¹ Pano pa juuba ja makumi abiji ne ana ja n'oondo umootu baantu beena Isalela be bapwiizhe kabiji bazhikiilwenga na nzala, kabiji bavwajilenga bivwaalo bya masaaka, ne kubiika lukuungu mu mitwe yaabo. ² Ba mu kisemi kya Isalela bepatwiileko abo beene ku boonse beenyi. Baimene ne kusolola maambo abo beene ne bundenga maambo bwa bashaakulu baabo. ³ Baimene mu ma puunzha abo, ne kimye kya buna pa juuba ba taangile kufuma mu buuku wa mizhilo ya Yehoba Lesa wabo. Pakuuba kimye kya buna kikwaabo pa juuba besolweelenga ne kwiinamina paanshi ku meeso a Yehoba Lesa waabo. ⁴ Beena Levi, Yeshua, Bani, Kademyela, Shebaniya, Buni, Shelebiya, Bani, ne Kenani, baimene pa kukaanjijila paabo ne kubijika na jiiwi jikataampe kwi Yehoba Lesa waabo. ⁵ Poonkapo beena Levi, Yeshua, ne Kademyela, Bani, Hashabeneya, Shelebiya, Hodiya, Shebaniya, ne Petahiya ba ambile amba, "Imanai mutuumbijike Yehoba Lesa weenu myaaka ne myaaka." Bakoonshe kutuumbijika jizhina jeenu ja lukumo, kabiji jikoonshe kutuumbalala kukila kutuumbalala koonse ne kutuumijika koonse. ⁶ Anweeba mwi Yehoba. Anweeba buunke bweenu. Mwaleenga jiulu, ne meulu aji paleepesha, ne bijimo byoonse, ne ntaanda ne byoonse bijiipo, kabiji ne tuluunga ne byoonse bijimo. Anweeba mupaana buumi ku byoonse, kabiji ne byoonse biji mwiulu bipoopwela anweeba. ⁷ Mwi Yehoba, Lesa wasajile Abalama, ne kumufumya mu Ula mu beena Kaledea, ne ku mupa jizhina ja Abalahama. ⁸ Mwataine muchima waanji wajiinga wa kishiinka ku meeso enu, kabiji mwalengele naanji lulayaan'ano lwa kupaana ku kisemi kyaanji ntaanda yabeena Kenana, yabeena Hiti, yabeena Amoni, yebeena Pelisha, yabeena Yebusiti, ne yabeena Gilegashiti. Mwalama mulaye weenu maambo anweeba mwaoloka. ⁹ Mwamweene lumanamo lwa bashaakulu beetu mu Ijipita kabiji mwauvwiine kujila kwaabo ku bwiipi na kaluunga ka Ledisa. ¹⁰ Mwapaine biyuukilo ne bya kukumya kwi Felo, ne ku ba miingilo baanji boonse kabiji ne ku baantu boonse ba mu ntaanda yaanji, pakuuba anweeba mwayuukile amba beena Ijipita baubilenga na bulubi bwaabo kwi anweeba. Mino mwilengejile jizhina anweeba beene ajo jaimana ne ku jaleelo. ¹¹ Keepo mwibabenye kaluunga ka meema, byonkabyo amba bapichile pakachi ka kaluunga pa mushiji wauma; kabiji mwataile aba be baloondaizhenga mwazhika, noobe jiibwe mu meema azhika. ¹² Anweeba mwi bataangijile na jishiki ja jikuumbi mute, kabiji na jishiki ja mujilo bufuku mu kwi bamunyikila mujishiinda pa lweendo lwaabo. ¹³ Pa mutuumba wa Sinai po po mwaikijile ne kabiji mwa ambile naabo kufuma mwiulu ne kwiibapa mafuunde a oloka ne mizhilo ya kiine, ne malamuna a waama ne mikaambizho. ¹⁴ Mwaleengele Sabaado kuyuukanyi kwi abo, kabiji mwi bapeele mikaambizho ne malamuna ne mizhilo kupichila mwi Mosesa kalume weenu. ¹⁵ Mwi bapeele shiinkwa kufuma mwiulu byo baumvwiine nzala, ne meema kufuma ku jiibwe byo baumvwiine kilaka, kabiji mwa ambile kwi abo kuuya na kutaambula ntaanda yo mwachipile na luchipo kwiibapa. ¹⁶ Mino abo ne bashaakulu beetu baubile bwiitote, kabiji bakoseeshe mashiingo abo kabiji keechi baumvwiine ku mikaambizho yeenu ne. ¹⁷ Bakaine kuumvwa, kabiji keechi balaangulukilepo pa bya kukumya byo mwaubile mukachi kaabo ne, mino bakoseeshe mashiingo abo, kabiji ne mu lupata lwaabo batoongwele ntaangi wa kwibabweezha ku buzha bwaabo. Mino anweeba mwi Lesa wayuulwa na kuleekela maambo, wabuupe ne lusa, ubaanda kuzhiingila, kabiji waikala mu butemwe bwa kiine. Anweeba keechi mwiibalekele ne. ¹⁸ Naangwa baleengele mwaana n'oombe ku kyeela kya kusuungula ne kwaamba amba, 'Awe ye Lesa weenu wimufumishe mu Ijipita,' ne kweendeleka ku kataampe, ¹⁹ anweeba, mu lusa lweenu, keechi mwiibashile muungyetu ne. Jishiki ja jikuumbi ja kwi bataangijila mujishiinda keechi jibashiile mute, naangwa jishiki ja mujilo ja kwi bamunyikila mu jishiinda ne. ²⁰ Mupashi weenu wa waama mwi bapeele mu kwi bakaambizha, kabiji ne maana keechi mwalekele kwi bapa mu tunwa twaabo