¹ Cho Elisha wendekele kuli uje munakathzi akele na munendi ou belwithle ku mwonyo. Wendenkele kuli ikeye ngwendi, "Katuka, nakuya na baka njubo yobe, nakukakala kwoshe oko ushaka mulifuti lyeka mwafwa Yohoba anakunena njala mulifuti eli ikala ha myaka itanu naibali." ² Cho uje mwanakathzi watabelele majwi a munu a Njambi wakatukile. Waile nabaka njubo yendi nakukala myaka itanu naibali mulifuti lyaba Filisite. ³ Chasholokele kumakumithilo a myaka itanu naibali uje mwanakathzi welukie kutunda ku lifuti lyaba Filisite, cho waile kuli mwene nakumulomba hamulonga wanjubo yendi na libu lyendi. ⁴ Choni mwene wakele nakwendeka na Ngehazi ngamba ya uje muna wa Njambi, ngwendi, "Njalombo njileke byuma byakama byoshe ebi nalingi Elisha." ⁵ Cho hathimbu akele nakuleka mwene omu Elisha welwithile kumwonyo mwana uje wathsile, uje bene munakathzi uje munendi belwithile ku mwonyo wethzile nakulomba mwene hamulonga wa njubo yendi na libu. Ngehazi wendekele ngwendi, "Shukulu mwene, ou ikeye uje munakathzi, nou ikeye munendi, ou Elisha walwithile ku mwonyo." ⁶ Omu mwene wehwile uje munakathzi hali munendi wachimbunwine kuli ikeye. Cho mwene wakambeyeye muka bipangi umo hali ikee, ngwendi, "Mwihilwithile byoshe bije bya pwile byendi na kuteja choshe cha mumahya endi na kutunda halitangwa wathethzele lifuti kweta lelo." ⁷ Elisha wethzile ku Nalamasiku kwakele Mbeni Handandi mwene waba Alame nakubinja. Mwene bamulekele ngwabo, "Uje muna wa Njambi naija kuno." ⁸ Mwene wendekele kuli Hazale ngwendi, "Ambata bwana muliboko lyobe uye uhiuane na muna wa Njambi, nakwihula Yehoba kwitila muli ikeye, ngwobe, 'Njikenduka kutunda kumishongo ei ndi?'" ⁹ Cho Hazale waile nakuliuna nendi amabatele bwana bwa byuma byoshe byabibwa byamu Ndamasiku, babyambatele kuba ngamela makumi wana. Cho Hazale wethzile nakwimana kuli Elisha nakwendeka ngwendi, "Munobe Mbeni Handandi mwene waba Alame nanjitumu kuli yobe, ngwendi, 'Njiyoya kutunda kumishongo ei ndi?'" ¹⁰ Elisha wendekele kuli ikeye ngwendi, "Ya, endeka kuli Mbeni Handandi ngwobe, 'Buthenga bene uyoya,' oloni Yehoba nanjisholwela yange ngwendi chilibene athsa." ¹¹ Cho Elisha wakengele Hazale kweta nomu athzibile shwamwa, cho munu wa Njambi walilile. ¹² Hazale wehwile ngwendi, "Bikayo ulila, shukulu?" Wamukumbulwile ngwendi, "Mafwa njinatanekeya bubi obu ukalinga kuli banu ba Isalela. Ukaka muje mubatakamena mu tuhya, cho ukathsiya bakwenje babo boshe namukwale, kubatuthzola banike babandondo babo mubipuka, nakutabula banakathzi babo bamemo." ¹³ Hazale wakumbulwile ngwendi, "Ngamba yobe iya, ou akalinga chuma echi chakama ngachije? Akakula lka katali." Elisha akumbulwile ngwendi, "Yehoba nanjimwetha ngwendi ukapwa mwene hali ba Alame." ¹⁴ Cho Hazale wathethzele Elisha na kwija kuli Shukwaina, ou wendekele kuli ikeye ngwendi, " Nendeka bati Elisha kuli yobe?" Wakumbulwile ngwendi, "Nanjilekee ngwendi uyoya bene." ¹⁵ Cho halikaki Hazale wambatele lipai nakulimbwitika mu mema, na kulifwika ha mesho a Mbeni Handandi mangana athse. Cho Hazale wa pwile mwene mukumwinga. ¹⁶ Mumwaka wabutanu wa Yolamu muna Ahabu, mwene wa Isaela, Yeholamu washangumukile kuyula. Wakele muna Yohoshafati mwene wa Yunda. Washangumukile kuyula thimbu Yehoshafati wapwile mwene wa Yunda. ¹⁷ Yeholamu wakele na myaka makumi atatu naibali omu washangumukile kuyula, cho wayulile ha myaka itanu naitatu mu Yelusalema. ¹⁸ Yeholamu wendekele mubingila bya bimyene ba Isalela, ngwe mu njubo ya Ahabu yakele nakulinga; mwafwa wakele na muna Ahabu wamunakathzi kupwa munakathzi wendi, cho waingile byabibi kumesho a Yehoba. ¹⁹ Nambengocho, hamulonga wa ngamba yendi Ndabiti. Yehoba kashakele kunyongetha Yunda, hakupwa wa mulekele ngwendi thimbu yoshe akamwanaana chithemunwina. ²⁰ Mumatangswa a Yeholamu, Endomu yalitundithile mu liboko lya Yunda, cho balyanene babenya mwene. ²¹ Cho Yeholamu wajabukilile ku Zaya na makalu endi oshe. Omu baka Endomu bathzengulukile Yeholamu, bakulunu ba makalu endi bakatukile nakubalukuka muthimbu ya buthsiki; oloni bakanthzita ba Yeholamu batewele nakwiluka kubinjubo byabo. ²² Cho Endomu inapu mukutengulukila chiyulo cha Yunda naku lelo, Libina lalo walikangele hathimbu imo lika. ²³ Kwetheka na mithzimbu ikwabo hali Yeholamu, byoshe bije walingile kuma kubabithonene mu libulu lya bilika bya bimyene ba Yunda ndi? ²⁴ Yeholamu wahwimine hamo nabaishe cho bamuthsindile nabakebo munganda ya Ndabiti. Cho Ahaziya munendi wapwile mwene mu mwela wendi. ²⁵ Mumwaka wabu likumi na ibali ya Yolamu muna Ahabu, mwene wa Isalela, Ahaziya muna Yeholamu, mwene wa Yunda, washangumukile kuyula. ²⁶ Ahaziya wakele na myaka makumi abali naibali mukukola omu ashangumukile kuyula; wayulile ha mwaka umo mu Yelusalema. Lithzina lyaba ina lyakele Athaliya; wakele muna omuli wamunakathzi mwene wa Isalele. ²⁷ Ahaziya wendekele mubingila bya njubo ya Ahabu; wapangele echi chachibi mumesho a Yehoba, ngwe muje njubo ya Ahabuu yakele na kulinga, mwafwa Ahaziya wakele kauko mu njubo ya Ahabu. ²⁸ Ahaziya waile na Yolamu muna Ahabu, nakulwa na Hazale, mwene wa Alamu, ku Lamoti Ngileyandi. Bka Alame babulumwine Yolamu. ²⁹ Mwene Yolamu welukile bakamuthake mu Yezileo ku bmbandu bije bamwakele baka Alame ku Lamoti omu alwile na Hazale mwene wa Alamu. Cho Ahaziya muna Yeholamu, mwene wa Yunda, wa thikumukile ku Yezileo nakutala Yolamu muna Ahabu, mwafwa Yolamu bamubulumwine.