¹ Pa jooja juuba bataangile mu bbuuku wa Mosesa pa kuumvwa baantu kabiji batainemo kya neembwa amba kafwaako mwiina Amonyi naangwa mwiina Moabu ukatweela mu nzuubo ya Lesa ne, myaaka yoonse. ² Maambo keechi baishile na beena Isalela na shiinkwa ne meema, mino batewile Balamu ne kufiinga beena Isalela. Byonkabyo Lesa weetu wa alwiile mafiingo ke mapeesho. ³ Byo baumvwine ino mikaambizho, be babenye kufuma mu beena Isalela boonse baantu boonse ba mu ntaanda ingi ya bweenyi. ⁴ Pano abino kasa bikyaangye Eliashiba ba mutoongwele kwiikala na lusa lwa pa tu mazuubo twa ku mu nzuubo ya Lesa weetu. ⁵ Eliashiba waneengezhezhe Tobiya nzuubo ya butala bukataampe, amo mwaakala mo balamijilenga bya buupe bya nsomo binuunka buloongo bya kwiingijisha biintu, ne bya bujikumi bya nkunwa, ne bunuunka buloongo, ne binyu bya katataka, ne maanyi, abyo bakaambizhe kwiikala bya beena Levi, ba nyiimbi, bakalama ba biinzhilo, ne bya buupe bya neengezhiwe bya ba n'aanga. ⁶ Mino mubino bimye byoonse amiiwa keechi najiinga mu Yelusalema ne. Pakuuba mu mwaaka wa makumi asatu ne ibiji ya Atazakeshi mfumu wa Babilona naile kwi mfumu. Panyuuma ya bimye bimo naloombele luusa kwi mfumu lwa kufumako, ⁷ kabiji nabwelele ku Yelusalema. Naumvwiine bundenga maambo bwa ubile Eliashiba pa kupa Tobiya nzuubo ya kulaminamo biintu mu bipaango bya nzuubo ya Lesa. ⁸ Akino keechi kya nsekeshe amiiwa ne kabiji nataile bipe bya kwa Tobiya byoonse paangye ya mwa kulamina biintu. ⁹ Amiiwa nakaambizhe amba batookeshe mwakulamina biintu, kabiji na bweezhezhemo biintu bya mu nzuubo ya Lesa, milaambu ya nkuunwa, ne binuunka buloongo. ¹⁰ Nafuunjile amba kibese kya beena Levi keechi be bapeele ne, kabiji banyeemene, kila muuntu ku bujimi bwaanji, beena Levi ne ba nyiimbi baigijile miingilo. ¹¹ Byonkabyo nakajipijile ba bineemanga ne kwaamba amba, "Kiika kyo mwalekelesha nzuubo ya Lesa?" Amiiwa ne ba buungizhizhe pamo ne kwi babiika pa bifulo byaabo. ¹² Poonkapo beena Yuda boonse baleetele bya bujikumi bya nkunwa, binyu bipya, ne manyi ku tu mazuubo twa kulaminamo biintu. ¹³ Natoongwele ba kalama ba ku tu zuubo twa kulaminamo biintu Shelemiya n'aanga ne Zadoka muneembeshi, kabiji mubeena Levi, Pedaya. Waloondejilemo mwi abo wajiinga Hanana mwaana Zakula mwaana Mataniya, maambo ba bajilwe amba bakishiinka. Miingilo yaabo yajiinga ya kwaabanya byapanyiwe ku bo bajiinga naabo. ¹⁴ Ngitai amiiwa mu ku mvulula, Lesa waami, maambo a bino, kabiji keechi mufumyeepo byuubilo bya waama byo naubila Lesa waami ne miingilo yaayo ne. ¹⁵ Mu oa mooba namweene baantu mu Yuda kasa beengila mu min'aanza n'aanza pa Sabaado ne kuleeta miluumba ya nkunwa ne kwi ikaanjizha pa ba mboongolo, ne binyu naabyo, ne bipaangwa, ne makuyu, ne musaango yeense wa biipe, byo baleetele mu Yelusalema pa juuba ja Sabaado. Ne bajimwine pa kupotesha kajo pa jooja juuba. ¹⁶ Baantu baku Tila baikelenga mu Yelusalema