¹ Kabiji yesu byo aendelenga munzubo ya Lesa, Umo wamumubanabanji babwanga wamwambijile amba, "Mufunjishi tala musango wa ano maabwe ne bishimikwa nabyo musango wabyo!" ² Ne yesu wamwambijile mba, "wibimona bino bishimikwa bikatampenyi? kechi pakashala jibwe nangwa jimo jikatentakana pajikwabo jobakabula kupalanganya ne." ³ Kabiji byo aikajile kumutumba wa Olobeta watalangana na nzubo ya Lesa, Petelo, Yakoba Yoano, ne Andeleo ba mwipwizhe kwa buke bwabo mba, ⁴ "Tubulai, nganyi kimye kyobikamweka bino bintu byonse? nganyi biyuukilo byakuyukilako amba bino byonse byafwenya kala nke pepi kumwekana?" ⁵ Ne yesu watatwile kwibambila mba, "jimukai kuchina mba kafwako nangwa umo wa kwimutwala mungi ne. ⁶ Mambo bavula bakeya mujizhina jami ne kwamba mba, 'yami iye! kabiji nebavula bakebatwala mungi. ⁷ Umvwe mukomvwe makondo ne nkuwa ya makondo kange mukaakamwe ne! mambo abino byonse byakonsha kumwekana, mono mpelo saikyangye kufika. ⁸ Mambo kyalo kikemena kyalo kiwabo, ne bufumu bukemena bufumu bukwabo. kabiji kukela bitentanshi kumapunzha avula, ne bipowe bya nzala. Bino bintu byonse yo ntatwilo ya bisanso. ⁹ Sa mwiketa. maambo bakemipana ku bije, ne kwimipuma mumashinagoga. kabiji mukemana ku meenso abene bandama byalo ne kumenso aba mfumu na maambo aamiwa, ke lushimuno kwi abo. ¹⁰ Mino maambo awama afwainwa patanshi akasapwile ntaanda yonse ya panshi. ¹¹ Pakuba inge bakemukwate nekwimupuma kumaboko a bakulumpe, kechi mukakamwe mba tusakwamba amba ka ne. Pakuba kyonkakyo kimye, byakwamba bikapanwa kwi anweba! pakuba kechi yeenu mukambanga ne, poso mupashi wazhila. ¹² Kabiji kolo nangwa nkasa ukemana mukwabo bene nabene ne kumufikizha kulufu, ne shanji naye mwaananji. Baana nabo bakemena bebasema ne kwibepaya. ¹³ Anweba bakemupata ku bonse namaambo a jizhina jami. Pakuba awa ukakoselamo kufika ne kumpelo, ukapuluka. ¹⁴ Kabiji umvwe mukamone akya kyabunya kileta lonaiko kyaimana pokyafwaainwa kubula kwimana (lekai wenakutanga omvwishe ), mukaleke aba baji mu Yudeya bakanyemene ku mitumba, ¹⁵ Kabiji awa uji peulu yamutenge kechi ekile panshi ne kutwela mu nzuubo mba ndupule nangwa kusendamo bintu ne, ¹⁶ Kabiji neyewa naye uji mubujimi kechi abwele ku nzuubo mukushikula munkunkumba wanji ne. ¹⁷ Kabiji malwa kuboba baji nabaana ne kuboba bamuusha mu aa moba! ¹⁸ Lomba amba kechi bikamwekane mukimye kyamashika ne. ¹⁹ Mambo kukekala malwa akatampe, ao abujile kwikalako kuntendekelo, kimye Lesa alengele Ntanda, kufika ne kino kimye, ine, kabiji kechi akekale lelo jibiji myaka ne myaka ne. ²⁰ Mambo Lesa mwine wibachibileko moba abo, inge ne kwibachibilako ne inge kafwako nangwa umo ukapuluka. Pakuba namambo a basalululwa, bo asalulula mwine, wiachibako moba. ²¹ Kabiji umvwe muuntu akemwambile mba , ' Talai, uno ye klishitu!' nangwa mba Talai, awa kokwa! ' kechi mukamwitabe ne. ²² Maambo bena klishitu basula babubela bakeya kabiji bakamwesha biyukilo ne bya ne byakukumya byavula, nebasalululwa pamo. ²³ Onkao maambo jimukai! Amiwa nemubujila jimo bintu byonse biji kulutwe yeenu. ²⁴ Kabiji panyuma ya malwa mu oa moba, juba jikoba mfinshi, ne ngodo naye kechi ukamona kyeya ne, ²⁵ Ne tubangabanga tukapona kufuma mwiulu, ne bya bulume bibi mwiulu bikasunkena. ²⁶ Kepo bakamona mwaana muntu sa ayamumakumbi na bulume bukatampe ne na lukumo. ²⁷ Kabiji ponkapo ukatuma bamalaika banji ne kwi babungika bonse basalululwa banji mumakonka onse ana, kufuma kwapela ntanda ne kufika kwapela jiulu. ²⁸ Funjilaiko ku kichi kya mukuuyu, ponkapo musampi wanji byo aaluka ke wanekena ne kusapuka mabula anji mukayuke amba mayoo afwenya kwipi. ²⁹ Byonkabyo, inge mukamone bino bintu byonse sa bimwekana, mukayuke mba mwaana muntu uji pabwipi, kubwipi na bibelo byenu. ³⁰ Kine nemwambila namba , kino kisemi kechi kikapite ne posotu bino bintu byone bikafike. ³¹ Maambo jiulu ne ntanda byonse bikapita, kajiji byambo byami kechi bikapita nangwa pachechetu ne. ³² Pakuba aja juba nangwa akya kimye,kafwako nangwa umo wibiyukane, nangwa bamaika ba mwiulu, nangwa aye mwaana, poso kanatu shanji yenka wa mwiulu. ³³ Labai! kenketai, maambo kechi mwayuka nanji kimye pokikeshila ne. ³⁴ Kyapasha nobe muntu uji palweendo- aye ashe nzubo yanji ne kupana luusa kuba mwingilo banji, waakambizhene malooonda kulabanga kimye kyonse. ³⁵ Onkao maambo neanweba mulabenga ne kukenkenta, maambo kechi mwayuka juba joakeshilamo mwine mwina nzubo ne! kana mabanga, kana bufuku, kana shikombwe wakokola, nangwa kana lukelo. ³⁶ Inge waiya nobe mumukopa kwaajinso, kechi akemutaane sa mwalaala ne. ³⁷ Byonaamba kwi anweba naamba ne kubonse: Labainga ne kukenkeenta.