¹ Chosholokele omu mwene Hezekiya wathzibile muthzimbu wabo, watabwile buthzalo bwendi, cho walifwikile buthzalo bwa mashaka, na kuya munjubo ya Yehoba. ² Watumine Eliyakimu, ou wakengele ha njubo yoshe, na Shebina muka kuthona, na bakulunu ba tupilishitu, boshe balifwikile buthzzalo bwa mashaka, kuya kuli Isaya munu Amozi, iye kapolofita. ³ Bamulekele ngwabo, "Hezekiya ngwendi, 'Litangwa eli linapu lya libi, lyakuilika kutabela na shwamwa, mwatwa banike banaija mu thimbu ya kuthemuka, oloni kukwethi kuli bakebo ya kuthemuka. ⁴ Pamo chinatha kupwa ngwe Yehova Njambi yobe athziba majwi oshe a mukulunu waba ntwama, ou uje mwene wa Asilya shukulu yendi natumu kushaula Njambi wa mwanyo, cho akumbulwutha majwi awa Yehoba Njambi yobe nathzibi. Cho jundula helu kulomba chobe hamulonga wa mbathzubwila ei ichiliko.'" ⁵ Cho bingamba ba mwene Hezekiya bethzile kuli Isaya, ⁶ cho Isaya wendekele kuli bakebo ngwendi, "Lekeni Shukulu yenyi ngweni: 'Yehoba ngwendi, "Kethi uthzibe lyobe ha majwi awa unathzibi, akwechi baje bingamba ba mwene wa Asilya bananjituku. ⁷ Kenga, njaka limunthzinthzime muli ikeye, cho akathziba umo muthzimbu cho akeluka ka lifuti lyendi babenya. Njikamunenetha kuwa kwitila kuthsila mulifuti lyendi ibenya.""' ⁸ Cho uje mukulunu wabantwama welukile wawanene mwene wa Asilya anakulwitha Libina, mwatwa wathzibile ngwabo watundilemo mu lachishi. ⁹ Cho Senachelibu wathzibile ngwabo Tilehaka mwene wa kyushi na Ingitu walibwahethelele kulwa nendi, cho watumine tunganda lalo kuli Hezekiya na muthzimbu ngwendi: ¹⁰ "Endeka kuli Hezekiya mwene wa Yunda ngwobe, 'Kethi mwechele Njambi yeni ou mwakulahela amikwithe, ngwendi, " Yelusalema kubayana mumaboko a mwene wa Asilya." ¹¹ Kengoni, unathzibi obya nalingi ku mafuti mwene wa Asilya mu kuwanyongetha osshe. Cho natha kukulobola? ¹² Nkuma tulunga twa mafuti tunabobolandi, mafuti awa batate banyongetheke Ngozani Halau, Lezefi, na banu ba Endeni mu Tele Asale? ¹³ Mwene wa Hamati ali kuli, mwene wa Alepandi, mwene wa binganda bya Sefalevaimu, wa Hena, na Iva?'" ¹⁴ Cho Hezekiya watambwile ou mukanda kutunda kuli tunganda naku utanda. Cho wakandukile ku njubo ya Yehoba naku ujala kumeso endi. ¹⁵ Cho Hezekiya walombele kuli Yehoba nakwendeka ngwendi, "Yehoba wa mayongomena, Njambi wa Isalela, yobe walumbama hakamwa ya makelube, yobe lika Njambi ha bumwene bwoshe bwa hathi. Watangele melu na kaye. ¹⁶ Tengeleka litwi lyobe, Yehoba, nakutolilila. Shokolola mesho obe, Yehoba, na kumona, na kuthziba majwi a Senachelibu, awa natuma mukuthinametha Njambi wamwonyo. ¹⁷ Buthunga bene, Yehoba, bimyene ba Asilya bananyongetha mafuti na binunda byao. ¹⁸ Banaka tulunga twabo mu tuhya, mwafwa kubapwile tulunga oloni bipangi bya maboko a banu, biti na mamanya lika. Cho baka Asilkya banabonyongetha. ¹⁹ Cho ngachije, Yehoba Njambi yetu, tukathe, njinakulombo, kutunda ku nthzili yendi, mangana bumwene bwoshe bwa hathi bathzibuke ngwabo yobe, Yehoba, wapwa Njambi likalyobe." ²⁰ Cho Isaya mwana Amozi watumine muthzimbu kuli