¹ Chni mu mwaka wabutatu wa Hosheya muna Ela, mwene wa Isalela,Hezekiya muna Ahazi, mwene wa Yunda washangukile kuyula. ² Wakele na myaka makumi abali naitanu mu washangumukile kuyula; cho wayulile mu Yelusalema myaka makumi abali naitanu naiwana. Lithzina la baina lyapwile Ambinja; wakele muna Zakaliya wamunakathzi. ³ Wapangele byakuthungama mu mesho a Yehoba, kukabangeya bimwetho byoshe bije Ndabiti, mukulu wendi, walingile. ⁴ Watundithileko ije myela ya helu, kubujola binguthzi byamamnya, nkutetenga tuje tumponya twa Ashela. Wabujwile uje linyoka watangile Mosesa wabunengu mu bipuka, mwafwa muli aye matangwa banu ba Isalela bakele na kwenyekelako isense; baithanene ngwabo,"Nehushitani." ⁵ Hezekiya wakulahelele muli Yehoba. Uje Njambi wa Isalela, mangana ngwendi hanima yendi kethi kukapwe umo ngwe ikeye hakati ka bimyene ba Yunda, nameme hakati ka bimyene baje bakeleko thimbu kanda ikeye. ⁶ Hamulonga wakukwatelela kuli Yehoba. Kechele kumukabangeya oloni wanyungile mashiko endi; awa Yehoba wakambeyeye Mosesa. ⁷ Cho Yehoba wakele na Hezekiya, cho kwoshe oku waile walumbunukile. Watengulukile mwene wa Asilya cho kumupangelelele. ⁸ Walwithile ba Filisite kweta ku Ngaza na binginga bya kuyehi; kutunda ku kaposhi wabaka kunyunga kweta kubipatanga bya nganda. ⁹ Mu mwaka wamuchiwana wa Hezekiya ou wapwile mwaka wamuchitanu naibali ya Hosheya muna Ela mwene wa Isalela, Shalemaneza mwene wa Asilya wethzile nakwimanena Samaliya nakwithzenguluka. ¹⁰ Hakuhwa cha myaka itatu baitambwile, mu mwaka wamu chitatu naumo wa Hezekiya, ou wapwile mwaka wamuchitanu naiwana ya Hosheya mwene wa Isalela; mungilei Samaliya baitambwile. ¹¹ Cho ije mwene wa Asilya wambatele Isalela kuya ku Asilya nakubaka mu Hala, nakuchabu cha ndonga mu Ngozani, namu binganda byaba Mendesi. ¹² Walingile ngechi mwafwa kabatabelele lijwi lya Yehoba Njambi yabo, oloni baluwithile bishimbi bya chithzibathano, byoshe bije ngamba wa Yehoba Mosesa wabakambeyeye. Babyanene kubithzibilila nambe kubilinga. ¹³ Choni mu mwaka wamu likumi naiwana ya mwene Hezekiya, Senachelibu mwene wa Asilya walukukile binganda byoshe byomubipatanga bya Yunda na kubitambula. ¹⁴ Cho Hezekiya mwene wa Yunda watumine majwi kuli mwene wa Asilya ou wakele ku Lachishi, ngwendi, "Njakubahumuna. Lilwithemo kutunda kuli yange. Byoshe obyo waka hali yange njibyambata." Uje mwene wa Asilya washakele Hezekiya mwene wa Yunda afwete bita bitatu bya matalenda a siliva na makumi atatu amatalenda a ngolinde. ¹⁵ Cho Hezekiya wamwanene siliva yoshe ije baanene munjubo ya Yehoba na mubishete bya nganda ya mwene. ¹⁶ Cho Hezekiya wabatileko ngolinde kutunda ku bikolo bya tembele ya Yehoba na kutunda kubingunthzi bije watundithileho; wanene ije ngolinde kuli mwene wa Asilya. ¹⁷ Oloni mwene wa Asilya wa kungulwile mbunga yakama ya baka nthzita bendi, kutuma Taletani na Labusali na mukulunu waba ntwama kutunda ku Lachishi kuli mwene Hezekiya ku Yelusalema. Bendele mu mikulakula nakweta hanja lya Yelusalema. Bashiwenene ku mbengula ya chishali chakununda, ha mukwakwa makama wa lihya lya muka kuthekathana kukusha, nakwimana kuyehi na wo ¹⁸ Omu bathanenene kuli mwene Hezekiya, Eliyakima muna Hikiya, ou anyungile njubo yoshe, na Shembuna uje mukakuthona, na Yoa muna Asafi, mukathzibilila bibendeka, batuhukile kuya na kuli wana nendi. ¹⁹ Cho uje mukulunu waba ntwama wabalekele bakaleke Hezekiya obyo mwene