¹ Kabiji Yehoba wamwambiijile Mosesa, amba. ² ''Babule baantu bamu Isalela amba, inge muuntu waleenga maambo ukabula kukeba kuleenga maambo, saoba kimo byoambijile Yehoha kubula kuuba kwibyuba, kabiji inge wauba kiintu kyobakanya kubula kuuba, bino byafwainwa kubiwa. ³ Uvwe ye n'aanga washiingwa maanyi waleenga maambo , kabiji byonkabyo waleka luzhachisho pa baantu, akalambule kwi Yehoba na maambo a bubi bwaanji bo aubila, noobe wamulume wabula bulema kwi Yehoba ke mulambo wa bubi ⁴ Wafwainwa kuleeta awa n'oombe mulume ku kibelo kya teente walusaambakeno ku meeso a Yehoba, ne kuteenteka kubooko kwaanji pa mutwe wa n'oombe, ne kwiipaya n'oombe ku meeso a Yehoba. ⁵ Kabiji n'aanga washiingwa maanyi akashikule mashi amo a yeewa n'oombe ne kwi aleeta ku teente walusaambakeno. ⁶ Kabiji n'aanga akatuumpe munwe waanji mu oa mashi ne kwi asaansa amo jitaanu na jibiji kwi Yehoba, kwiipi na kipeembe kya moomwa mwazhijisha. ⁷ Kabiji aye n'aangwa ukabiika mashi amo ku nseengo ya kyakusookelapo bya kufutumuna biji na bweema bwa waama ku meeso a Yehoba kiji mu teente walusaambakeno, kabiji onse mashi a n'oombe a shalaapo akechile ku kitako kya kyakusookelapo milaambu ya kusooka, kiji ku kibelo kya teente wa lusambakeno. ⁸ Kabiji akechile ne mafuta onse a yeewa n'oombe wa mulaambu wa buubi, mafuta aji kubya mukachi byoonse mafuta akwaatankana nabibese bya mukachi. ⁹ Ne mafyo onse abiji. ne mafuta aji koonka ku mafyo aji kwiipi na musana, ne oa aji peulu, aji ku jichima, ne mafyo: ukebichibako byoonse bino. ¹⁰ Akachibe onse byonka byo a chibile a ku n'oombe wa kitapisho kya mulaambu wa muteende, ne aye n'aanga ukebisooka pa kyakusookelapo milaambu ya kusooka. ¹¹ Mino mwai wa n'oombe, ne nyaama yaanji yoonse pamo ne mutwe ne bijooma ne bya muunda ne busobe. ¹² Byoonse bimamo bya n'oombe akatwaale byoonse bimamo paangye ya kaamba kuuntu kwatooka ku kyaala ko beechila buuto; bakasooke bimamo poonka pa nkunyi, wafwainwa kusooka bimamo po beechila buto. ¹³ Inge jibuumba joonse ja beena Isalela jaleenga maambo kwakubula kusaka, ne jibuumba keechi ja yuuka amba twaleenga maambo ne kuuba biintu byakaambizha Yehoba mukubula kwi byuuba, kabiji inge bazhaatwa, ¹⁴ mino inge maambo abo obaleenga ayuukanyikwa ku jibuumba jikalaambule n'oombe wa mulaambu wakusooka ne kumuleeta ku kibelo kya teente walusaambakeno. ¹⁵ Bakuluumpe ba jibuumba bakateenteke mabooko abo pa mutwe wa yeewa n'oombe ku meeso a Yehoba; ne n'oombe bakamwiipaye koonka ku meeso a Yehoba. ¹⁶ Aye n'aanga washiingwa maanyi akaleete mashi amo a n'oombe ku teente wa lusaambakeno. ¹⁷ Ne n'aanga akatuumpe munwe waanji mu oa mashi ne kwi asaansa jitaanu na jibiji ku meeso a Yehoba, kwiipi na kipeembe. ¹⁸ Ukabiike mashi amo ku