¹ Muuntu kamonyi naangwa wamona naangwa kyo ayuuka pabino-inge waumvwa maambo mino waleenga maambo inge ne kwi bwaamba ne, ukafwa nao a buubi bwaanji. ² Naangwa inge umo wakwaata pa biji byoonse abya byaleenga Lesa amba keechi byatooka ne, naangwa kakasa wa nyaama wa muungye wazhila naangwa kikalaba paanshi kyabula kya zhila, naangwa keechi wayuuka kyo auba ne, waikala kala ke wazhila kabiji ukeekala na maambo. ³ Naangwa inge wakwaata pa muuntu wazhila, abya byoonse byazhila, kabiji inge keechi wayuuka ne, keepo akeekala na maambo inge wikifiikizha. ⁴ Naangwa inge umo wachipa na kanwa kaanji ne kuuba kya bulwaanyi, naangwa kuuba kya waama, kiji kyoonse kuchipa wa mulume kichipe kichipe, kwakubula kuyuuka aye mwiine, inge wikiyuuka, ukeekala na maambo mukiintu naangwa mu kyookyo. ⁵ Inge muuntu uji na maambo mu bimo biintu bya bino, wafwainwa kwiisolola buubi boonse bo auba. ⁶ Kabiji wafwainwa kuleeta mulaambu waanji wa maamvo kwi Yehoba pa buubi bwaanji bo aubile, nyaama mukazhi kufuma pa jitaanga, naangwa mwaana mukooko naangwa mbuzhi, ke mulaambu wa buubi ne aye n'aanga uka muleengela mfuunto ya maambo anji. ⁷ Inge keechi wafwainwa kukoonsha kupota mukooko ne, wafwainwa kuleeta mulaambu wa buubi bwaanji tuteela tubiji naangwa twaana twa ngalaamwe tubiji kwi Yehoba, kamo ka mulaambu wa buubi kabiji kakwaabo ka mulaambu wakusooka. ⁸ Wafwainwa kuleeta ku n'aanga usa kupaana ke mulaambu wa buubi pataanshi-usa kufumyaako mutwe ku nshiingo yaako mino keechi kwikafumishila ku mubiji waako ne. ⁹ Kabiji usa kusaansa mashi amo muunsa ya kya kusookelapo kitapisho, kabiji usa kuzuunzulula mashi ashala paanshi ya kitako kya kya kusookelapo bitapisho. Kino ke kitapisho kya buubi. ¹⁰ Kabiji wafwainwa kupaana ka n'oonyi ka bubiji ka mulaambu wakusooka, noobe byo baluumbulula mu mizhilo, kabiji ne n'aanga uka mufuuchila aye buubi bo aubile, ne yeewa muuntu ukalekelwao. ¹¹ Mino inge keechi wakoonsha kupota tuteela tubiji naangwa twaana twa ngalaamwe tubiji ne, keepo wafwainwa kuleeta kitapisho kyaanji na buubi bwaanji mapaunji jikumi a Efa a maluba a waama pa buubi bo aubile. Keechi akabiikepo maanyi ne naangwa liboona ne, pakuuba ke mulaambu wa buubi. ¹² Wafwainwa kuleeta kwi n'aanga, ne aye n'aanga akaseendepo ke wakumuvulukilapo mulaambu kabiji ne kusooka pa kya kusookelapo kitapisho, peulu ya mulaambu waleengwa na mujilo wa Yehoba. Uno ye mulaambu wa buubi. ¹³ Kabiji n'aanga usa kukamufuuchila maambo anji o aubile, ne yeewa muuntu ukaleekelwao, bikashalaapo pa mulaambu ke bya n'aanga, noobe mulaambu wakajo."' ¹⁴ Kabiji Yehoba wa ambile kwi Mosesa, amba, ¹⁵ "Inge umo wauba buubi ne kuvulaan'anyakotu kulaambula biintu kwi Yehoba ne, mino waubile bino kwakubula kuyuuka ne, wafwainwa kuleeta mulaambu waanji kwi Yehoba. Uno mulaambu wafwainwa kwiikala ke mukooko wabula bulema kufuma pa jitaanga; Muteengo waanji ke masheekele- masheekele a muteente wazhila- a mulaambu wa buubi. ¹⁶ Kabiji wafwainwa kutoondwa Yehoba pa byo wauba byatama ne na byazhila, kabiji wafwainwa kupaana kimo pa bitaanu, ne kupaana kwi n'aanga. Kabiji aye n'aanga ukamufuuchila aye na mukooko wa maambo wa mulaambu, kabiji awa muuntu ukaleekelwao. ¹⁷ Inge muuntu wauba buubi kabiji wauba abya Yehoba byo a mukaambizha kubula kuuba, naangwa keechi wayuuka ne, uji na maambo kabiji wafwainwa kuseenda maambo anji mwiine. ¹⁸ Wafwainwa kuleeta mukooko wabula bulema kufuma pa jitaanga , uji na buneeme, wa mulaambu wa pa maambo anji kei n'aanga. Kabiji aye n'aanga ukaleenga kya kumufuuchilako maambo kweesakanya na buubi bwaanji bo aubile, abwa bo abujile kuyuuka, kabiji ukaleekelwao. ¹⁹ Ke mulaambu wa maambo, kabiji kiine uji na maambo ku meeso a Yehoba."