¹ Mu n'oondo wa Nisana, mu mwaaka wa makumi abiji a mfumu Ataselusa, wa sajile binyu, nashikwiile binyu ne kupaana ku mfumu. Pano keechi najiingapo na bulaanda mu kyeenyi kyaanji ne. ² Mino mfumu wa ambile kwi amiiwa amba, "Kiluungi kyoobe kyaubilaka bulaanda? Keechi wamweeka kubeela ne. Akye kyafwainwa kwiikala bulaanda bwa ku muchima." Poonkapo naikeele na mooyo biingi. ³ Na ambile kwi mfumu amba, "Ba mfumu bakoonshe kwiikajikwa myaaka! Maambo ka kiluungi kyaami kyo kyafwainwa kubujila kwiikala na bulaanda? Muzhi, mpuunzha ya bileende bya ba taata, yaonaika, kabiji ne bibelo bya muzhi byaonaika na mujilo." ⁴ Keepo mfumu wa ambile kwi amiiwa amba, "Wasaka amba amiiwa ngube ka?" Byonkabyo naloombele kwi Lesa wa mwiulu. ⁵ Na mukuumbwile mfumu amba, "Inge kyamweeka buloongo ku ba mfumu, kabiji inge kalume weenu wauba buloongo ku meeso enu, mwakoonsha ku ntuma amiiwa ku Yuda, mu muzhi wa bileende bya ba taata, amba nkakoonshe ku mushimukulula." ⁶ Mfumu wa nkuumbwile amiiwa (ne muka mfuumu waikele kulubaji lwaanji amba), "Bimye biinga byo mukaya kabiji mukabweela kimye ka?" Mfumu wasekejile pa ku ntuma amiiwa byo na mupeele kimye kyatongolwa. ⁷ Keepo na ambile kwi mfumu amba, "Inge kimutookela ba mfumu, mpai ma kalata aba biloolo ba mu kibuunji kya bushiiya bwa mukola byonkabyo amba baka nswiishe amiiwa kupichila mu mipaka yaabo pa lweendo lwaami lwa ku Yuda. ⁸ Kabiji kwiikale ne nkalata ya kwa Asafa kalama wa jisaka ja mfumu, byonkabyo amba aka koonshe kuumpapo bichi bya kupaangila mshiki a kibelo a kipaanga kiji palutwe ya nzuubo ya Lesa, kabiji ne a nsakwa ya muzhi, ne bya nzuubo mo nkeekalanga." Byonkabyo maambo kubooko kwa waama kwa Lesa kwajiinga pe amiiwa, mfumu waswiile kumpa byo na loombele. ⁹ Nafikile ku ba biloolo mu kibuunji kya kubushiiya bwa mukola ne kwibapa makalata a mfumu. Pano mfumu wa ntumine na bakuluumpe ba bashilikale ne ba pa bambili. ¹⁰ Sanabalata mwiina Holona ne Tobiya mwiina Amonyi wa mwiingilo byo ba uvwiine kino, bauvwiine kutama biingi amba muuntu waiya wakebelenga kukwaasha baantu beena Isalela. ¹¹ Byonkabyo nafikile ne ku Yelusalema kabiji najiinga kookwa mooba asatu. ¹² Naimene bufuku, amiiwa ne ba balume bacheeche pamo. Keechi nabuujile naangwa umo Lesa waami byo a biikile mu muchima waami bya kuubila Yelusalema ne. Keechi najiingapo na nyaama mukwaabo, kufuma pa ye na endelengapo ne. ¹³ Nafuminemo bufuku kupichila ja kibelo kya ku kyaana, kuila ku njilai ya Yakala ne ku kibelo kya mbolezha, ne kumona nsakwa ya Yelusalema, ayo yo bakuundwiile, kabiji ne bibelo bya bichi byaonaikile na mujilo. ¹⁴ Keepo naile kukitulu kya kibelo ne ku kizhiba kya ba mfumu. Mpuunzha yakepele ya kupitamo naba nyaama. Keepo naile ku kinkuluulungwa ne kumona kibaamba na bweelele kabiji ne kutweela mukinkuluulunga kya kibelo, ne kubweela. ¹⁵ Byonkabyo naile boonkabwa bufuku ku kyaana ne kumona kibaamba, kabiji na bweelele ne kutweelela ku kibelo kya kukyaana, ne kubweela. ¹⁶ Ba ntaangi keechi bayuukile konaile naangwa byo naubile ne, kabiji keechi nakibujile ba Yudea ne, naangwa ba n'aanga, naangwa bineemanga, naangwa ba ntaangi, naangwa boonse waingijile mwiingilo. ¹⁷ Ne baambijile amba, "Mwamona lukatazho lotujimo, Yelusalema byo a onaika ne bibelo byaanji byaapya na mujilo. Iyai, lekai tushimukulule bibaamba bya Yelusalema, byonkabyo keechi tukeekala mu buumvu ne." ¹⁸ Nebabuujile amba kubooko kwa waama kwa Lesa waami kwajiinga pe amiiwa kabiji ne pa byaambo bya mfumu byo a ambile kwi amiiwa. Ba ambile amba, "Iyai twiimane ne kushimika." Byonkabyo bakoseshe mabooko abo na mwiingilo wa waama. ¹⁹ Mino Sanabalata mwiina Holona, ne Tobiya mwiina Amonyi wamwiingilo, ne Geshema mwiina Alabya byo be kyuumvwine, betweendelekele ne kwitusuula, kabiji ba ambile amba, "Mubeena kuuba ka? Mubeena kusatukila mfumu nyi?" ²⁰ Keepo ne bakuumbwile amba, "Lesa wa mwiulu uketupa byawaama. Atweeba twi bakalume baanji tusakwiimana ne kushimika. Mino keechi muji na lubaji ne naangwa luusa, kafwaako kya kwimuvulukilako mu Yelusalema ne."