¹ Yehoba wa ambile kwi Mosesa, amba, ² "Seenda Alona ne baana baanji pamo, ne bivwaalo ne maanyi a kushiinga, ne n'oombe mulume wa mulaambu wa buubi, ne mikooko ibiji, ne ntuumbe wa shiinkwa wabula mbizho. ³ pwiizhai boonse bapwiila ku kibelo kya teente walusaambakeno. ⁴ Byonkabyo Mosesa waubile byonka bya mukaambizhe aye Yehoba, ne baantu boonse bapwiijile pamo koonka ku kibelo kya teente wa lusaambakeno. ⁵ Keepo Mosesa wa ambile ku boonse bapwiijile amba, "Abino byo bya kaambizha Yehoba amba kyuubiwe." ⁶ Mosesa waleetele Alona ne baana baanji ba balume ne kwiboovwa na meema. ⁷ Kabiji bamuvwiikile Alona kivwaalo kyaleepa ne ku munyiinga na jipoonda, ba muvwiikile mukaangyo ne peulu ya mukaangyo ba biikilepo ne kakobelo, ne ku munyiinga ba munyiingile na munkukuumba walukwa biingi na manoono ku kakukobeka ne kwiikakasa kwi aye mu musana. ⁸ Kabiji poonkapo wamukobekele ne kya pa kyaaji, keepo keepo a biikilemo Ulimu ne Tumimu. ⁹ Kabiji wamuvwiikile kitebo pa mutwe waanji, ne pakitebo, kuluutwe, wabiikileko muchiba wa golige, ke muunchinya wazhila, moonka mo a mukaambizhizhe Yehoba Mosesa. ¹⁰ Mosesa washikwiile maanyi, ne kushiinga ku kya kwiikalamo ne ku byoonse byajiinga mukachi ne kwi byabanya kwi Yehoba. ¹¹ Wasaanshilepo maanyi pakyakusookelapo bitapisho jitaanu na jibiji ne kushiingapo pa teente, ne michiba pa koowela, ne kitako, ne kwibyabanya ke bya Yehoba. ¹² Waitulwijile maanyi amo pa mutwe wakwa Alona ne kumushiingao ne ku mubiika pa mbaji. ¹³ Mosesa waleetele baana ba kwa Alona ne kwi bavwiika bivwaalo byaleepa. Ne kwibanyiinga na mipoonda mu misana ne kwi bapoomba kisapi kya lineenyi ku mitwe yaabo, byonka bibakaambizhizhe aye Yehoba. ¹⁴ Mosesa waleetele n'oombe mulume wa mulaambu wa buubi, keepo Alona ne baana baanji bateentekele mabooko abo pa mutwe wa yeewa n'oombe wa mulaambu wa buubi. ¹⁵ Mosesa byo a mwiipaile, washikwiile mashi ne kwialaamba ba munwe waanji ku nseengo ya kyakusookelapo bitapisho, ne kwiikitookesha kabiji waichijile mashi kuunshi yaakyo ne kwibibiika pa mbaji bya Lesa pakuuba amba kiikale kya kufuuchilako maambo. ¹⁶ Kabiji washikwiile mafuta onse ajiinga ku bya muunda, ne a vweetele ku jichima, ne mafyo abiji pamo ne mafuta ao, ne Mosesa wi asookele onse poonka pa kya kusookelapo bitapisho. ¹⁷ Pakuuba Mosesa wasookele awa n'oombe mulume, nee mwaai waanji, ne nyaama yaanji ne busobe bwaanji paangye ya kaamba, moonka mwakaambizhe Yehoba. ¹⁸ Mosesa waleetele mukooko mulume wa mulaambu wa kusooka, kabiji Alona ne baana baanji bateentekele mabooko abo pa mutwe wa mukooko. ¹⁹ Wa mwiipaile ne kusaansa mashi koonse koonse ku kya kusookelapo bitapisho. ²⁰ Wachibawile mukooko mu bipiimvwa ne kusooka mutwe mu bipiimvwa ne mafuta. ²¹ Waovwele bibese bya mukachi ne maulu na meema, kabiji wasookele mukooko yeense pa kya kusookelapo bitapisho. Wajiinga mulaambu wakusooka kabiji byafumishe bweema bwa