¹ Yehoba wa ambile kwi Mosesa, amba, ² "Inge muuntu waleenga maambo kabiji wauba byuubilo byakubula lwiitabilo kwi Yehoba ne kufumya mukwaabo na kiintu kyo ba mupeele amba: undamineko, naangwa mukyabukikizhi, naangwa mukya bwiivi naangwa waja bya mukwaabo muluunkanankana. ³ Naangwa wataana biintu bya mukwaabo byaelekele kabiji kasa abeepa ne kuchipa bubeela, naangwa kika naangwa kika byo booba baantu ne kuleenga maambo. ⁴ Kabiji inge muuntu waleenga maambo kabiji ba mutaana amba wafwa nao, wafwainwa kubweezha byoonse byo a seendele muluunkanankana naangwa kyo kyo bamupeele amba ndamineko, naangwa kyataikile kyo atoolele mino kyataanwa. ⁵ Kya kubiikapo, naangwa kika kyo wachipile bubeela wafwainwa kwibibweezha byoonse kabiji wafwainwa kubiikapo nsubu imo pa bitaanu, ne kumupa mwiinabyo pajuuba ja kulaambula mulaambu waanji wa maambo. ⁶ Kabiji wakoonsha kuleeta mulaambu wa kuzhaatwa kwi Yehoba, mwaana mukooko wabulwa bulema kufuma pa jitaanga, wamuteengo ye atoongola mwaila maambo; noobe mulaambu waluzhaachisho kwi n'aanga. ⁷ Kabiji n'aanga ukamufuuchila maambo ku meeso a Yehoba, kabiji ukalekelwa naangwa ajiinga a byeepi o afwainwe ne kufwa." ⁸ Kabiji Yehoba wa mwaambijile Mosesa, amba, ⁹ "Mukaambizhe Alona ne baana baanji ba balume, amba, 'Auno ye muzhilo wakitapisho kyakusooka: Kitapisho kyakusooka kyafwainwa kwiikala pa mujilo bufuku boonse kufika ne lukeelo, kabiji ne mujilo wa pakyakusookelapo ukalamwa kasa abeena kwaambuka. ¹⁰ N'aanga ukavwaala bivwaalo byaanji bya linenyi, kabiji ukavwaala ne linenyi bya mukachi. Ukatoola ne buto bwashaajile panyuuma yakuuba mujilo wasooka kitapisho kyakusooka pa kitapisho, kabiji ukabiika buto kuunse yakya kusookelapo. ¹¹ Kabiji ukavuula ne bivwaalo ne kuvwaala bivwaalo bikwaabo pakuseenda buto paangye ya kaamba ku mpuunzha yawaama. ¹² Mujilo wa pa kya kusookelapo keechi bamuzhimya ne. Keechi wafwainwa kuzhimya ne, kabiji n'aanga ukasoonsela nkunyi pa kya kusookelapo kila lukeelo pakukya. Ukaneengezha mulaambu wakusooka byonka byo kyatoongolwa, kabiji ukasooka pa kya kusookelapo mafuta akitapisho kya muteende. ¹³ Mujilo wafwainwa kutwajijila kwaambuka pakya kusookelapo. Keechi wafwainwa kuzhima ne. ¹⁴ Auno ye muzhilo wa mulaambu wa kajo. Baana ba balume bakwa Alona baka mulaambula kwi Yehoba pa kya kusookelapo. ¹⁵ Kabiji n'aanga ukakamunapo mukono umo wabuunga bwafulaulo bwa mulaambu wa kajo ne maanyi, ne libona uji pa mulaambo wa kajo, ne kusooka pa kya kusookelapo pakuuba bweema bwa waama bukemeneko mulaambu. ¹⁶ Alona na baana baanji ba balume bakaja byoonse bikashalaapo pa bya milaambu. byafwainwa kujiiwa kwa kubula mbizho amwa mwazhijisha. Bakekijiila mukipaango kya teente walusaambakeno. ¹⁷ Keechi kikaleengwe na mbizho ne. Napaana kwi abo noobe kyaami kya mulaambu kya leengwa na mujilo. Kyo kyazhijisha, noobe mulaambu wakufuuchila maambo ne mulaambu wakuzhaatwa na maambo. ¹⁸ Baana boonse ba balume bakwa Alona bakebija kyo kiluumbu kyaabo kya myaaka ne myaaka posotu ne kukisemi kya kuluutwe, kyatoolwa pa mulaambu wakusooka kwi Yehoba. Awa yeense ukwataako wiikala wazhila." ¹⁹ Yehoba wa ambile kwi Mosesa, amba, ²⁰ "Akye kyo kyabuupe kya kwa Alona ne baana baanji ba balume, ye bakapaana kwi Yehoba pajuuba inge mwaana yeense wasubwa maanyi: Mapaunji makumi a buunga bwalaambisha ke mulaambu wa kajo wamooba onse, afu umo walukeelo ne afu umo wa mabaanga. ²¹ Kikaleengwa na manyi mu kyakupaangilamo. Inge bebyabika, obeewa ukebileete mukachi. Mukya kukaandula bibese byo mukapaana mulaambu wa kajo ko kuuba amba kukafuma bweema bwatobala bwa kwa Yehoba. ²² Kabiji n'aanga wazhila kufuma mu baana baanji ba balume ukalaambula mulaambu. Byonka byakaambizhiwa myaaka ne myaaka, kyafwainwa kwalululwa kwiikitazha mwiulu kyoonse kwi Yehoba. ²³ Yeense mulaambu wakajo wa n'aanga ba kamwaalulula yeense ku mutazha mwiulu. Keechi wafwainwa kuja ne." ²⁴ Yehoba wa ambile kwi Mosesa, amba, ²⁵ "Amba kwi Alona ne ku baana baanji ba balume amba, 'Awe ye muzhilo wa mulaambu walulekeelo lwa maambo: Mulaambu walulekeelo lwa maambo wafwainwa kwiipaiwa pa mpuunzha po basookela mulaambu ne kwiipaya ku meeso a Yehoba. Ke mpuunzha ya zhijisha. ²⁶ N'aanga ulaambula mulaambu walulekeelo lwa maambo uka muja. Wafwainwa kujiiwa mu mpuunzha mukipaango kya teente wa lusaambakeno. ²⁷ Kyoonse kikwaata ku nyama yaakyo kikeekala kyazhila, kabiji inge mashi asaampukila ku kya kuvwaala, mwakoonsha kwiikichapa poopa pasaampukijile mashi, pa mpuunzha yazhila. ²⁸ Mino mpuki yakubuumba mobateekele bafwainwa kwi ilalaila. Inge bateeka mu mpuki ya lubeemba, bafwainwa kumutubulula buloongo, mu meema a tooka buloongo. ²⁹ Wa mulume yeense wa mu ba n'aanga wafwainwa kujaako kibese maambo kyo kyazhijisha. ³⁰ Mino kyabuupe kyoonse kya buubi kya mashi kyo baleeta mu teente walusaambakeno nakupaanga kufuutwa kwa maambo amwa mwazhila keechi kikajiiwe ne. Kyafwainwa kusooka na mujilo.