¹ Nadaba ne Abihu, baana bakwa Alona, kila muuntu waseendele kikoopo, ne kubiikamo mujilo mukachi, kabiji ne mafuta anuunkila buloongo-poonkapo bakaine kushiniinkisha mujilo ku meeso a Yehoba ye abujile kwiibakaambizha. ² Byonkabyo mujilo wafumine ku meeso a Yehoba ne kwibasooka boonse, kabiji bafwiile ku meeso a Yehoba. ³ Poonkapo Mosesa wa ambijile Alona amba, "Abino byo bya amba Yehoba amba, 'Nkamweesha buzhile bwaami kubooba beeya peepi ne amiiwa. Kabiji nkobilwa lukumo ku meeso a baantu boonse."' Alona keechi wa ambilepo biji byoonse ne. ⁴ Mosesa waicile Mishela ne Elezafwana, baana ba Uziela mwiinsho yaanji na Alona, ne kwibaambila boonse amba, "Iyaai kuno kabiji museende baloongo beenu kufuma mu kaamba ku meeso a teente walusaambakeno." ⁵ Kabiji baishile peepi ne kwibaseenda boonse, kabiji bavwaajile ne bivwaalo byaabo bya ku bufumu, kufuma mu kaamba, byoonka bi bakaambizhe Mosesa. ⁶ Poonkapo Mosesa wa ambijile Alona ne Eleaza ne Itama, baana baanji amba, "Keechi muleke nsuki yeenu kumitwe yeenu ne mwi ikobeke kasa yabula kukosa, kabiji keechi mutabaule bivwaalo byeenu ne, pakuuba amba mubule kufwa, kabiji ne Yehoba naaye keechi azhiingile kwi ibuungizha yoonse ne. Pakuuba swiishai baloongo beenu, boonse ba mu nzuubo ya Isalela ne kwibajijilako bo basooka ku mujilo wa Yehoba. ⁷ Keechi mwafwainwa kufumina pakutwelela pa teente walusaambakeno ne, maambo mukafwa, maambo maanyi ashiingwa a Yehoba ke enu." Kabiji bekyubileenga na maambo a mikaambizho ya kwa Mosesa. ⁸ Yehoba wa ambijile Alona, ne kwaamba amba, ⁹ "Keechi utome binyu naangwa byakutoma byashiinta ne, anweeba, naangwa baana boobe ba balume bowashaala naabo, byo ukaya muteente walusaambakeno, kabiji keechi ukafwa ne. Akino kikeekala myaaka moonse mu nkulo yaabo, ¹⁰ ne kupusanya pakachi ka kuzhila ne kusuulwa, kabiji ne pakachi ka byatooka ne byabula kutooka, ¹¹ pakuuba amba ufuunjishe beena Isalela byo baji amba Yehoba wakaambizhe kupichils mwi Mosesa." ¹² Mosesa wa ambile kwi Alona ne Eleaza kabiji ne kwi Itama, baana baanji bashaajilepo ba balume amba, "Seendai nkunwa yamulaambu yashaalapo ne kwi ifumyaapo kwi Yehoba yaleengelwe na mujilo, ne kuja kwakubula mbizho kubushiiya ya kitapisho, akino kyo kyazhila. ¹³ Mwafwainwa kuja kino mu mpuunzha yazhila, maambo lo lubaji lweenu kabiji ne baana beenu ba balume kubitapisho bya Yehoba bya leengelwe na mujilo, pakuuba abino byo byo nakaambizhiwa kwi mubuula anweeba. ¹⁴ Byonka biji jibeele jakupeepeezha ku mulaambu ne byakusooka bya pakachi ka maulu ne kitako, mwafwainwa kuja byoonse mu mpuunzha yatooka buloongo. Anweeba ne baana beenu ba balume ne ba bakazhi, kyapainwe kwi abo amba kekipoope kyeenu ne kipoope kya ba nsoongwalume kufuma ku milaambu ne kupwiila ku bitapisho bya baantu ba mu Isalela. ¹⁵ Biji pakachi ka kifuka ne ku maulu bya kupaana kabiji ne jibeele jipeepeela koonka kukitapisho, byafwainwa kuleeta byoonse ku milaambu ya byanuunka byaleengwa na mujilo noobe kitapisho kibeena kupeepeela ku meeso a Yehoba. Bakeekala ke beenu ne baana beenu ba balume bakeekalamo na lubaji myaaka, byoonka bya kaambizhe Yehoba." ¹⁶ Poonkapo Mosesa waipwiizhe pa mbuzhi wa mulaambu wa buundenga maambo, ne kutaana amba walaambulwa kala, poonkapo wauvwiine bukaji pe Eleaza ne Itama, bo baana bashaajilepo bakwa Alona, wa ambile amba, ¹⁷ "Kiika kyo mwabujila kuja mulaambu wa buundenga maambo mu mpuunzha yalusaambakeno, maambo kyazhila, kabiji maambo Yehoba wikipaine kwi anweeba ne kubuungizha buundenga maambo, ne kwiafuuta onse ku meeso anji? ¹⁸ Talai, mashi keechi aleetelwe mukachi mu teente walusaambakeno ne, byonkabyo mwafwainwa kuja moonka mu mpuunzha mwakusaambakena, byonka byo nemukaambizhe." ¹⁹ Poonkapo Alona wa mukuumbwile Mosesa amba, "Talai, leelo baleenga milaambu yaabo ya buundenga maambo ne byakusookelapo milaambu ku meeso a Yehoba, kabiji abino byamweeka kwi amiiwa leelo. Inge nakuja mulaambu wa buundenga maambo leelo, kyakoonsha kumweeka buloongo ku meeso a Yehoba nyi?" ²⁰ Mosesa byo a uvwiine byobyo, watoodelwe.