¹ Yehoba wa ambile kwi Mosesa ne Alona, ne kwaamba amba, ² "Ambila beena Isalela, ne kwibaambila amba, 'Abino byo biintu byo mwafwainwa kuja mu ba nyaama boonse baji pano pa ntaanda. ³ Mwafwainwa kuja nyaama yense uji namikono yaleenduka ne kupasauka, ne kushen'ununa kajo. ⁴ Byonkabyo, ba nyaama bamo naangwa bashen'ununa naangwa baji na mikono yaleenduka ne kupasauka, kabiji keechi mwafwainwa kwibaja boonse ne, ba nyaama baji noobe Ngameela, maambo basheen'ununa kabiji keechi baji na mikono yaleenduka ne. Byonkabyo Ngameela keechi watooka kwwi anweeba ne. ⁵ Naangwa Kibila maambo usheen'ununa kabiji keechi uji na mikono yaleenduka naangwa kupasauka ne, kabiji naaye keechi watooka kwi anweeba ne. ⁶ Kalulu, naangwa kasheen'ununa keechi kaji na mikono yaleenduka ne, keechi katooka kwi anweeba ne. ⁷ Ngulu, naangwa uji na mikono yaleenduka ne kupasauka, keechi usheen'ununa ne, keechi watooka kwi anweeba ne. ⁸ Kabiji keechi mwafwainwa kuja naangwa kipiimvwa kiji kyoonse kya bano ba nyaama ne, naangwa kukwaata pa mibiji yaafwa ne, keechi byatooka kwi anweeba ne. ⁹ Ba nyaama beekala mu meema bo mwafwainwa kuja ke booba baji na toowelo ne mabaamba, naangwa mu kaluunga naangwa mu tukola. ¹⁰ Kabiji naangwa bileengwa byoonse byabula toowelo naangwa mabaamba bya mukaluunga naangwa mu tukola, kubiikapotu ne byoonse byeenda mu meema ne bileengwa byoonse bya mu meema-abino byo bya bunya kwi anweeba. ¹¹ Maambo bya bunya, keechi mwafwainwa kuja bipiimvwa byaabyo ne; Naangwa, byaafwa ke bya bunya kwi anweeba. ¹² Naangwa biikala mu meema ne kubula toowelo naangwa mabaamba ke bya bunya kwi anweeba. ¹³ Ne bano ba n'oonyi bo ba bunya- kabiji keechi mwafwainwa kwibaja ne maambo bo ba bunya: Nkwaashi, Jikubi, kabiji ne Jikubi jifiita, ¹⁴ Kibiimbe, ne Kiswaakozhi kiji kyoonse, ¹⁵ ne Kikwaangala po kyaapela, ¹⁶ Ositilikya, Lubaafwa, Kabwiilile, kabiji ne Tubeemba moonka mwaila mutuundu waato. ¹⁷ Kapwa kacheeche ne kakataampe, Jikwikwi abino naabyo byo bya bunya, ¹⁸ Kapwa katooka, Kafutubiji, Jikubi ja jicheeche, ¹⁹ N'eendabwala, ne Mapuundu moonka mwaila mutuundu wao, Susuute kabiji ne Mujima. ²⁰ Ne biloongolo byoonse byeenda na maulu ana byo bya bunya kwi anweeba. ²¹ Kabiji mwafwainwa kuja biloongolo bituumbuka kabiji ne kweenda na maulu ana inge biji na maulu aji na manuungi a kweendelako paanshi. ²² Mwafwainwa kuja Nzhiye moonka mwaila mutuundu yaayo. Kaandwa, Kiimbotwa, Teete. ²³ Kabiji biloongolo byoonse bituumbuka biji na maulu ana byo bya bunya kwi anweeba. ²⁴ Mukeekala na biko kufiika ne mabaanga pa bano ba nyaama inge mwakwaata kyaafwa kimo pabino. ²⁵ Awa watoola kimo kyaafwa wafwainwa koovwa kivwaalo kyaanji, ne kwiikala na biko kufiikatu ne mabaanga. ²⁶ Nyaama yeense uji na mikono yaleenduka kabiji yabula kupasauka naangwa ubula kusheen'ununa kyo kyabula kutooka kwi anweeba. Yeense ukakwaatako ukeekala wabula kutooka. ²⁷ Naangwa ba nyaama boonse beenda na makabo po bapelela beenda na maulu onse ana, bo babula kutooka kwi anweeba. Naangwa ukakwaata kyaafwa ukeekala wabula kutooka kufikatu ne mabaanga. ²⁸ Awa ukatoola akya kyaafwa wafwainwa kuchapa bivwaalo byaanji ne kwiikala wabula kutooka kufiikatu ne mabaanga. Abano