¹ Cho mu mwaka wamu likumi na itanu naitatu ya Yehoshafati mwene wa Yunda, Yolamu muna Ahabu waputikile kuyula ba Isalela muje mu Samaliya; wayulile myaka likumi nai bali. ² Wapangele chuma chachibi mu mesho a Yehoba, oloni mwafwa watundithile ngunthzi ya limanya lyaku lema lya Mbale lije watungile ishe. ³ Nambe ngcho wakwatethele ku bubi bwa Yelomboamu muna Nembatii, ou wanenethele Isalela kubulumuna; kathele kutunda kuli bakebo embwe. ⁴ Choni Mesha mwene waba Moabu wakele nakulitha bimanga. Wanene mwene wa Isalela chita cha makulukathzi a bana ba bimanga na maaka a bankomba babimanga chita cha makulukathzi. ⁵ Oloni hanima ya kuthsa cha Ahabu, uje mwene wa Moaba watengulukilile mwene wa Isalela ⁶ Cho mwene Yolamu watundile ku Samaliya hali ijebene thimbu na kubungiya ba Isalela boshe mangana baije ku nthzita. ⁷ Watumine muthzimbu kuli Yehoshafati mwene wa Yunda, ngwendi, "Mwene waba Moabu najitengulikila yange. Mwatha kuya nage nakulwa na Moabu?" Yehoshabati wakumbulwile ngwendi, "Njiya.Njili ngwe omu uli, bana bange ngwe bobe, tubalu twange ngwe tubalu twobe." ⁸ Cho wendekele ngwendi, "Ngila imo ili itukamilukukilamo?" Yehoshafati wamukumbulwile ngwendi, "Kuuitila kumambo yaku Endomu." ⁹ Cho mwene wa Isalela waile na mwene wa Yunda hamo na mwene wa Endomu. Betangene ha matangwa atanu na abali, cho kukwakele mema abaka nthzita nambe a tuthitu baile nabo kwahi. ¹⁰ Cho mwene wa Isalela wendekele ngwendi, "Bikebi? Nkuma Yehoba nathana bi myene batatu mangana abane muliboko lya Moabu ndi? ¹¹ Oloni Yehoshofati ngwendi, "Nkuma kuno kukwethi kapolofita wa Yehoba, mangana kwitila muli ikeye twihule Yehoba?" Umo wa bingamba ba mwene wa Isalela wakumbulwile ngwendi, "Elisha muna Shafati ali kuno, ou wetilile mema ha maboko a Eliya." ¹² Yehoshabati ngwendi, "Lijwi lya Yehoba lili nendi." Cho uje mwene wa Isalela, Yehoshafati, hamo na mwene wa Endomu bathikumukile kuli ikeye. ¹³ Elisha wendekele kuli uje mwene wa Isalela ngwendi, "Yange njili nabika bya kupanga neni? Yeni kuli tupolofita babaisho naba nyoko." Cho mwene wa Isalela wendekele kuli ikeye ngwendi, "Embwe, mwafwa Yehoba nathana aba bi myene batatu hamo mangana abane mu liboko lya Moabu." ¹⁴ Elisha wakumbulwile ngwendi, "Omu ayoya Njambi wa mayongomena, oku njinemana, oshe ngwe kunjathingimikile kukalako cha Yehoshafati mwene wa Yunda, kunjatha kwaka mangana kuli yobe, nameme kukutala. ¹⁵ Olonioni njinenele mukakwimba. "Cho chethzile nakusholoka omu mukakwimba wembile, liboko lya Yehoba lyethzile hali Elisha. ¹⁶ Wendekele ngwendi, "Yehoba nendeke ngechi, 'Panga ei mingulunga ya ndonga wakama ishule na tubindonga.' ¹⁷ Mwafwa Yehoba nendeka ngechi, 'Kumukamono lihunthzi, nameme mukamone nyonthzi, oloni ou mungulunga wa ndonga ushulithiwa na mema, cho munwa, yeni na bimuna beni hamo natuthitu tweni twoshe.' ¹⁸ Echi chinapu chuma chachathi mu mesho a Yehoba. Amyana lalo kuhyana hali ba Moabu. ¹⁹ Mukalukuka binganda byoshe byathzili bebi byoshe byabibwa, kupakula miti yoshe yaibwa, kwimika tubwelebwelu twoshe twamema, nakunyoketha mamanya ha libu lyoshe lyalibwa." ²⁰ Cho kumutonda kuyehi nathimbu yakulambula milambu, kwethzile mema kutundila kuthambwela ya Endomu; lifuti lyashulithiliwe na mema. ²¹ Cho omu ba Moabu boshe bathzibile ngwabo baje bimyene bethzile nakulwa nabo, balikungulwile babenya hamo, boshe baje bathele kuthzala buthzalo bwa nthzita, cho bemanene kuje ku nginga. ²² Bendukile mutondotondo cho lithathelya byakumine ha mema. Omu ba Moabu bamewne mema analitalathana nabo, asholokele kubenga ngwe maninga. ²³ Batambekele, "Awamaninga! Bimyene banabanyongetha bene, cho banalithsiyi umo na mukwabo! Choni, Moabu, echeleni tuye tukabapukule!" ²⁴ Omu bethzile ku chilombo chaba Isalela, Isalela yakatulike nakulukuka ba Moabu, batewele kuli bakebo. Baka nthzita ba Isalela batwalele ba Moabu kuthambwela lya lifuti, na kubathziyanga. ²⁵ Banyongethele binganda, cho ha libu lya libwa lyoshe munu woshe wombilileko limanya kweta nomu balifwikile lyoshe, Bemikile kabwelubwelu koshe ka mema nakupakula miti yoshe yaibwa. Bathethzeleko lika Kile Haliseth ikukala namamanya acho mu mwela. Oloni mashwalale bakwatele malekeni bamuthzengulukile nakuilukuka. ²⁶ Omu mwene Mesha wa Moaba amwene ngwendi banonowa ije nthzita, wambatele banalume bamikwale bita bitanu na nabibali baye kuli mwene wa Endomu, oloni bonowele. ²⁷ Cho wambatele munendi wamukulunu, ou wapandele kuyula hanima yendi, nakumulambula kupwa mulambu wakwenyeka helu lya mbango. Cho kwakele kulubala chakama hali ba Isalela, cho na mashwalale ba Isalela bathethzele Mesha nakwiluka ku lifuti lyabo.