Hezekiya, ngwendi, "Yehoba, ou Njambi wa Isalela nendeka ngwendi, 'Hamulonga wakulomba kuli yange kwetheketha na Senachilibu mwene wa Asikya, njinamithzibi. ²¹ Eli likelyo lijwi lyanendeka Yehoba hali Ikeye: "Muna mumbanda muthzike wamu Ziyoni nakushaula na kukujola mangana akuthisope. Muna mumbanda wamu Yelusalema akanuikumuna mutwe wendi hali yobe. ²² Ou iunalimbulwitha na kutuka? kuli iya unajundwila lijwi lyobe na kukenga mesho obe mu kulithziba? Kuli ou wakuthzila wamu Isalela! ²³ Kwitila muli tunganda bobe unalumbulwitha Shukulu cho unendeka ngwobe, 'Nakutuma cha makalu ange njinakanduka kweta helu lya minkinda, kweta helu lya kujundula Lembanone. Kuje njikawitha biti bya Sinda byabilaja na biti bya Sipulasi byabiba. Njikakobela mu byela byabilako, mubishwata bya bushuka mwene. ²⁴ Njinendi mathima nakunwa mema akulyandununa. Njomithile bindonga bya Ingitu mwithi ya bimbandu bya myanja yange? ²⁵ Nkuma kuwathzibile omu njabitumbwilile laja chimweja, nakubipangela chimweja muthimbu ya laja? Choni njinakubinena nakwita. Unaija nakupwitha binganda byakama kupwa milumba yakushamitha. ²⁶ Boshe batumbamamo, bakutakama chachindondo, banabolwetha na kubathzibitha shwamwa. Banapu ngwe mbuto yamushwata, ngwe mwila waubwa, mwila wahachimbimbi nalube wamushwata, bakenyeka thimbu kanda ukole. ²⁷ Oloni njinathzibuka kutumbama chobe hathi, kutuhuka chobe, kukobela chobe, naku njimanena chobe na nole. ²⁸ Hamulonga wa kunjimanena nu nole, cho hamulonga wa kweta cha bimata byobe mu matwi ange, njaka likambwila lyange mu mujulu obe, nechi chakukulengulwitha mukanwa kobe; njikakutengulua kuluka mungila wethzilililemo." ²⁹ Echi chikapa chakumwenako yobe: Uno mwaka ulya echi chikamene mu shwata, cho mu mwaka wabubali echi chikamene kutunda muje. Oloni mu mwaka wabutatu wapande kukuna na kuteja, kukuna mahya nakulya bushuka bwayo. ³⁰ Bakulitulaho bamunjubo ya Yunda baje bakoboka bakapwa na mithzi lalo nakwima bushuka. ³¹ Mwafwa mu Yelusalema mukatuhuka baje ba kulitulaho, ku munkinda wa Ziyoni kukatunda boboke. Kuthsila cha Yehoba wamayongomena chikapanga ngechi. ³² Ngachije Yehoba nendeka ngechi hali mwene wa Asilya: Kakaja nakukobela mungande ei nameme kwasha mukili kuno. Nambe kwija kuyehi na ntelo nameme kutunga likanjo lyakuithzenguluka na nole. ³³ Ngila oyo ethzilililemo ikapwa imolika yakwilamo; kakakobela mungandei - echi chikecho kuhwitha cha Yehoba." ³⁴ Mwafwa njikalwila ei nganda nakuiyobola, hamulonga wange ibenya na ngamba yange Ndabiti.'" ³⁵ Chasholokele buje buthsiki omu kangelo ka Yehoba watuhukile nakukya nakulukuka chije chilombo chabaka Asilya, Kuthsiya mashwalale bakweta 185,000. Omu banu bendukile mutondo, bawanene mibila yabaka kuthsa inakotha mwoshe mwoshe. ³⁶ Cho mwene wa Asilya Senachelibu watundile ku Isalela nakuya kwimbo nakuka tumbama ku Ninibe. ³⁷ Halutwe, hathimbu akele nakulemetha njambi, yendi Nisiloko munjubo, bana bendi ba Andalameleki na Shaleza bamuthsiyile na mukwale. Cho batewelele mu lifuti lya Alalata. Cho munendi Esalehandoni wamwingile kupwa mwene.