¹ Elisha wendekele ngwendi, "Thzibilileni lijwi lya Yehoba. Ebi bikyebo byanendeka Yehoba; 'Hathimbu ino bene imene theteko ya bunga bwabubwa bakabulandetha na shekele imo lika, na bitheteko bibali bya mbali na shekele imo, mu bikolo bya Samaliya." ² Cho uje mukulunu ou athetelele mwene ha liboko wakumbulwile uje munu wa Njambi, nakwendeka ngwendi, "Kenga, nambe ngwe Yehoba apanga binjanena mwilu, echi chuma chinatha kupangewa? Elisha wamukumbulwile ngwendi, "Kenga, ukabumona namesho obe kulingiwa, oloni kuukaliho nambe chimo chabyo." ³ Choni kwakele banalume bawana na mbumba hanja yo chikolo cha nganda. Balyendekethele umo namukwabo ngwabo, "Bikajo tutumbamena kuno kweta nomu tuthsa? ⁴ Oshe ngwe twendeka ngwetu tunapande kuya munganda, cho tukathsilamo muje. Oloni oshe tutwalelela kutumbama kuno, hanga tuthsa lika.Choni, ijeni, echeleni, tuye kuli baka thzita baba Alame. Oshe bakatunyunga na mwonyo, tukayoya, cho oshe batuthsiya, tukathsa lika." ⁵ Cho bakatukile nakutoka kwa litangwa baye ku chilombo chabaka Alame; omu betele hayehi na chilombo, kukwakele nambe umo munu kuje. ⁶ Mwafwa Shukulu walingithile baka nthzita ba Alame kuthziba miyoyo ya makalu, na miyoyo ya tubalu - miyoyo ya mbunga ikwabo yakama ya baka nthzita, cho ba lyendeketheleumo na mukwabo ngwabo, "Ou mwene wa Isalela nakumuna bimyene baba Hitite nabaka Ingitu kwija nakutulwitha," ⁷ Cho baje mashwalale bakatukile na kutewa hakutoka kwa litangwa; bathethzele matende abo, tubalu twabo, bimulu babo, na chilombo ngwe muje bene chakele, nakutewetha myonyo yabo. ⁸ Omu baje banalume ba mbumba bethzile hanja ya chilombo, bakobelele mu tende imo na kulya nakunwa, na kwambatamo siliva na ngolinde na buthzalo, nakuya nakubishweka. Belukile nakukobela mutende ikwabo nakupukulamo lalo, nakuya na kubishweka. ⁹ Cho bendekele kuli umo namukwabo ngwabo, "Kutwethi nakulinga mwamubwa. Eli litangwa linapu lya muthzimbu waubwa, oloni tunakwoloka kulu halikelyo. Oshe tubandamena nakukukya, kashitiko katutubakane. Choni, ijeni, tuyeni tukaleke ba ku njubo ya mwene." ¹⁰ Cho baile nakuthana baka kunyunga bikolo bya nganda. Babalekele, ngwabo, "Tunaile ku chilombo chaba Alame, oloni kukwakele nambe umo, nambe bithsindo bya munu byahi, oloni kunakala tubalu banaba kutu, na bimulu bakukuta, nama tende muje bene akele" ¹¹ Cho baka bikolo batambekele ou muthzimbu, cho lalo bawambulwile mukati ka njuboya mwene. ¹² Cho mwene wendekele buthsiki nakwendeka kuli bingamba bendi ngwendi, "Njimilekoni ebi banalingi kui yetu baka Alame. Banathzibuka ngwe tuli na njala, cho batuhuka chilombo na kulishweka mu mahya. Bana kwendeka ngwabo, 'Omu baija kutunda munganda, tubambata bamwonyo, nakukobela mu nganda. ¹³ Umo wabingamba ba mwene wakumbulwile ngwendi," Njamilambelela, echeleni banalume bamo bambate tubalu batanu baje banathala, aba banathethze mu nganda. Banapu ngwe kutuma chaba Isalela aba banathethze - babangi banthsi laja oni; echeleni tubatume tumone." ¹⁴ Cho bambatele makalu na tubalu, cho mwene wabatumine hanima ya baka nthzita baba Alame, ngwabo, "Yeni mukamone." ¹⁵ Baile hanima yabo ku Yondani, na mikwakwa yoshe yashulile na buthzalo na bitenga ebi bombilile baka Alame mukwenda chabo bwathi. Cho baje tunganda belukile nakuleka mwene. ¹⁶ Baje banu baile na kupukula chilombo chaba Alame. Cho theteko yabunga bwabubwa babilandethele na shekele umo, na bitheteko bibali bya mbali na shekele umo, ngwe omu lyendekele lijwi lya Yehoba. ¹⁷ Mwene wakambeyeye uje mukulunu athatelele haliboko lyendi kupwa wakutala kuchikolo, cho na banu bamulyatatengelele hachikolo cha ngila. Wathsile ngwe muje munu wa Njambi wendekele, ou wendekele hathimbu ethzile mwene kuli ikeye. ¹⁸ Cho chasholokele ngwe muje endekele munu wa Njambi kuli mwene, ngwendi, "Muthimbu ya chifwa chino mu chikolo cha Samaliya, byetheko bibali bya mbali bukasholoka ha shekele imo." ¹⁹ Uje mukulunu wakumbulwile munu wa Njambi na kwendeka ngwendi, "Kenga, nambe oshe Yehoba apange binjanena mwilu, chatha kupangewa echi chuma? "Elisha wendekele ngwendi, "Kenga, ukachimona kulingiwa na mesho obe, oloni kuukaliho chili choshe" ²⁰ Obyo bikebyo bene byalingiwile kuli ikeye, mwafwa banu bamulyatangelele mu chikolo, cho wathsile.