¹ Abano bo bajiinga ba n'aanga ne beena Levi baishile na Zelubabela mwaana Shealitela kabiji ne na Yeshua: Selaya, ne Ezela, ² ne Amaliya, ne Maluka, ne Hatushi, ³ ne Shekaniya, ne Lehuma, kabiji ne Melemoti. ⁴ Bajiinga Ido, ne Ginetona, ne Abiya, ⁵ ne Miyamina, ne Moadiya, ne Biliga, ⁶ ne Shemaya, ne Yoyalibu, ⁷ Salu, Amoki, ne Hilikiya, kabiji ne Yedaya. Abano bajiinga ba ntaangi ba ba n'aanga ne bo bajiinga naabo mu mooba a Yeshua. ⁸ Beena Levi bajiinga Yeshua, Binui, Kadimela, Shelebiya, Yuda, ne Mataniya, awo wajiinga mukuluumpe mu nyiimbo ya lusaanchilo, pamo ne boajiinga naabo. ⁹ Bakibukiya ne Uni, ne bo bajiinga naabo, baimene mukimpelampela naabo kimye kya miingilo. ¹⁰ Yeshua wajiinga shaanji Yoakimu, Yoakimu wajiinga shaanji Eliashiba, Eliashiba wajiinga shaanji Yoada, ¹¹ Yoada wajiinga shaanji Yonafani, kabiji Yonafani wajiinga shaanji Yadua. ¹² Mu mooba a kwa Yoakimu abano bo bajiiinga ba n'aanga, ba ntaangi ba bisemi: Melaya wajiinga ntaangi wa kwa Selaya, Hananiya wajiinga ntaanda wakwa Yelemiya, ¹³ Meshulama wajiinga ntaangi wakwa Ezela, Yehohanana wajiinga ntaangi wakwa Amaliya, ¹⁴ Yonafani wajiinga ntaangi wakwa Maluka, ne Yesefwa wajiinga ntaangi wakwa Shebaniya. ¹⁵ Adina wajiinga ntaangi wakwa Halimu, Helikai wajiinga ntaangi wakwa Melemoti, ¹⁶ Zekaliya wajiinga ntaanga wakwa Ido, Meshulama wajiinga ntaangi wakwa Ginetona, kabiji ¹⁷ Zikili wajiinga ntaangi wakwa Abiya; Pilitai wajiinga ntaangi wakwa Miniamini ne Moadiya. ¹⁸ Shamua wajiinga ntaangi wakwa Biliga, Yehonatana wajiinga ntaangi wakwa Shemaya, ¹⁹ Matenai wajiinga ntaangi wakwa Yoaliba, Uzi wajiinga ntaangi wakwa Yedaya, ²⁰ Kalai wajiinga ntaangi wakwa Salu, Ebela wajiinga ntaangi wakwa Amoki, ²¹ Hashabiya wajiinga ntaangi wakwa Hilikiya, kabiji Netanela wajiinga ntaangi wakwa Yedaya. ²² Mu mooba a kwa Eliashiba, beena Levi Eliashiba, Yoada, Yohanana, kabiji ne Yadua ba neembelwe noobe bakuluumpe ba bisemi, ne ba n'aanga ba neembelwe kimye kya bufumu bwakwa Daliusa mwiina Pelisha. ²³ Baana bakwa Levi, ba ntaangi baabo ba bisemi ba neembelwe mu buuku wa bisemi kufikatu ne ku mooba akwa Yohanana mwaana Eliashiba. ²⁴ Ba ntaangi babeena Levi bajiinga Hashabiya, Shelebiya, ne Yeshua mwaana Kadimela, ne bo bajiinga naabo, abo baimeene kwiipi mukimpelampela naabo mu kwi batuumbijika ne kwi basaanchila, mu kukuumbula ku lubaji na lubaji, mu kukookela ku mukaambizho wakwa Davida, muuntu wa Lesa. ²⁵ Mataniya, Bakibukiya, Obadiya, Meshulama, Talimona, ne Akuba bajiinga bakalama ba kibelo ba maloonda ba kwiimana pa kibelo kya kibaamba mwa kulamina biintu. ²⁶ Baingijile mu mooba akwa Yoakimu mwaana Yeshua mwaana Yozadaka, kabiji ne mu mooba akwa Nehemiya ndamakyaalo ne mu mooba akwa Ezela n'aanga kabiji muneembeshi. ²⁷ Pa kupaana kibuuba kya Yelusalema, baantu basakishe beena Levi ko baikeele, mu kwibaleeta ku Yelusalema mu ku sekelela kupaana na lusekeelo, ne na kusaanta kabiji ne na kwiimba na bijiimba, ne miseense, ne ma baanjo. ²⁸ Kukwaantankana kwa ba nyiimbi ba koonkene pamo kufuma mu bibuunji bya mu Yelusalema ne mu mizhi ya beena Netofati. ²⁹ Bafumine ne ku Beti Giligala kabiji ne mu mapuunzha a mu Geba ne Azimaveti, pakuuba ba nyiimbi betuungijile beene mizhi mu