¹ Yehoba wa ambile kwi Mosesa ku mutuumba wa Sinai, amba, ² "Amba kubaantu beena Isalela ne kwaamba kwi abo amba, byo mukafika mu ntaanda yo ne mupeele, keepo ntaanda ikeekala ya kulama Sabaado wa Yehoba. ³ Mwafwainwa kubyaala majimi enu pa myaaka itaanu na umo, kabiji ne myaaka itaanu ne umo mukanoowa majimi enu a min'aanza n'aanza ne kubuungizha bipaangwa. ⁴ Mino mu mwaaka wa butaanu na bubiji, mukabiike Sabaado wa kukookoloka kwa ntaanda akalamwe Sabaado wa Yehoba. Keechi mukabyaale majimi enu naangwa kunoowa majimi enu a min'aanza n'aanza. ⁵ Keechi mukanoowe byabula kufwainwa biikomena ne kubula kunowa bipaangwa byakoma byo babula kukuunkula. Uno ukeekala mwaaka wa kukookoloka kwa ntaanda. ⁶ Biji byoonse bimena pamushiji wakubula kwiingijilapo mu mwaaka wa Sabaado bikeekala kajo kwi anweeba. Anweeba, bakalume beenu ba balume ne ba bakazhi, bakalume bakwaashima ne beenyi, bekala pamo ne anweeba bakoonshe ku buungizha kajo, ⁷ ne byanyaama beenu bakuleela kabiji ne banyaama ba muungye bakaje kiji kyoonse mushiji kyo a kalupula. ⁸ Mukabale ma Sabaado ataanu na abiji mu mwaaka bimye bitaanu na bibiji mu mwaaka wa butaanu na bubiji pakuuba amba kukeekale ma Sabaado ataanu na abiji a mu mwaaka, kuvwaanga pamo ke myaaka makumi ana ne ina. ⁹ Poonkapo anweeba mukeembe luseengo wa koonse koonse mujuuba ja bujikumi mu n'oondo wa butaanu na bubiji. Pa juuba jakufuuta maambo mukeembe luseengo moonse mwapela ntaanda. ¹⁰ Mwafwainwa kupaatulako mwaaka wa bujikumi ne butaanu kwi Yehoba ne kushimuna muteende moonse moonse mu ntaanda kuboonse beekalamo. Ukeekala wa kusekelela kwi anweeba, amo bipe ne bazha kubweezha kubisaka byaabo. ¹¹ Mwaaka wa bujikumi na butaanu ukeekala wa kusekelela kwi anweeba. Keechi mwafwainwa kubyaala naangwa kuuba mwiingilo uji yeense wakunowa ne, kabiji keechi mwafwainwa kubuungizha min'aanza n'aanza aya ikoma pa misaampi yobabula kuchibachibako ne. ¹² Maambo kiine ke mwaaka wa kusekelela, ikeekala yazhila kwi anweeba. Mwafwainwa kuja abya bimenatu biine mu majimi. ¹³ Mwafwainwa kubweezha uji yeense kubipe byaanji mu uno mwaaka wa kusekelela. ¹⁴ Inge mwapotesha uji yeense mushiji ye wiikala naanji pabwiipi naangwa upota mushiji uji yeense kufuma ku ye wiikala naanji pabwiipi, keechi wafwainwa kubeepa naangwa kutamisha umo ne mukwaabo ne. ¹⁵ Inge wapota mushiji ku ye wiikala naanji pabwiipi, tuumpaimo ne naambala ya mwaaka ne kajo kafwainwa kufumaamo kufika ne ku mwaaka mukwaabo wakusekelela. Ye wiikala naanji pa bwiipi naaye byonkabyo. ¹⁶ Naambala yabaisha ya mwaaka kufika ku mwaaka mukwaabo wa kusekelela ukabaisha muteengo wa mushiji, ne naambala ya mwaaka ya kepesha kufika ku mwaaka mukwaabo wa kusekelela ikabweezha muteengo paanshi, maambo naambala ya kunowamo mu mushiji kwa yeewa mwiine muupya yatazha ku naambala ya mwaaka mukwaabo wa kusekelela kasa akyaangye. ¹⁷ Keechi wafwainwa kubeepa naangwa kutamisha umo ne mukwaabo ne; mu kupiingakenyamo, mwafwainwa kunemeeka Lesa weenu, maambo amiiwa Yehoba ne Lesa weenu. ¹⁸ Onkao maambo mwafwainwa kukookela mafuunde ami, lamai mizhilo yaami ne kwi biseenda paangye. Keepo anweeba mukeekala