambo, na kwija nakutumbama mwithi ya muti wa kujobelela. Walilombelelele ibenya ngwendi athse, nakwendeka ngwendi, "Kyeho, ahoni, Yehoba; ambata mwonyo wange, mwafwa kunjabwahele kutubakana bakulu bange ba kuthsa." ⁵ Cho walalele hathi nakukotha mwithi ya muti wakujobelela. Mukukathumwitha kangelo wamukwatele na kwendeka kuli ikeye ngwendi, "Katuka ulye." ⁶ Eliya watonene, cho kuyehi na mutwe wendi kwakele likende eli banafwatula ha manungu na njabu ya mema.Cho walile na kunwa nakulala lalo hathi. ⁷ Kangelo ka Yehoba wethzile lalo kamuchibali na kumukwata na kwendeka ngwendi, " Katuka ulye, mwafwa bungethzi bukwamena manene." ⁸ Cho wendukile nakulya na kunwa, cho endele nanthzili ya chije kulya amatangwa makumi awana kweta ku Holembu, ku munkinda wa Njambi. ⁹ Waile muchingelengenya nakutumbamamo . Cho lijwi lya Yehoba lyethzile kuli ikeye nakwendeka kuli ikeye ngwabo, "unakulinga bika kuno, Eliya?" ¹⁰ Eliya wakumbulwile ngwendi, "Njinakala na kuthsila Yehoba manene, Njambi wa mayongomena, mwafwa banu ba Isalela bana liula chithzibathano chobe, kubujula mutula wobe na kuthsiya tupolofita bobe na mukwale. Ahoni yange, yange lika, bananjithethzeho cho hali lalo nakwetheka kwambata mwonyo wange" ¹¹ Yehoba wakumbulwile ngwendi, "Ya hanja na kwimana ha munknda kumesho age." Cho Yehoba watubakanene, na lihunthzi lya thzili lya pupile ha munkunda na kupathzula mamanya mu bimbathzubwila ku mesho a Yehoba, oloni Yehoba kakele muje mulihunthzi. Cho hanima ya lihuthzi, kwethzile mundenda, oloni Yehoba kakele mumundenda. ¹² Cho hanima ya mundenda kwethzile tuhya, oloni Yehoba kakele mu tuhya. Cho hanima ya tuhya, lijwi lya lindondo lyakwimana lyethzile. ¹³ Omu athzibile lije lijwi Eliya, wathzengele kumesho endi na chithzalo chendi, watuhukile, na kwimana muchikolo cha chije chingelengenya. Cho lijwi lyethzile kuli ikeye lije lyendekele ngwabo, "Unakulinga bika kuno, Eliya?" ¹⁴ Eliya wakumbulwile ngwendi, "Njinakala na kuthsila Yehoba manene, Njambi wa mayongomena, mwafwa banu ba Isalela bana liula chithzibathano chobe, nakubujula mitula yobe, na kuthsiya tupolofita twobe na mukwale. Ahoni yange, yange lika, bananji thethzeho cho bali nakwetheka kwambata mwonyo wange." ¹⁵ Cho Yehoba wendekele kuli ikeye ngwendi, "Ya, iluka bungethzi bwobe ku mambo ya Ndamasiku, cho omu uketa ukabwabetha Hazayele kupwa mwene hali baka Alamu, ¹⁶ cho ukabwabetha Njehu muna Nimushi kupwa mwene hali Isalela, cho ukabwabetha Elisha munaShafati waku Ambele Mehola kupwa kapolofita mu mwela wobe. ¹⁷ Chikalingiwa ngechi ngwe Njehu akathsiya ou woshe akatewa ku mukwale wa Hazayele, na Elisha akathsiya ou woshe akatewa kutunda ku mukwale wa Njehu. ¹⁸ Oloni njikalithethzela yange ibenya banu bakweta makulukathzi atanu na abali mu Isalela, aba mabulu abo kanda athsikameko kuli Mbale na tunwa twabo kanda tumuthsembeko" ¹⁹ Cho Eliya wakatukile kutunda kuje na kuwana Elisha muna Shafatu, ou akele nakulima na bimangati likumi na bibali bya bingombe bakele kulutwe lwendi, cho ikeye wakele na kulima na mangati yabu likumi na bibali. Eliya waile kuli Elisha na kuwithila chithzalo chendi hali ikeye. ²⁰ Cho Elisha wathethzele bingombe nakushatukila Eliya; wendekele ngwendi, "Njalombo echela njithsembe ba tate naba nana, cho njikukabe. "cho Eliya wendekele kuli ikeye ngwendi, "Iluka, oloni thinganyeka hali ocho njinalingi kuli yobe." ²¹ Cho Elisha welukile kutunda kuli Eliya nakutwala mangati ya bingombe, wathsiyile baje tuthitu, nakuteleka ije thitu na bitale byatundile ku bimangati bya bingombe Cho wayanene kuli banu cho balile. Cho wakatukile, nakukabangeya Eliya nakumupangela.