waam, kitapisho kya leengwa na mujilo kwi Yehoba byonka byo a kaambizhe Mosesa. ²² Kabiji Mosesa waleetele mukooko mukwaabo mulume, mulaambu wazhila, kabiji Alona ne baana baanji babiji bateentekele mabooko abo pa mutwe wa mukooko. ²³ Alona waipaile, ne aye Mosesa washikwiile mashi anji amo ne kwi alaamba ku kaleembeleembe ka kutwi kwa kilujo kwa Alona, ne ku kyaala kya ku kubooko kwaanji kwa kilujo, ne ku kikumo kya ku kuulu kwaanji kwa kilujo. ²⁴ Kabiji baleetele ne baana ba kwa Alona, kabiji walaambile mashi amo ku tuleembeleembe twa matwi abo a kilujo, ne ku bikumo bya maulu abo bya ku kilujo. Keepo Mosesa wasaanshile mashi koonse koonse ku kya kusookelapo bitapisho. ²⁵ Kabiji washikwiile mafuta, ne mukila wanuuna, ne mafuta onse ajiinga ku bya muunda, ne ajiinga peulu ya jichima, ne mafyo onse abiji ne mafuta ajiipo, ne kijooma kya ku kilujo. ²⁶ Kabiji mu kituumbe kya bashiinkwa ba kubula mbizho yaanji ku meeso a Yehoba, aye watoolelemo kiimpape kimo kyo babujile kubiikako maanyi, ne kakimpape kamo, ka kibeebulwa, ne kwibibiika byoonse pa o a mafuta ne pa kyookya kijooma kya ku kilujo. ²⁷ Kabiji aye wabiikile bino byoonse mu mabooko a kwa Alona ne mu mabooko a baana baanji amba bebipeepeezhe bya mulaambu wa kupeepeezha ku meeso a Yehoba. ²⁸ Kabiji Mosesa wibifumishe mu mabooko abo ne kwibisooka pa kya kusookelapo bitapisho. Poonka pa mulaambu wa kusooka byajiinga bya zhila bya bweema bwa waama. Wajiinga mulaambu walaambulwa na mujilo kwi Yehoba. ²⁹ Keepo Mosesa washikwiile kakuji ne kwikapeepeezha ke ka mulaambu wa kupeepeezha ku meeso a Yehoba. Kyajiinga kiluumbo kya kwa Mosesa kya ku mukooko wazhila wa ba n'aanga, abino byo byo a kaambizha Yehoba. ³⁰ Mosesa waseendele maanyi amo ne kushiinga mashi amo pa kya kusookelapo bitapisho; ne kwi a saansa pe aye Alona, ne kubivwaalo byaanji, ne pa baana baanji, kabiji ne ku bivwaalo byaabo boonse pamo. Mujino jishiinda wafumishe Alona ne bivwaalo byaanji pa mbaji, kabiji ne baana baanji ne bivwaalo byaabo kwi Yehoba. ³¹ Kabiji Mosesa wa ambile kwi Alona ne ku baana baanji amba, "Tekai nyaama ku kibelo kya teente walusaambakeno, ne kujiila koonkakwa ne shiinkwa iji mu kituumbe kya milaambu yazhila, moonka mo a kaambizhe, amba, 'Alona ne baana baanji ba balume bo bakebija.' ³² Kabiji nyaama ne shiinkwa bikashaalapo mukebisooke. ³³ Kabiji keechi mukafume ku kibelo kya teente walusaambakeno pa mooba ataanu na abiji ne, poso mooba a kuzhijikwa kweenu a kafikizhiwe. Maambo Yehoba wazhijika mooba ataanu na abiji. ³⁴ Moonka mo kyaubiwa jaleelo- mo mo a kaambizhizhe Yehoba amba kyuubiwe mu kwimufuuchila maambo enu. ³⁵ Mukeekala mute ne bufuku mooba ataanu na abiji koonka ku kibelo kya teente walusaambakeno, ne kusuunga mukaambizho wa Yehoba, byonkabyo keechi mukafwa ne, maambo abino byo byo ne mukaambizha." ³⁶ Kabiji Alona ne baana baanji baubile abya biintu byoonse bya mukaambizhizhe Mosesa.