baleetele masabi ne misaango yoonse ya kajo, ne kwibipotesha pa juuba ja Sabaado ku baantu ba mu Yuda ne mu muzhi! ¹⁷ Keepo nakajipijile ba bineeme ba mu Yuda amba, "Maambo ka kyo mubeena kuubila kino kiintu kyatama, kuzhilulula juuba ja Sabaado?" ¹⁸ Keechi basheenu be kyuubile kino ne nyi? Naanchi Lesa keechi waleetele bino byatama byoonse pe atweeba ne uno muzhi ne nyi? Pano mubeena kuleeta bukaji bwavula pe Isalela na kuzhilulula Sabaado." ¹⁹ Byo pafiichiletu ba bibelo bya Yelusalema Sabaado sa akyaangye kufika, naswiishishe amba bibelo be bishiinke kabiji amba keechi bafwainwa kwibishiinkula ne posotu Sabaado wapita. Nabiikile ba miingilo bami bamo pa bibelo byonkabyo kafwaako biipe byo bafwainwa kuleeta mukachi pa juuba ja Sabaado ne. ²⁰ Basulu ne ba potesha mituundu yoonse ya mawaaya ba tebelejile paangye ya Yelusalema jimo naangwa jibiji. ²¹ Mino nebajimwiine amba, "Maambo ka kyo mwatebelela paangye ya kibaamba? Inge mukoobe kino jikwaabo, amiiwa nkabiika mabooko ami pe anweeba!" Kufuma kyookya kimye keechi baishile pa Sabaado. ²² Keepo nakaambizhe beena Levi kwiitokesha abo beene, ne kwiiya na kuloonda bibelo, ne mu kuzhijika juuba ja Sabaado. Ngitai mu ku mvulula pa kino naakyo, Lesa waami, kabiji ngubilai lusa amiiwa maambo a lulayaan'ano lwa neema lo muji naalo pe amiiwa. ²³ Mu oa mooba namweene ne ba Yudea aba basoongwele baana bakazhi baku Ashedods, Amona, ne Moabu. ²⁴ Kipuungu kimo kya baana baabo ba ambilenga mulaka wa ku Ashedoda. Kafwaako naangwa umo mwi abo wayuukile kwaamba mulaka wa ku Yuda ne, mnio mulakatu baantu bakwaabo bamo. ²⁵ Nebakajipijile, kabiji ne bafiingile, ne kukozhaapo bamo ne kwiibayokola nsuuki yaabo. Ne ba chipishe na Lesa, amba, "Keechi mukasoongweshe baana beenu ba bakazhi ku baana baabo ne, naangwa kusoongwela baana beenu ba balume baana baabo ba bakazhi ne, naangwa anweeba beene ne. ²⁶ Naanchi Solomoni mfumu wa Isalela keechi waleengele maambo na maambo a bano ba bakazhi ne nyi? Mukachi ka byaalo keechi kwajiingapo mfumu noobe aye ne, kabiji ba mutemenwe kwi Lesa waanji, ne Lesa wa mupele bufumu bwa Isalela yeense. Naangwa byonkabyo, bakazhi baanji ba ku byaalo bikwaabo ba muleengejile aye kuleenga maambo. ²⁷ Naanchi twafwainwa kuumvwa kwi anweeba ne kuuba buubi bukataampe nyi, ne kwiikala babula kuluumbuluka kwi Lesa weetu na baana bakazhi baangi nyi?" ²⁸ Umo wa mubaana bakwa Yoakimu mwaana Eliashiba n'aanga mukataampe muko wakwa Sanabalata mwiina Holoni. Onkao maambo namulengeshe kunyeema kiluungi kyaami. ²⁹ Betai mu kwi bavulula, Lesa waami, maambo bazhilulula bu n'aanga, ne lulayaan'ano lwa bu n'aanga ne beena Levi. ³⁰ Byonkabyo ne batookeshe ku byoonse bya beena byaalo, ne kwiikazha miingilo ya ba n'aanga ne beena Levi, kila muuntu pa mwiingilo waanji mwiine. ³¹ Napaine milaambu ya nkunyi pa bimye byatoongwelwe ne kya bipaangwa. Ngitai mu ku mvulula, Lesa waami, pa bya waama.