ne, ne meema mwibapeele byo baumvwine kilaka. ²¹ Pa myaaka makumi ana mwi bamwenejilenga muungye, kabiji keechi bakajiilwe kiintu ne. Bivwaalo byaabo keechi byatabukile ne kabiji ne maulu abo keechi a viimbile ne. ²² Mwiibapele bufumu ne baantu, ne kwibatoongwela makoonka onse a ntaanda. Keepo bataambwile bunoonshi bwa ntaanda ya Sihona mfumu wa Heshebona ne ntaanda ya Oga mfumu wa Bashana. ²³ Mwavuzhizhe baana baabo noobe tubaanga baanga twa mwiulu, kabiji mwi baletele mu ntaanda yo mwa buujile bashaakulu baabo kuuya moonka ne kwaangata. ²⁴ Byonkabyo baantu batweelele moonka ne kwi itaambula ntaanda yo mwi bashiijile abo ya buswaanyi bwa ntaanda, beena Kenana. Mwi bapaine mu mabooko abo, amba Isalela e boobe byo a saka. ²⁵ Bataambwile mizhi yakosele ne ntaanda ya bukomo, kabiji ba angachile ne mazuubo a yuujile na biintu byoonse bya waama, mishima yo ba pokweela jimo, majimi a min'aanza n'aanza ne majimi a olivi, ne bichi bya bipaangwa mo byavujila. Byonkabyo ba jiile kabiji baikuchile ne kubaya ne kwiiyowa abo beene mu buwaame bweenu bukataampe. ²⁶ Keepo baikele ba kubula kukookela ne kwi mibuukila anweeba. Bataile mizhilo yeenu ku manyuuma abo. Baipaile ba ngauzhi beenu be bajimwiinenga kwaalulukila kwi anweeba, kabiji baubile myeendeleko ikataampe. ²⁷ Byonkabyo anweeba mwi bapaine mu mabooko a balwaanyi baabo, abo bebayaanjishe. Mu bimye bya kumanama kwaabo, bajiijile kwi anweeba, ne anweeba mwi boomvwine mwiulu, kabiji na maambo a lusa lweenu lukataampe mwibatumijile wa kwibapokolola ao wibapokolwele mu kubooko kwa balwaanyi baabo. ²⁸ Mino panyuuma ya kukookoloka, baleengele buubi ku meeso enu jikwaabo, kabiji ne anweeba mwi balekele mu kubooko kwa balwaanyi baabo, byonkabyo balwaanyi baabo bebataangijile. Pano byo babweelele ne kujijiila kwi anweeba, mwaumvwiine mwiulu, bimye byavula maambo a butemwe bweenu mwi bapokolwele. ²⁹ Mwibajimwine byonkabyo amba bakoonshe kwalulukila ku mizhilo yeenu. Mino baubile mu bwiitote ne kuteeleka ku mikaambizho yeenu ne. Baubile bu ndenga maambo ku malamuna enu apaana buumi ku uji yeense wi akookela. Ba paine bipuzhi bya bwiitote-byatwa ne kukosesha mashiingo abo kabiji bakaine kuumvwa. ³⁰ Pa myaaka yavula yo mwiibatekenya ne kwibajimuna na mupashi weenu kupichila mu ba ngauzhi beenu. Mino keechi baumvwiine ne. Byonkabyo mwibapaine mu kubooko kwa baantu ba mu ntaanda. ³¹ Mino mu lusa lweenu lukataampe keechi mwibonawine boonse ne naangwa kwiibasha ne, pakuuba anweeba mwi Lesa wa buupe ne lusa. ³² Pano na onka o maambo, Lesa weetu-anweeba mwakila, wa bulume, kabiji Lesa wa waama ulama milaye ne butemwe bwakosa-keechi muleke luno lukatazho kumweeka bucheeche kwi anweeba abwe bwaiya pe atweeba ne, pa mafumu etu, pa ba ntaangi beetu, ne pa ba n'aanga beetu, ne pa ba ngauzhi beetu, ne pa bashaakulu beetu, kabiji ne pa baantu beenu boonse kufuma ku mooba a mfumu wa Asilya kufiika ne leelo. ³³ Mwi byoonse byaiya pe atweeba, pakuuba mwi byuuba mu buukine, mino atweeba twaubila mu mwatama. ³⁴ Mafumu etu, ba ntaangi beetu, ne bashaakulu beetu keechi balama mizhilo yeenu, naangwa kuta michima ku mikaambizho yeenu ne naangwa mizhilo yeenu yo mwi bajimwineko ne. ³⁵ Naangwa mu ntaanda yaabo beene, byo bakiiyowa buwaame bweenu bukataampe, mu bikataampe ne mushiji wa waama ye mwi batuujila, keechi be mwiingijile anweeba ne naangwa kwaluluka kufuma ku byuubilo byaabo byatama ne. ³⁶ Pano atweeba twi bazha mu ntaanda yo mwapeele bashaakulu beetu mu kwiiyowa bipaangwa byaayo ne bya buupe byaayo byawaama, kabiji talai, atweeba twi bazha moonka! ³⁷ Kunowa kwa bya mu ntaanda yeetu byavula biya ku mfumu ye mwa biika kuluutwe yeetu na maambo a bundenga maambo bweetu. Bataangijila mibiji yeetu ne bileelwa byeetu moonka mo basakila. Tuji mu kupelelwa ku kataampe. ³⁸ Maambo a bino byoonse, twaleenga lulayaan'ano lwakosa mu bineembelo. Paji tuyuukilo o mazhina a ba ntaangi beetu, beena Levi, ne ba n'aanga.