¹ Cho hanima ya matangwa amangi lijwi lya Yehoba lyethzile kuli Eliya, mu mwaka wa mu chitatu wa liyanga, kwendeka ngwalyo, "Ya, ukalisholole kuli Ahabu oko njikatuma nyonthzi ha mabu." ² Eliya waile na kulisholola kuli Ahabu; choni njala ya hyanene mu Samaliya. ³ Ahabu wathanene Ombendiya, ou wakele na kutala ije nganda, Choni Ombendiya wathingimikile Yehoba manene, ⁴ mwafwa omu Njezambele wakele na kuthsiyanga tupolofita ba Yehoba, Ombediya wambatele chita chimo cha tupolofita na kubashweka mu chingelengenya muthimbu ya makumi atanu nakuba litha makende na mema. ⁵ Ahabu wendekele kuli Ombendiya ngwendi, "Ya ituluka mu lifuti ku tubwelebwelu na tundonga twoshe. Hamo tukawanenako mwila na kwobola tubalu na tuthitu bakala na mwonyo, mangana kethi tukathzimbalethe tuthitu boshe." ⁶ Cho bapangele lifuti hakati kabo nakwita hakati kalyo nakuthetela mema. Ahabu waile likalyendi ngila imo cho Ombendiya waile ngila ikwabo. ⁷ Omu Ombendiya wakele ha ngila, chakwilika ku chikulahahela, Eliya waliwanene nendi. Ombendiya wamuthzibukile nakutala chihanga hathi. Wendekele ngwendi, "Yobe bene, shukulu wange Eliya?" ⁸ Eliya wamukumbulwile ngwendi, "Yange bene. Ya ukaleke shukulu yobe, 'Kenga, Eliya alikuno," ⁹ Ombendiya wamukumbulwile ngwendi, "Njinabulumuna bati, hakupwa wane ndungo yobe, mumaboko a Ahabu, mangana anjithsiye? ¹⁰ Omu ayoya Yehoba Njambi yobe, kukwethi lifuti nambe nganda yabumwene oku shukulu yange atumine banu nakukutonda. Omu mwoshe lifuti nambe nganda yabu mwene yendeka ngwabo, 'Eliya kuno wahiko.' Ahabu waba thingithile chithingo ngwabo kubakuwanene. ¹¹ Cho hanoni wendeke ngwobe, 'Ya ukaleke shukulu yobe ngwobe Eliya ali kuno'. ¹² Thimbu oyo bene njitunda kuli yobe, muthzithzime wa Yehoba ukwambata kuya ku myela kunjithzibuka. Cho omu njiya na kuleka Ahabu, cho omu elika kukuwana, ukanjithsiya. cho yange, ndungo yobe, njinalemetha Yehoba kutunda kubukwenje bwange. ¹³ Kubakulekelecho ndi, shukulu yange, ebi njalingile omu Njezembele wathsiile tupolfita ba Yehoba, omu njashwekele chita chimo cha tupolofita ba Yehoba mu makumi atanu mu chingelengenya na kubalitha na makende na mema ndi? ¹⁴ Cho wendeka kuli yange ngwobe, 'Ya nakuleka shukulu yobe ngwobe Eliya alikuno', mangana akanjithsiye. ¹⁵ Cho Eliya wakumbulwile ngwendi, "Omu Yehoba wa mayongomena wayoya, oku jinemana, mubuthunga bene njili sholola kuli Ahabu lelo," ¹⁶ Cho Ombendiya waile nakuliwana na Alabu, nakumuleka ebi endekele Eliya. Cho mwene waile na kuliwana na Eliya. ¹⁷ Omu Ahabu wamwene Eliya, wendekele kuli ikeye ngwendi, "Yobe bene? Yobe ou akanene bukalu kuli Isalela!" ¹⁸ Eliya wamukumbulwile ngwendi, "Kujananenele bukalu kuli Isalela embwe, oloni yobe na nanga ya isho yeni munanenetha bukalu ha kuliula kukambeya cha Yehoba na kukabangeya ba Mbale. ¹⁹ Choni aha, tuma lijwi nakunjikukungulwila ba Isalela boshe hamunkinda wa Kamelo, hamo nabaje tupolofita bita biwana na makumi atanu ba Mbale nabaje tupolofita bita biwana ba Isalela ou akali kumetha ya Njezembele." ²⁰ Cho Ahabu watumine lijwi ku banu boshe ba Isalela nakukungulula hamo tupolofita ha munkinda wa Kamelo. ²¹ Eliya wethzile kuyehi nabanu boshe na kwendeka ngwendi, "Mwambata thimbu yakupwa hali mukutwalelela kutengulula bithinganyeka byeni? Oshe Yehoba apwa Njambi, mukabeni. Oshe Yehoba apwa Njambi, mukabeni. Oloni Mbale apwa Njambi, cho mukabeni." Oloni baje banu kubamukumbulwile nambe lijwi. ²² Cho Eliya wendekele kuli baje bana ngwendi, " Yange, Yange lika lyange, bananjithethze kupwa kapolofita wa Yehoba, oloni tupolofita ba Mbale bali bita biwana na makumi atanu. ²³ Cho echeleni batwane bapoho babali. Becheleni bashakuleko poho umo babenya nakumubatula mu bipuka, na kubijala habitale, oloni kethi bake tuhya kwithi. Cho nji bwahetha ou poho mukwabo nakumwaka habitale, kunjaka tukya kwithi embwe. ²⁴ Cho muthana halithzina lya Njambi yeni, nange njithana halithzina lya Yehoba, na Njambi ou ataba natuhya, cho mwecheleni apwe Njambi," Cho banu boshe bakumbulwile na kwendeka ngwabo, "Echi chinabwaha," ²⁵ Cho Eliya