¹ Yehoba wa ambile kwi Mosesa, ne kwaamba amba, ² "Kaambizha baantu beena Isalela ba ka kuleeele maanyi a waama apimwa kufuma ku Olivi obeengijisha ku laampi amba kyeeya kikatwaajijile kusaama. ³ Paangye ya kipeembe pajiinga jikwaachi ja lulayaan'ano ku teente walusaambakeno, Alona wafwainwa kutwajijila kufuma mabaanga kufika lukeelo keechi kula laampi kasa a ambuka ku meeso a Yehoba. Akino kikeekala ke kyatwaajijila kufika ne mukisemi kya kulutwe. ⁴ Ba n'aanga bakuluumpe bakaambulenga ma laampi abo kimye kyoonse ku meeso a Yehoba, Ma laampi a apa byo babiikapo bya golide wa waama. ⁵ Wafwainwa kutwaala buunga bwalaambisha ne kuleenga bashiinkwa jikumi na babiji. Mwafwainwa kwiikala ma paunji jikumi na abiji mushiinkwa umo. ⁶ Keepo mwafwainwa kwibataanchika mu mikuuku, mikuuku itaanu na umo pa tebulu wa golide wa waamisha ku meeso a Yehoba. ⁷ Wafwainwa kubiikapo liboona wa waamisha pa mikuuku yoonse ya shiinkwa ke kwiimeenako kya buupe. Uno liboona ukeekala ke mulaambu wa kusooka kwi Yehoba. ⁸ Juuba joose ja Sabaado ba n'aanga bakataampe bafwainwa kuneengezha shiinkwa ku meeso a Yehoba mu kwi meenako beena Isalela, noobe kya kumweenako lulayaan'ano lwa myaaka ne myaaka. ⁹ Kino kya buupe kikeekala ke kya kwa Alona ne baana baanji, kabiji bakekijiila pa mpuunzha yazhila, yo mpuunzha kufuma mu bya buupe bya yehoba bya leengwa na mujilo." ¹⁰ Pano kyamweekele amba mwaana wa mulume wa mwaana mukazhi mwiina Isalela, aye wajiinga na shaanji mwiina Ijipita, waile na baantu beena Isalela. Awa mwaana wa mulume wa mwaana mukazhi mwiina Isalela wa lwiile na mwaana mulume mwiina Isalela mu kaamba. ¹¹ Mwaana wa mulume wa mwaana mukazhi mwiina Isalela waubile mweenga jizhina ja Yehoba ne kufiinga Lesa, keepo baantu bamuleetele kwi Mosesa. Jizhina ja inaanji wajiinga Shelomita, muka Dibile, kufuma ku mukooka wa kwa Danyi. ¹² Ba mubiikile mukaleya kufikatu aye mwiine Yehoba po akaswiisha kyaaswa muchima waanji kwi aye. ¹³ Poonkapo Yehoba wa ambile kwi Mosesa, amba, ¹⁴ "Seendai nsoongwalume aye wafiinga Lesa paangye ya kaamba. Boonse ba ku muumvwa bafwainwa kuteenteka mabooko abo pa mutwe waanji, kabiji ne boonse bapwiila bafwainwa ku mwaasa mabwe. ¹⁵ Bafwainwa kuluumbulwila baantu beena Isalela ne kwaamba amba, 'Yeense ukafiinga Lesa waanji ukaseenda buundenga maambo bwaanji mwiine. ¹⁶ Yeense ukaneena Jizhina ja Yehoba mweenga wafwainwa kwiipaiwa ne kumwaasa mabwe ekale mweenyi naangwa wasemekelwa mu ntaanda ya beena Isalela. Inge muuntu naangwa umo akakosamike jizhina ja Yehoba wafwainwa kwiipaiwa. ¹⁷ Yeense ukataaya mukwaabo paanshi, wafwainwa kwiipaiwa. ¹⁸ Inge muuntu waipaila mukwaabo kilelwa wafwainwa kufweeta mukwaabo, kyuumi pa kyuumi. ¹⁹ Inge umo wakozha mukwaabo, kyafwainwa ku muubilwa naanji byonka byaubiwa ku mukwaabo: ²⁰ Kuchimuka pa kuchimuka, jiiso pa jiiso, jiino pa jiino. Byonka byoakozha mukwaabo muuntu, byo byafwainwa kuubiwa kwi aye naanji. ²¹ Yeense ukeepaya nyaama wa mukwaabo wafwainwa kubweezha, kabiji yeense ukeepaya mukwaabo wafwainwa kwiipaiwa. ²² Mwafwainwa kwiikala na mizhilo ino boonse basemekelwa mu ntaanda ya beena Isalela ne beenyi, maambo amiiwa ne Yehoba Lesa weenu."' ²³ Keepo Mosesa wa ambile ku baantu beena Isalela, kabiji ne baantu baleetele nuuntu paangye ya kaamba, yeenka wafiingile Yehoba. Ba mwaashile mabwe. Beena Isalela baubile mikaambizho ya Yehoba yo apeele Mosesa.