¹ Pa juuba ja butaanu na busatu Mosesa waichile Alona ne baana baanji ba balume ne bakuluumpe babeena Isalela. ² Wa ambile kwi Alona amba, "Shikulaapo mwaana n'oombe wa mulume wa mulaambo wa buubi, ne mukooko mulume wa mulaambo wa kusooka, boonse babiji ba kubula bulema ne kwibipaana ku meeso a Yehoba. ³ Mukebaambile baantu ba ku mukooka wa beena Isalela ne kwaamba amba, "Ashikule mbuzhi mulume wa mulaambu wa buubi kabiji ne mwaana n'oombe ne mwaana mukoko boonse babiji ba mwaaka umo bakubula bulema, ba mulaambu wakusooka; ⁴ Kabiji ne n'oombe ne mukooko mulume yo milaambu ya muteende wakutapisha ku meeso a Yehoba, kabiji ne mulaambu wa kajo kavwaangakana na maanyi, maambo leelo Yehoba usakumweeka kwi anweeba.'' ⁵ Kabiji bakaleetele bya kaambizhizhe Mosesa koonka ku kibelo kya teente wa lusaambakeno, kabiji boonse beena Isalela basaambakene pamo bafweenyene kwiipi ne kwiimana kwi Yehoba. ⁶ Kabiji Mosesa wa ambile amba, "Abino byo byo a kaambizha Yehoba amba mwiikyube, pakuuba amba lukuumo lwaanji lukemimweekele anweeba." ⁷ Mosesa wa ambile kwi Alona amba, "Fweenyai kwiipi ku kyakusookelapo bitapisho ulaambule mulaambu obe wa buubi ne mulaambu wa kusooka, kabiji wifuuchile maambo obe ne baantu, uleete ne mulaambu wa baantu ne kwibafuuchila maambo abo, moonka mo a kaambizhizha Yehoba." ⁸ Keepo Alona wafwenyenye kwiipi na kya kusookelapo bitapisho ne kwiipaya mwaana n'oombe wa mulaambu wa buubi, wa kwifuuchila ko maambo aye mwiine. ⁹ Kabiji baana bakwa Alona bamuleetejile mashi aye, ne aye watuumpilemo munwe waanji mu mashi ne kwi alaamba ku nseengo ya kya kusookelapo bitapisho; Kabiji waitulwiijile mashi ku kitako yaakyo pa kya kusookelapo bitapisho. ¹⁰ Byonkabyo, wasookele mafuta, mafyo, kabiji ne mafuta aji peulu ya jichima ku mulaambu wa buubi wi asookele pa kya kusookelapo bitapisho kwi Mosesa. ¹¹ Pakuuba nyaama ne maanyi wibisookele paangye ya kaamba. ¹² Alona waipaile ne mulaambu wakusooka, ne baana baanji ba muleetejile mashi, ne aye wi asaanshile koonse ku kya kusookelapo bitapisho. ¹³ Kabiji bamuleetejile mulaambu wa kusooka, pa kipiimvwa, pa kipiimvwa, pamo ne mutwe ne aye wibisookele pa kya kusookelapo bitapisho. ¹⁴ Kabiji waovwele bya muunda ne mabooko ne bijiimo ne kwibisooka byoonse peulu pa kya kusookelapo bitapisho poonka pa mulaambu wa kusooka. ¹⁵ Alona waleetele mulaambu wa baantu- ne kushikula mbuzhi wa mulaambu wa buubi, ne kwiipaya; Kabiji wapaine mulaambu wa buubi byo aubile na mbuzhi mukwaabo mutaanshi. ¹⁶ Kabiji waleetele ne mulaambu wakusooka ne ku mulaambula moonka mo a kaambizhizhe Yehoba. ¹⁷ Kabiji waleetele ne mulaambu wakajo; ne kuyuuzha mu mabooko anji kabiji wasookele ne pa kya kusookelapo bitapisho, pamo ne mulaambu wakusooka lukeelo. ¹⁸ Kabiji waipaile n'oombe ne mukooko mulume, milaambo ya muteende yajiinga ya baantu. Ne baana ba kwa Alona ba mupeele mashi, wiasaanshile koonse koonse ku kya kusookelpao bitapisho. ¹⁹ Naangwa byonkabyo, bachibile mafuta a n'oombe mulume ne mukooko mulume, ne mukila wanuuna, ne mafuta a vweeta bya muunda, ne mafyo kabiji ne mafuta aji peulu ya jichima. ²⁰ Kabiji baseendele ne kakuji ko bachibile ne kwikabiika peulu ya kakuji ne aye Alona wasookele bya mafuta poonka pa kya kusookelapo bitapisho. ²¹ Alona wapeepeezhe tukuji ne kijooma kya kukiluujo noobe mulaambu wa kupeepeezha kwi Yehoba, moonka mwakaambizhizhe Mosesa. ²² Poonkapo Alona wasuuntwile maboko anji ku baantu ne kwibapeesha; Kabiji waikijile kufuma ko alaambwilenga mulaambo wa buubi, ne mulaambu wakusooka, ne mulaambu wa muteende. ²³ Mosesa ne Alona batweelele mu teente wa lusaambakeno, kabiji pakulupukamo jikwaabo wibapeesheshe baantu, ne lukumo lwa Yehoba lwamweekele ku baantu boonse. ²⁴ Mujilo wafumine kwi Yehoba ne kusooka mulaambu ne mafuta pa kya kusookelapo bitapisho, ne baantu byo bekimweene ba bijikile ne kupona paanshi kinkuvumeene.