wakama, mwene wa Asilya kwihula ngwabo, " Kutakama cheni munakuchiwana kuli? ²⁰ Ukendeka lika majwi a ngochongoche, kwendeka ngwabo kulinunga na mwana a kula nthzita. Wakulahela muli iye, nambe unjitengulukile yange? ²¹ Kengoni wakulahela mumbweti yakwendela ou lihongo lyakuhiwile chimweja lyamu Ingitu, oloni oshe munu athundamanaho, cho likakatela mu liboko lyendi na kumutiba. Omu mukemo mwali Falo mwene wa Ingitu kuli moshe owo amukulahela. ²² Oloni oshe wendeka kuli yange ngwobe, 'Tunakulahela muli Yehoba Njambi yetu,' nkuma kethi ikeye ibenya myela ya helu na mutula wanatundutha Hezekiya, nakwendaka kuli Yunda na Yelusalema ngwendi, 'Mwapande kalemethela ku mutula ou mu Yelusalema nali' ? ²³ Cho ngaeluje mi, njishaka kukwana bwana bwabubwa bwa kutunda kuli shukulu mwene wa Asilya. Njikwana tubali makulakathi abali, oshe ngwe unatha kuwana banalume bakubendetha. ²⁴ Watha bayi kabyana ntwama nambe umo wakukewelamo mu bingamba ba shakulu? unakulahela mu makalu na banu bamu Ingitu! ²⁵ Nkuma njinaija kuno na kulwa na mwela uno naku unyongetha chakulilika Yehoba ndi? Yehoba wendekele kuli yange ngwendi, lwitha eli lifuti nakulinyongetha.'" ²⁶ Cho Eliyakimu muna Hikiya, na Shebuna, na Yoa balekele uje mukulunu waba ntwama ngwabo, "Twalombo endeka kuli bingamba bobe mulithini lyachi Alame, mwafwa tukathzibiko. Kethi wendeke netu mu lilimi lyaba Yunda mu matwi a banu aba bali ha mbango." ²⁷ Oloni uje mukulunu waba ntwama wendekele kuli bakebo ngwendi, "Nkuma shukulu nanjitumine yange kuli shukulu yeni hao neni nakwendeka awa majwi? Nkuma kanjitumine kubanu aba batumama ha mbango, aba bapande kulya bibi byabo na kunwa mashu abo ba benya hamo neni nali? " ²⁸ Cho uje mukulunu wa bantwama wemanene aku tambeka mulilimi lyachi Yunda lyahelu, ngwendi, " Tolilileni ku lijwi lya mwene wakama, mwene wa Asilya. ²⁹ Mwene nendeka ngwendi, 'Kethi mwechele Hezekiya amikwathe embwe, mwafwa ikeye watha kumyobola ku nthzile yange. ³⁰ Kethi mwechele Hezekiya amilingithe yenikukulahela muli Yehoba, ngwendi, " Chili bene Yehoba atwobola, cho naino nganda kubayana mu liboko lya mwene wa Asilya.'" ³¹ Kethi muthzibilile Hezekiya embwe, mwafwa kukemo mwanendeka mwene wa Asilya: 'Ijeni kuli yange mangana mwene kwoloka. Cho munu woshe muli yeni ukala ku mubinyu wendi naku mukuyu wendi ibenya, na kunwa ku mema mu lithima lyendi ibenya. ³² Mukalinga ngechi kweta nomu njikamitwala ku lifuti lyakupwa ngwe lyeni lifuti lya binona na binyu byabiha, lifuti lya akende na mahya, lifuti lya miti yami olibe na buki, mangana mukayoye nakwilika kuthsa. ' Kethi muthzibilile Hezekiya omu etheka kumitengulula, ngwendi; Yehoba amyobola. ' ³³ Kuliko kalunga wa banu ou wabobwelehe kutunda muliboko lya mwene wa Asilya? ³⁴ Tulunga twa Hamati na Alipandi bali kuli? Tulunga twa Sefalevaimu, Hena, na Iva bali kuli? Nkuma bathele kwobola Samaliya kutunda muliboko lyange ndi? ³⁵ Hakati ka tulunga boshe bamu lifuti kuliho kalunga umo ou nobolaho lifuti lyendi kutunda ku nthzili yange? Cho Yehoba obola bati Yelusalema kutunda ku bukama bange?" ³⁶ Oloni banu bolokele kulu kubamu kumbulwile, mwafwa mwene wa bakambeyeye ngwendi, " Kethi mumukumbulule." ³⁷ Cho Eliyakimu muna Hiukiya, ou wakengele ha njubo yoshe; Shebuna uje mukakuthona; na Yoa muna Asafi mukakunyunga, bethzile kuli Hezekiya nabuthzalo bwobo bwa kutabula, nakwambulula majwi a uje mukulunu waba ntwama kuli ikeye.