¹ Mumwaka wabu likumi naibali ya Ahazi mwene wa Yunda, mukemo mwashangumukile Hosheeya muna Ela kuyula. Wayulile ba Isalela myaka itatu naiwana mu Samaliya. ² Wapangele chuma echi chakele chachibi mu mesho a Yehoba, olojo kethi ngwe hamo na bimyene ba Isalela aba bakeleko thimbu kanda ikeye. ³ Cho Shalananeza mwene wa Asilya wamulwithile cho Hoshiya wethzile nakupwa ngamba yendi ou wanenele mulambu kuli ikiye. ⁴ Cho iye mweene wa Asilya wathzibukile ngwe Hoshiya wakele nabungungu hali ikeye, mwatwa Hoshiya atumine tunganda kuli So mwene wa Ingitu; lalo, kanene mulambu kuli mweene wa Asilya, ngwe mu akele nakulinga hamwaka hamwaka. So mwene wa Asilya wamwolwetheke nakumukuta mubunhthzinda. ⁵ Cho uje mwene wa Asilya walwithile na kuthzengulwitha lifuti lyooshe, na kulukuka Samaliya nakwithzenguluka ha myaka itatu. ⁶ Mumwaka wabuhtanu naiwana ya Hoshiya uje mwene wa Asilya watambwile Samaliya nakwambata Isalela kuya nayo mu Asilya. Wabakele mu Hala, kundonga wa Hamba wamu Ngozani, na mu binganda bya Mendesi. ⁷ Obu bubdungo bwasholokele mwafwa banu ba Isalela babulamwine kuli Yehoba Njambi yabo, ou wabanenele kutunda mu lifuti lya Ingitu, kutunda mu liboko lya Falo mwene wa Ingitu. Baje banu bakele nakalemetha tulunga tweka ⁸ na kwendala mu bilinga bya mafuti awa Yeheba watundithile ku mesho a banu ba Isalele na mubilinga bya bimyene ba Isalela bije bapangile. ⁹ Bije banu ba Isalela bapangele muku banda- kuli Yehoba Njambi yabo - byuma bije kubyabwahele. Balitungilile babenya myela ya helu mu binganda byabo byoshe, kutunda ku tuposhi kweta kubipango. ¹⁰ Batungile lalo bingunthzi bya mamanya na tumponya twa Ashela ha mulundu na mwithi ya miti. ¹¹ Benyekele isense ha byela bya helu, ngwe omu mafuti alingile, aje wambatele Yehoba thimbu kanda bakebo. Ba Isalela bapangele byuma bya bubi byakushangumuna Yehova alubale; ¹² balemethele tumponya, chikwechi aba Yehoba wendekele kuli bakebo ngwendi, "Kumukalinga ebi byuma." ¹³ Oho Yehova walumbunwine kuli Isalela na Yunda kwitila muli kapolofita wohe na muka kumona woshe, ngwendi, "Tenguluka ku bingila bya bubi na kunyunga kukambeya na mashiko ange, nakunyanyama mu kunyunga lishiko lyoshe lije njakambeyeye ba isho, na aje njatumine kuli yobe kwitila muli bingamba bange tupolofita." ¹⁴ Oloni kubathzibililile;olojo bakolethee bithungo byabo ngwe baishabo aba kubakulahelele Yehoba Njambi yabo. ¹⁵ Babyanene mashiko endi na chuthzibathano chije walingile hamo na bakulu babo, na mashiko achithzibathano chije wanene kuli bakebo. Bakabangeyeye bilinga bya ngocho cho bakebo babenya bapwile bangocho. Bakabangeyeye mafuti akwilika kuthzibuka Njambbi awa abathzengulukile, aje babakambeyeye kuli Yehoba kwilika kubatemunwina. ¹⁶ Balivile mashiko oshe a Yehoba Njambi yabo. Batungile byuma bya bikubo bya bana babingombe babali balemethe. Ba tungile kamponya Ashela, cho balemethele bingongonothi byoshe bya mwilu na Mbale. ¹⁷ Balingithile bana babo babanalume naba babanakathzi kwita mu tuhya, bapangethele bingombo na bumbanda, balilandethele babenya kulinga bije byakele bya bubi mu mesho a Yehoba, nakumushangumuka a lubale. ¹⁸ Ngachije Yehoba walubalele manene na Isalela cho wabatunduthile mu mesho endi. Kukwakele umo wathaleleho oloni kubanga lilimi lyaba Yunda likalyalyo. ¹⁹ Nambe Yunda kanyungile mashiko a Yehoba Njambi yabo, cho bakabangeyeye bilinga bije alingile Isalela. ²⁰ Cho Yehoba wabyanene chithemunwina choshe cha Isalele; wabayandethele na kubana muliboko lya baje babambata ngwe benabihya, kweta nomu