nseengo ya kya kusookelapo ku meeso a Yehoba mu teente wa lusaambakeno, ne kwichila mashi onse akeechile kuunshi ya kya kusookelapo ku kibelo kya teente wa lusaambakeno. ¹⁹ Akachibeko ne mafuta ku n'oombe ne kusooka pakitapisho. ²⁰ Akye kyokyo afwainwa kuuba na n'oombe byonka byo aubile na n'oombe wamulaambu wa buubi, byo afwainwa kuuba ne na uno n'oombe. ²¹ Kabiji akatwaale n'oombe paangye ya kaamba ne kusooka pamo byonka byo a sookele n'oombe mutaanshi; Ye mulaambu wa buubi wa kipwiilo. ²² Inge ntaangi waleenga maambo mukuuba biintu abya Yehoba byo a zhijika Lesa waanji amba kwibyuuba ne, ne kuzhaatwa wazhaatwa. ²³ Ne buundenga maambo bwaanji bo auba inge bwayuukanyikwa wafwainwa kuleeta mulaambu wa mbuzhi, mulume wabula bulema. ²⁴ Ne kubiika kubooko kwaanji pa mutwe wa mbuzhi ne ku mwiipaila poonka po bepaila mulaambu wakusooka ku meeso a Yehoba; ye mulaambu wa buubi. ²⁵ Ne n'aanga mukataampe akatwaale mashi amo a mulaambu wa buubi ku munwe waanji ne kushiinga ku nseengo ya kya kusookelapo milaambu ya kusooka, ne kwiichila mashi akwaabo akashalaapo ku kitako ya kyakusookelapo milaambu yakusooka. ²⁶ Kabiji ukasooka mafuta pa kya kusookelapo noobe kitapisho kya mulaambu wa muteende. Ne aye n'aanga akapaane mfuuto ya kufuuchilako maambo anji, ne ntaangi ba kamulekela maambo. ²⁷ Inge umo wa mu baantutu waleenga maambo kwakubula kuyuuka mukuuba kino, kyo a kaambizha Yehoba amba kwi kyuuba ne, byo avulukile kuzhaatwa kwaanji. ²⁸ Pano maambo anji oa leenga wayuuka mwiine, mino akaleete mulaambu wa mbuzhi mukazhi wabula bulema, na maambo a buubi bo auba. ²⁹ Kabiji akateenteke kubooko kwaanji pa mutwe wa mulaambu wa buubi ne kwiipaya mulaambu wa buubi, akamwiipaile poonka po beepaila mulaambu wakusooka. ³⁰ Aye n'aanga akatookel mashi anji amo ku munwe ne kwi ashiinga ku nseengo ya kya kusookelapo milaambu ya kusooka, ne kwiichila mashi akwaabo ku kitako kya kyakusookelapo. ³¹ Ukachibe mafuta onse, byonka byo be angata kukitapisha kya milaambu ya muteende, ne n'aanga ake asooke pa kya kusookelapo, bukaleeta bweema bwa waama ku meeso a Yehoba. ³² Inge muuntu waleeta mwaana mukooko noobe kitapisho kya mulaambu wa buubi, akaleete mukazhi wabula bulema. ³³ Ne kuteenteka akateenteke mabooko anji pa mutwe wa mulaambu wa buubi ne kwiipaya akepaile poonka po bepaila mulaambu wakusooka. ³⁴ Ne n'aanga akatwaale mashi amo a mulaambu wa buubi ku munwe waanji ne kushiinga ku nseengo ya kya kusookelapo milaambu yakusooka, ne kwiichila mashi akwaabo akashalaapo kukitako kya kyakusookelapo. ³⁵ Nekuchiba mafuta anji onse pamo byonka byo angata mafuta a mwaana mukooko ku kitapisho kya mulaambu wa muteende, ne n'aanga akasooke pa kya kusookelapo milaambu walaambulwa na mujilo kwi Yehoba.