Yelusalema moonse. ³⁰ Ba n'aanga ne beena Levi betookeshe abo beene, kabiji keepo batookeshe ne baantu, ne bibelo kabiji ne bibuumba. ³¹ Keepo natumine ba ntaangi ba Yuda kuuya peulu ya kibuumba, kabiji amiiwa natoongwele mabuumba akataampe abiji a ba nyiimbi ba paine lusaanchilo. Jibuumba jimo jaile ku kilujo pa kibuumba kukibelo kya mbolezha. ³² Hoshaya ne lubaji lumo lwa ma taangi ba Yuda be baloondejile, ³³ kabiji panyuuma yaabo paloondejile Azaliya, Ezela, Meshulama, ³⁴ Yuda, Benjamina, Shemaya, Yelemiya, ³⁵ kabiji ne bamo baana ba ba n'aanga na ma ntoloompita, Kabiji Zekaliya mwaana Yonatana mwaana Shemaya mwaana Mataniya mwaana Mikaya mwaana Zakula mwaana Asafa. ³⁶ Kabiji kwajiinga ne baloongo bakwa Zekaliya, Shemaya, Azalela, Milalai, Gilalai, Mai, Netanela, Yuda, Hanani, na bijiimba bya kwa Davida muuntu wa Lesa. Ezela muneembeshi wajiinga kuluutwe yaabo. ³⁷ Byo bafikile nsulo ya kibelo bapitaijiletu peulu ya muzhi wa Davida, mujishiinda ja kukaanji peulu ku kibuumba peulu ya kipaango kya kwa Davida, ku kibelo kya meema ku musela. ³⁸ Jibuumba ja ba nyiimbi jikwaabo ja mu oa a pikile saante baile ku lubaji lukwaabo. Amiiwa ne baloondejile pa kibuumba na lubaji lumo lwa baantu, peulu ya kishimikwa kya leepa kya Ovena, kuya ku kibuumba kyabaya, ³⁹ kabiji ne peulu ya kibelo kya Efulaima, kabiji ne kukibelo kyakala, kabiji ne kukibelo kya masabi ne ku kishimikwa kya leepa kya Hananela ne kya kitoota, kuya ku kibelo kya mikooko, kabiji baimene pa kibelo kya maloonda. ⁴⁰ Byonkabyo mabuumba onse a booba ba pikile saante ba seendele ma puunzha abo mu nzuubo ya Lesa, kabiji ne amiiwa naseendele mpuunzha yaami na lubaji lumo lwa bineemanga pamo ne amiiwa. ⁴¹ Keepo ba n'aanga baseendele mpuunzha yaabo: Eliakima, Maseya, Miniamina, Mikaya, Elioenai, Zekaliya, ne Hananiya, ne ma toloompita, ⁴² kabiji ne Maseya, Shemaya, Eleazala, Uzi, Yehohanana, Malekiya, Elama, ne Eza, kabiji ne ba nyiimbi beleengejile abo beene kyuumvwa ne Yezelahiya wajiinga ntaangi waabo. ⁴³ Ba laambwile bitapisho bikataampe pa jooja juuba, kabiji basaangalele, pakuuba Lesa wibaleengeshe kusaangalala na lusekeelo lukataampe. Baineetu naabo ne baana ba saangalele. Byonkabyo lusekeelo lwa Yelusalema lwa koonsheshe kuumvwanyi kwaleepesha. ⁴⁴ Pa jooja juuba ba balume be batoongwele kwiikala bakuluumpe ba mwakulamina biintu bya kusoonka, bipaangwa bitaanshi, ne bya bujikumi, mu kwibibuungizha mu bibese mwaila mukaambizho wa ba n'aanga ne beena Levi. Kila muuntu ba mukaambizhe kwiingijila mu majimi aji kwiipi na ngyaangi. Pakuuba Yuda wasaangalele kukila ba n'aanga ne beena Levi aba baimene ku meeso anji. ⁴⁵ Baigijile mwiingilo wa Lesa waabo, kabiji ne mwiingilo wa kwiitokesha, kabiji byonkabyo ne ba nyiimbi ne bakalama ba bibelo baubile byonkabyo, mu kulama mukaambizho wa Davida ne wa kwa Solomoni mwaananji. ⁴⁶ Pakuuba kala keene, mu mooba akwa Davida ne Asafa, kwajiinga bakuluumpe ba banyiimbi, kabiji kwajiinga nyiimbo ya kutuumbijika ne ya kusaanta kwi Lesa. ⁴⁷ Mu mooba akwa Zelubabela kabiji ne mu mooba akwa Nehemiya, beena Isalela boonse bapaine bya bunoonshi kila juuba kyajiinga bibeena Levi kabiji ne beena Levi batuujile baana bakwa Alona pa mbaji bya bunoonshi byazhijikwa.