wendekele kutupolfita ba Mbale ngwendi, "Shakuleni poho umo weni babenya nakuputukilaho kumubwabetha, mwafwa yeni mubabengi, Cho thaneni halithzina lya Njambi yeni, oloni kethi mwakeko tuhya kwithi ya poho." ²⁶ Bambatale poho uje babanene naku bwabetha, cho bathanene halithzina lya Mbale kutunda ku mutondo kweta mutanya, ngwabo, "Mbale, , tuthzibe." Oloni kukwakele lijwi nameme umo wakukumbulula. Bathzengulukile mutula uje bapangele nakukina. ²⁷ Kumutanya Eliya wabathinamethele na kwendeka ngwendi, "Tambekeleni manene! Apwa Njambi! Pamo anakuthinganyeka, nambe anakuhwima, nambe ali na kwenda habungethzi, nambe pamo nakotha cho chatela kumwindula." ²⁸ Cho batambekele na lijwi lyakama manene, nakulitabuthzola babenya, ngwe omu bakalingi, na mikwale na makunga, kweta nomu maninga abo etile hali bakebo. ²⁹ Hakati ka litangwa ketile, cho bakele na kulomba kweta kuthimbu ya kulambula milambu ya mangwethzi, oloni kukwakele lijwi nambe umo wa kukumbulula' kukwakele umo wakele mbunge kukulambelela chabo. ³⁰ Cho Eliya wendekele ku bana boshe ngwendi, "Ijeni kuyehi nange, "cho na banu boshe bethzile kuyehi nendi. Cho watungulwile uje mutula wa Yehoba uje wakele wakuthsa. ³¹ Eliya wambatele mamanya likumi na abali, halimanya halimanya lyemaneneko muyati umo wa bana ba Yakobo-chakele Yakobo oku kwethzile lijwi lya Yehoba, ngwalyo, "Lithzina lyobe likapwa Isalela." ³² Cho watungile mutula na aje mamanya mulithzina lya Yehoba nakwinda kapila kakuthzenguluka mutula bwakama bwa kutela kunyunga mingomo ibali ya mema ³³ Wabwabethele bitale bya tuhya, wabatwile uje poho mubipuka, nakujala bije bipuka byauje poho ha bitale. Wendekele ngwendi, "Shulitheni binjaba bya mema biwana cho mwitile ha bwana bwakulumba na habitale." ³⁴ Cho wendekele ngwendi, "Chilingeni kamuchibali," cho bachilingile kamuchibali. Nakakwabo wendekele ngwendi, "Chilingeni kamuchitatu," cho bachilingile kamuchitatu. ³⁵ Mema etile kuthzenguluka mutula na kushulitha kaje kapila. ³⁶ Chasholokele hathimbu ya kulambula cha bwana bwa chingwethzi, omu kapolofita wethzile kuyehi na kwendeka ngwendi, "Yehoba, Njambi wa Abilahama, wa Isake, na wa Isalela, echela bachithzubuke lelo ngwe wapwa Njambi mu Isalela, cho yange nji ndungo yobe, cho lalo yange njinalingi byuma byoshebi kwetheka na lijwi lyobe. ³⁷ Njithzibe, Yehoba, njithzibe, mangana aba banu bathe kuthzubuka ngwabo yobe, Yehoba, wapwa Njambi, na kutengulula bimbinge byabo kwiluka lalo kuli yobe ibenya." ³⁸ Cho tuhya twa Yehoba twawile nakunyongetha uje mulambu wakulumba, hamo na bitale, aje mamanya, na likungu, nakumitha mema aje akele mu kapila. ³⁹ Omu banu boshe bamwene echi, balalele bihanga hathi nakwendeka ngwabo, "Yehoba, apwa Njambi! Yehoba, apwa Njambi! ⁴⁰ Cho Eliya wendekele kuli bakebo ngwendi, "Ambateni tupolofita ba Mbale. Kethi mwechele umo atewe." Cho babambatele, na Eliya wanenele baje tupolofita ba Mbale kuchikolo cha ndonga wa Kishoni na kubathsiyila kuje bene. ⁴¹ Eliya wendekele kuli Ahabu ngwendi,"Katukeni, lyeni na kunwa, mwafwa kuli chilulumo cha nyonthzi ya kama." ⁴² Cho Ahabu wakandukile nakulya na kunwa. Cho Eliya wakandukile helu lya Kamelo, wakulamanene hathi nakwaka chihanga chendi mukati ka mabuli endi. ⁴³ Wendekele kuli ngamba yendi ngwendi, "Ya helu, kenga ku kalunga ndonga." Ngamba yendi wa kandukille na kukenga na kwendeka ngwendi, "Kukwethi nambe chimo." Cho Eliya wendekele katanu na kabali ngwendi, "Ya lalo. ⁴⁴ Hathimbu yamuchitanu nakabali uje ngamba wendekele ngwendi, "Kenga, kuli lishewa linakukanduka mu kalunga ndonga, lyalindondo ngwe liboko lya munu." Eliya wakumbulwile ngwendi, "Kanduka ukendeke kuli Ahabu ngwobe, 'Bwahetha likalu lyobe nakuthikumuka thimbu kanda nyonthzi ikwimike." ⁴⁵ Chalingikile ngwe mukathimbu kakandondo lilu lyafwikile namashelwa akuthzibala hamo na lihunthzi, cho kwakele nyonthzi yakama. Ahabu walondele nakuya ku Njezileo, ⁴⁶ oloni liboko lya Yehoba lyakele hali Eliya. Wakobelethele mukanjo wendi mu mwiba wendi na kushatukila kuchikolo cha Njeziko thimbu kanda Ahabu kweta kuje.