abatunduthile ku mesho endi. ²¹ Watabwile Isalela kutunda ku naanga yakuthzila ya Ndabiti, cho bapwithile Yelomboamu muna Nembati kupwa mwene. Yelomboamu watundithile Isalela ku kabangeya Yehoba nakubanenentha kubulumuna bubi bwakama. ²² Banu ba Isalela bakabangeyeye bubi bwoshe bwa Njelomboamu cho kubatundileko kuli bakebo, ²³ cho Yehoba watundithile Isalela ku mesho endi ngwe muje wendekele kwitila mu bingamba bendi tupolofita ngwendi akalinga. Cho Isalela bayambatele kutunda mu lifuti lyabo kuya ku Asilya, cho chilibene ngechi nakalelo. ²⁴ Uje mwene wamu Asilya wanenele banu kutunda ku Mbambiloni naku kutha nakutunda ku Aja, nakutunda ku Hamathi na Sefalivamu, na kubaka mu binganda bya Samaliya kwinga mu banu ba Isalela. Batambwile Samaliya nakuyoyela mu binganda byacho. ²⁵ Chasholokele kukushangumuka kwa kukala chabo muje omu kubathingimikile Yehoba. Cho Yehoba watumine bindumba aba bathsiyileko bamo mukati kabo. ²⁶ Cho bendekele kuli mwene wa Asilya ngwabo, "Mafuti awa wambatele na kuwaka mu bunganda bya Samaliya kubathzibuka bilinga bishakewa kuli njambi wa lifuti eli. Cho natumu bindumba mukati kabo, cho kenga, bindumba banakathziya banu mwafwa kubathzibuka bilinga bishakewa kuli njambi walifuti eli." ²⁷ Cho uje mwene wa Asilya wakambeyeye, ngwendi, "Twaleniko kapilisitu umo ou mwanenele kutunda kuje, nakumwechela aye nakuyoyela kuje, cho mwecheledi abalongethe bilinga bishakewa kuli njambi a lifuti eli." ²⁸ Cho umo wabaje tupilisitu ou bambatele kutunda mu Samaliya wethzile na kuyoyela mu Mbetele; wabalongethele mu bapande kuthingimikila Yehoba. ²⁹ Cho chikota ha chikota bapangele tu njambi twabo babenya, nakutwaka ha byela byahelu bije bapangeli baka Samaliya- chikota ha chikota mu bunganda muje bayoyelele. ³⁰ Baje banu bamu Mbambiloni bapangele Sukoti Benoti; banu bamu Kutaa bapangele Nelengo; banu bamu Hamati bapangele Ashima, ³¹ banu bamu Avite bapangele Nimbazi na Talataki. Ba Sefaevite benyekele bana babo mutuhya kuli Andlameleki na Anameleki, tu njambi twaba Sefalevite. ³² Bathingimikile lalo Yehoba, na kushakula kutunda mukati kabo tupilisitu ba byela bya helu, ou wabemaneneko mu tembele haje ha byela bya helu. ³³ Bathingimikile Yehoba cho lalo balemethele tu njambi twabo babenya, mu chithemwa cha mafuti oku babatundithile. ³⁴ Nakulelo batwalelelaho mubithemwa bya bo bya laja. Kubathingimikile Yehoba, nameme kukabangeya bilongetha, bithzila mashiko, nambe chikambeyo chije Yehoba wanene kuchithemunwina cha Yakobo, ou walukile kupwa Isalela. ³⁵ Omu Yehoba watungile chithzibathano nabo, waba kambeyeye ngwendi, "Kumukathzibi lybe ba njambi bakwabo, nameme yeni kubathzikamena, nameme kubalemetha, nameme kulambula kuli bakebo. ³⁶ Oloni Yehoba, ou waminenele kutunda kulifutu lya Ingitu na nthzili ya kuma na liboko lya kwolola, kuli ikeye kukeko mukathsikama hathi, cho kuli ikeye kukeko mu kalambula milambu. ³⁷ Bilongetha na bithzila, mashiko na kukambeya bije amuthonekelele, mukanyunga haya myaka. Cho kumwapandele kutewa tu njambi tukwabo embwe, ³⁸ na chithzibathano echi njinapanga na yeni , kumwakebala; nameme mukathingimike tu njambi tweka. ³⁹ Oloni Yehob Njambi yeni ikeye mu kathingimika. Akamyobola ku nthzili ya baka nole beni." ⁴⁰ Kubathzibililile, mwafwa batwalelelekeho kulinga bije balingile kunima. ⁴¹ Cho awa mafuti athzibile Yehoba lyoba cho lalo balemethele tumponya twabo twakushonga, na bana babo balingile chimo lika - ngwe omu balingile bana ba bana babo. Batwaleleleho kupanga bije bapangele bakulu babo, naku lelo.