mu ntaanda ba viimbilwa. ¹⁹ Mushiji uka menesha byo afumya, kabiji mukaja ne kwiikuta ne kwiikala baviimbilwa. ²⁰ Keechi mwafwainwa kwaamba amba, "Tukajaanga ka mu mwaaka wa butaanu na bubiji? Talai, keechi twafwainwa kubyaala naangwa kubuungizha byotwafumyaamo ne." ²¹ Amiiwa nkakaambizha mapeesho ami kwiiya pe anweeba mu mwaaka wa butaanu na umo, kabiji mukanowa kajo kavula kafwainwa pa myaaka isatu. ²² Mukabyaala mu mwaaka wa butaanu na busatu ne kutwaajijila kuja kufuma ku kajo ka myaaka ya kunyuma ne kajo kasuungwa. Posotu ne kunowa kwa mwaaka wa butaanu ne ina wafika, mukakonsha kuja kajo kapainwe mu myaaka ya kunyuma. ²³ Mushiji keechi ukapoteshiwa kikupu ku mwiine wakataataka ne , maambo mushiji ye waanji. Mwibenyi boonse neeba ka n'eenda mu mushiji waami. ²⁴ Mwafwainwa kuvuluka luusa lwa lushinjilo lwamu mpuunzha yoonse byomukasaka ; mwafwainwa kuswiisha mpuunzha kubweela jikwaabo ku kisemi kufuma ko mwapotele. ²⁵ Inge mukweenu mwiina Isalela wa aluka muyaanji ne onkao maambo poteshapo kipe kyaanji kabiji baloongo baanji ba peepi baewainwa kwiiya na kumulamina kyo kyo a potesha muloongo waanji. ²⁶ Inge muuntu ufwaabo baloongo ku kuula kipe kyaanji, mino inge waikala buloongo kabiji uji nabulume bwa kwikiluula, ²⁷ keepo wafwainwa kubala myaaka kufuma kimye kyo a poteshele mushiji ne kupaana yashaajileko ku ye apotesheeko. Pano wafwainwa kubweezhi kumwiina kipe. ²⁸ Mino inge keechi wakoonsha kutaambula mpuunzha yaanji mwiine, keepo mpuunzha yo a poteeshe ikashaala mu mabooko a yeewa wapotele kufika ne mwaaka wa makumi ataanu. Pa mwaaka wa makumi ataanu, mpuunzha ikabweela ku muuntu wapoteeshe, ne mwiine mwiinakyo ukabweela ku kipe kyaanji. ²⁹ Inge muuntu wapotesha nzuubo mungyaangi yakikizhiwa, keepo wafwainwa kwi ipota jikwaabo mukachi ka mwaaka yeense kasa bapotesha kala. Pa mwaaka mutuuntulu ukeekala na luusa lwa kukuulwa. ³⁰ Inge nzuubo yabula kukuulwa mu mwaaka yeense, keepo nzuubo mu ngyaangi yakikizhiwa ikeekala ke kipe kya wapota mu bwiikalo bwaanji bupya. Keechi ke yakubweezha mu mwaaka makumi ana ne. ³¹ Mino nzuubo yaabo mu muzhi yabula bibuumba mukachi kaabo ikaswiishiwa noobe muzhi wa mpuunzha. Byafwainwa kupokololwa, kabiji bafwainwa kubweezha mu mwaaka wa makumi ataanu. ³² Noobe mu muzhi wa beena Levi, nzuubo iji mu mabooko a beena Levi mu muzhi waabo bipe byaabo byafwainwa kupokololwa kimye kiji kyoonse. ³³ Inge uno wa mubeena Levi babula kukuula nzuubo yo a poteeshe, keepo nzuubo yo ba poteeshe mu muzhi moiji yafwainwa kubweela mu mwaaka wa makumi ataanu, mu nzuubo ya mizhi yabeena Levi bipe byaabo mu beena Isalela. ³⁴ Mino mizhi yazhookoloka mizhi yaabo keechi bafwainwa kupoteesha ne maambo ke bipe byaabo bya beena Levi bya myaaka. ³⁵ Inge mukweenu muuntu wa mukyaalo kimo waikala wayaanda, kyakuuba amba keechi wafwainwa kwimweena aye mwiine ne, keepo wafwainwa kumukwaasha byonka byo mwafwainwa kukwaasha mweenyi naangwa ba ka n'eenda pakuuba amba ekale mwi anweeba. ³⁶ Keechi umufumyeemo kizaku kyo aji naakyo ne naangwa kyoengijisha, mino nemeeka Lesa obee pakuba amba muloongo obee wafwainwa kutwajijila kwikala ne obewa. ³⁷ Keechi mwafwaina kumupa maali akumukogweesha ne naagwa kumupigula byakubiikapo ne, naangwa kupotesha kajo kenu amba mumweneemo ne. ³⁸ Ami ne Yehoba Lesa weenu , wimifumishe mu Ijipita , mukuuba amba nkemupe muzhi wa Kenana ,nekuuba amba nkekaje Lesa weenu. ³⁹ Inge nuungwe muntu wamukyaalo kimo waikala wayaanda ne kwipotesha aye mwiine kwianeeba, keechi mwaafwainwa kumwingijisha noobe muzha ne. ⁴⁰ Mulamaayi noobe wamwingilo yeba tweezha nkito . Wafwainwa kwikala noobe kan'eenda kufikatu ne kimye kya makumi ataanu. ⁴¹ Pano ukafuma kwianeeba, aye ne baana baanji pamo, kabiji ukabweela kubufumu bwaanji ne kubiintu biba shaanji. ⁴² Booba mingilo yaami boonafumishe mu Ijipita. Kabiji keechi bakapoteshiwa noobe bazha ne. ⁴³ Keechi mwafwainwa kwibatangijila javula ne, mino mwafwainwa kunemeka Lesa weenu. ⁴⁴ Pano pabazha beenu baabalume ne baaba kazhi, abo boobafwainwa kuseenda mukyaalo kyeenu abo bomwiikala naabo, kupota bazhak kufuma kwi abo. ⁴⁵ Kabiji mwafwainwa kupota bazha kufuma kubenyi beenu kwikala ne anweeba nebafuma kubufumu bwaabo ne anweeba , besemekwa mu mpuuzha yeenu, kabiji bafwainwa kwikala ke bipe byeenu. ⁴⁶ Mwafwainwa kupaana bano bazha noobe byabumpaanyi wa baana beenu kufuma aneeba, kukwaata noobe kipe ne kuleenga bazha babuumi bamuyaaya, pakuuba kechi mwafwainwa kutangijila baloongo beenu bamubeena Isalela ne. ⁴⁷ Ige mweenyi naangwa muuntu ubeena kwikala ne anwe pakakimye kacheeche waikala wafwainwa, kabiji inge umo muloongo weenu wamubeena Isalela waikala wayaanda ne kwipotesha mwiine kwi yeewa mweenyi , naangwa membala mweenyi, ⁴⁸ inge mukweenu mwiina Isalela wapotewa, wafwainwa kupotwa jikwaabo. Umo wamukisemi kyaanji wafwainwa kumupokolola. ⁴⁹ Wafwainwa kwikala mwiinsho yaanji, naangwa mwaana wamulume waba mwiinsho yaanji, umupokolola, naagwa uji yeense mubufumu bwaanji. naangwa, inge waikala wa kuya kulutwe, wafwainwa kwipokolola aye mwiine. ⁵⁰ Wafwainwa kumvwan'aana na muuntu kumupotesha ; bafwainwa kubala myaaka kufuma ku mwaaka ye epotesheeko mwiine kuwamupotele kufikatu ne ku mwaaka wamakumi ataanu, muteengo wakwipokolola wafwainwa kubalwa myaaka kufuma ku mwaaka koepoteeshe mwiine ku yeewa upota kufikatu ne mwaka wa kusekelela, muteengo wakukulwa wafwainwa kusoontwa ku maali akupa awa wamwingilo, bimye bya myaaka wafwainwa kutwajijila kwingila ku yeewa wamuletele. ⁵¹ Inge myaaka koikijitu kufika ne mwaaka wakusekelela, wafwainwa kupaana muteengo wakwipokolwelamo maali afwainwa mu yooya myaaka. ⁵² Inge kujitu myaaka icheece mu mwaaka wakusekelela, mino wafwainwa kutatula ku yeewa wamupotele kupwiisha mooba a myaaka yapita saka mwaaka wakusekelela ukyangye kufika, kabiji wafwainwa kupaana maali akwipokolwelamo kwaanji mukulama mooba a myaaka. ⁵³ wafwainwa kwikala ku yeewa wamupota noobe muuntu yebatweezha pa mwaaka pa mwaaka. Awa upota kechi wafwainwa kumukokela kikupu ne. ⁵⁴ Ige kechi wakuulwa ne muano mashiinda, wafwainwa kwingila kufikatu ne mwaaka wakusekela, aye ne baana baanji pamo. ⁵⁵ Kwi amiwa beena Isalela booba mwiingilo. Booba mwiingilo waami boonaletele kufuma mu ntaanda ya Ijipita. Amiwa ne Yehoba Lesa weenu.'"