ba nyaama bo babula kutooka kwi anweeba. ²⁹ Ba nyaama bakalaba paanshi, abano bo ba nyaama bakeekala babula kutooka kwi anweeba: Muumbuluma, Mpuku, ne papela Nsaamba, ³⁰ Maankwalala, Mibulu, Maasubala, Kitoombwe, Loongolo. ³¹ Ba nyaama boonse bakalaba paanshi, abano bo ba nyaama bakabula kutookeshiwa kwi anweeba. Awa ukakwaatako ku boonse inge baafwa ukeekala ke wabula kutooka kufikatu ne mabaanga. ³² Inge umo mwi abo waafwa ne kuponena pa kiintu, akya kiintu kikeekala ke kyabula kutooka, naangwa kyaleengelwe na mwaandalo, kivwaalo, kyatezhima, naangwa kivwaalo kya masaaka pokiji naangwa bekiingijisha, kyafwainwa kubiikwa mu meema; bikeekala ke byabula kutooka kufiikatu ne mabaanga, kabiji popo bikeekala byatooka. ³³ Kabiji mpuki iji yoonse mukachi naangwa peulu pa ponena nyaama wabula kutooka, naangwa uji mukachi ka mpuki ikeekala yabula kutooka, kabiji mwafwainwa kwiyonauna aya mpuki. ³⁴ Kya kuja kiji kyoonse kikajiiwa kiji na meema moonka, aino mpuki keechi yatooka ne. Meema onse akutoma mu yooya mpuki keechi atooka ne. ³⁵ Biintu byoonse abya bikaponenapo peulu byabola, bikeekala byabula kutooka; Inge kitofu naangwa kitofu kicheeche, kyalajika mu bipiimvwa. Byafwainwa kwiikala ke byabula kutooka kabiji byafwainwa kwiikala byabula kutooka kwi anweeba. ³⁶ Mushima naangwa mutupauka meema kubuungizha pamo pakuuba amba ekale meema atooka; pakuuba uji yeense ukwaata kyaafwa ye wabula kutookeshiwa. ³⁷ Inge kipiimvwa kyabola kyaponena pa Nkunwa po yapelela ya kubyaala, aya nkunwa ikeekala yoonse yabula kutooka. ³⁸ Kabiji inge meema be abiika peulu ya nkunwa, naankwa kipiimvwa po kyapela kyabola kyaponena peulu, byonkabyo bikeekala ke byabula kutooka kwi anweeba. ³⁹ Inge nyaama poyapela yo muja yaafwa, byonkabyo awa ukakwaatako ku byookya kyaafwa ukeekala ke wabula kutooka kufikatu ne mabaanga. ⁴⁰ Yeense ukaja kifwiila wafwainwa kuchapa bivwaalo byaanji ne kwiikala wabula kutooka kufika ne mabaanga. Kabiji naangwa ukatoola kyabola a kachape bivwaalo byaanji ne kwiikala wabula kutookeshiwa kufika ne mabaanga. ⁴¹ Nyaama uji yeense weenda paanshi ye wabunya; Keechi wafwainwa kuja ne. ⁴² Byoonse byeendela muunda, naangwa byeenda na maulu onse ana, naangwa biji na maulu avula-ba nyaama boonse bakalaba paanshi, abano keechi mwafwainwa kwibaja ne, maambo byoonse byoobya bunya. ⁴³ Keechi mwafwainwa kwileengela anweeba beene bya bunya pa bileengwa byoonse po byapela bikalaba ne; Keechi mwafwainwa kwiikala babula kutooka anweeba beene kwi abo ne kabiji keechi mwafwainwa kuleenga babula kutooka ne. ⁴⁴ Maambo amiiwa ne Yehoba Lesa weenu. Mwafwainwa kwiilama bazhila anweeba beene, byonkabyo, kabiji ikalai bazhila, maambo amiiwa nazhila. Keechi mwafwainwa kwizhilulula anweeba beene ku ba nyaama pobapela beenda paanshi ne. ⁴⁵ Maambo amiiwa ne Yehoba, wimufumishe mu ntaanda ya Ijipita, ne kwiikala Lesa weenu. Mwafwainwa kwiikala bazhila, maambo ne amiiwa nazhila. ⁴⁶ Uno ye mukaambizho wa banyaama, tun'oonyi, ne bileengwa byeenda mu meema, kabiji ne bileengwa bikalaba paanshi, ⁴⁷ ne kwabanya kuleenga pakachi byatooka ne byabula kutooka, kabiji ne pakachi ka biintu bipeema byakuja ne biintu bipeema byo babula kuja."'